Ձեր վստահելի աղբյուրը

«Այն ծրագիրն ու նախագիծը, որ ունեինք, կատարվեց և կատարվեց բարձր մակարդակով. ես գոհ եմ»,- Panorama.am-ի հետ զրույցում ասաց Մոսկվայի Հայոց առաջնորդանիստ «Սուրբ Պայծառակերպություն» եկեղեցու և եկեղեցական համալիրի ճարտարապետ Արտակ Ղուլյանը` հավելելով, որ անկախ բոլոր այն դժվարություններից, որ անցած ճանապարհին հանդիպել են, կարևորն այն է,որ եկեղեցին կառուցվեց:

Ճարտարապետի խոսքով, թեև շինարարությունը տևել է երկար տարիներ, սակայն մինչև երեկ էլ նախագծում փոփոխություններ են արվել` հարդարման և ձևավորման գործընթացում: Սա, ի դեպ, Ա.Ղուլյանի արդեն երրորդ օծված եկեղեցին է:

«Ես բոլորին ասում եմ, որ հիմնական երկու խնդիր եմ դրել, որպեսզի, նախ, հայկական ճարտարապետությունը ներկայացվի Հայաստանի սահմաններից դուրս, ինչպես նաև արժանի լինի այն քաղաքի ճարտարապետությանը, որտեղ կառուցվում է: Կարծում եմ, որ այդ երկուսի համադրության արդյունքում է դիտարկվելու եկեղեցին»,- նշեց ճարտարապետը:
Եկեղեցական համալիրի կառուցումը հնարավոր դարձավ հայազգի բարերարների ներդրումների շնորհիվ: Այդ թվում և Սբերբանկ-CIB-ի համաղեկավարն Ռուբեն Վարդանյանի:

«Կարևորը ոչ թե այն է, որ ունենք նման շքեղ ու մեծ եկեղեցի Մոսկվայի կենտրոնում, այլ այն, որ ունենք եկեղեցի, ունենք կրթահամալիր, նաև մշակութային կենտրոն` մեծ համալիր, որն այս ամենը համախմբում է: Ես ուրախ եմ, որ մեր բոլորի երազանքը ի վերջո իրականացվեց»,- լրագրողների հետ ճեպազրույցում ասաց Ռ.Վարդանյանը:

Նոր եկեղեցու արժանքիների թվում մատնանշվում է այն համեմատականը, որ մինչ օրս միակ հայկական եկեղեցին Մոսկվայում բավականին փոքր էր և առաջնորդանիստը այս իմաստով շատ է շահում: Ռ.Վարդանյանի խոսքով, այն, որ եկեղեցին մեծ է իհարկե կարևոր է, բայց ավելի կարևոր է այն, որ մարդիկ նաև հնարավորություն կստանան դրա պատերի ներքո շփվել միմյանց հետ, պահել կապը: Եվ շատ կարևոր է, որ կրթահամալիրում հնարավորություն կունենան ուսվել մեր փոքրիկները.

«Ինձ շատ է ուրախացնում այդ հանգամանքը, որ մեր փոքրիկները հնարավորություն կունենան սովորելու և ծանոթանալու հայկական ավանդույթներին, արժեքներին»,- հավելեց գործարարը:

Նշենք, որ Մոսկվայի Հայոց առաջնորդանիստ եկեղեցական համալիրը զբաղեցնում է շուրջ 1.5 հա տարածք, այն նախատեսված է հազար մարդու համար: Եվ այն ամենամեծ թեմն է ամբողջ աշխարհի կտրվածքով: Կարևոր խորհրդանիշը, որ իր մեջ կրում է եկեղեցական համալիրն այն է, որ դրա կառուցման համար օգտագործվել է Հայոց պատմական մայրաքաղաք Անիի տուֆը: Թեև ի սկզբանե միտք է եղել, որպեսզի Տաճարն էլ կառուցվի Աղթամարի նմանակով.

«Նման ցանկություն կար, որպեսզի Աղթամարի կրկնօրինակը կառուցվի, սակայն ես համոզեցի, որպեսզի այդպես չարվի… շատ ուրախ եմ, որ նման եկեղեցի ունենք, որովհետև համայնքը շատ մեծ է , հայկական եկեղեցին` փոքր և երբեմն տեղ չկար մարդկանց կանգնելու համար»,- ասաց բարերար Լևոն Հայրապետյանը: Վերջինս համոզված է` եկեղեցու թե' կառուցմանը, թե' եկեղեցական կյանքին մասնակցությունը հնարավորություն է տալիս հային հայ մնալ….

Հիշեցնենք, այսօր առավոտյան Մոսկվայում ՀՀ նախագահ Սերժ Սարգսյանի և առաջին տիկին Ռիտա Սարգսյանի, Լեռնային Ղարաբաղի Հանրապետության նախագահ Բակո Սահակյանի ներկայությամբ Ամենայն Հայոց Գարեգին Բ Կաթողիկոսի օրհնությամբ օծվեց Մոսկվայի Հայոց առաջնորդանիստ եկեղեցին :
Նախորդիվ`  Անիի վարդագույն տուֆը Մոսկվայի կենտրոնում. Մոսկվայի Հայոց առաջնորդանիստ եկեղեցին այսօր կօծվի (լուսանկարներ)

Մոսկվայի եկեղեցին օծվեց, այն կկրի «Սուրբ Պայծառակերպություն» անունը (լուսանկարներ)

Պատրիարք Կիրիլ. Եկեղեցական համալիրը կամրապնդի ու կզարգացնի ռուս-հայկական եղբայրությունը