Ձեր վստահելի աղբյուրը

Հայաստանի Փաստաբանների պալատի փաստաբան, Վանաձորում հայտնի փաստաբան Ռուբեն Հակոբյանը ստանձնել է Վանաձորի մանկատան նախկին սան Ռոման Կուդաշինի պաշտպանությունը և սկսել է ուսումնասիրել գործի նյութերը: Panorama.am-ի թղթակցի հետ զրույցում փաստաբանը չբացառեց, որ արդեն օրինական ուժի մեջ մտած վճիռ ունեցող այս գործով երևան գան նոր հանգամանքներ:

Panorama.am-ը բազմիցս անդրադարձել է Վանաձորի մանկատան նախկին սաների` Ռոման Կուդաշինի և Թագուհի Քոչարյանի նորակազմ ընտանիքի ճակատագրին, նրերկայացրել նրանց խնդիրը: 24-ամյա Ռոմանը, ով ազգությամբ ռուս է և վաղ հասակում կորցրել է ծնողներին, մանկատնից դուրս գալուց հետո աշխատել է Վանաձորի ՀԷՑ-ում որպես մոնտյոր ու իրենց աշխատավարձով, ինչպես Թագուհին էր պատմել, կարողացել են նորմալ ապրել: Վանաձորում ապրում են վարձակալած բնակարանում, մինչև պետությունը նրանց բնակարան կհատկացնի: Թագուհին ասել է, որ իրենց պահանջները քիչ են եղել, իսկ ընտանիք մտնող գումարը բավարարել է իրենց ու նորմալ ապրել են, հետևաբար գողություն կատարելու մասին մտքներով անգամ չի անցել:

Վանաձորի մանկատնից 2011-ի հունիսին գողացված երաժշտական կենտրոնը դառնում է պատուհաս այս նորաստեղծ ընտանիքի գլխին: Ըստ նախաքննության տվյալների և այնուհետև` Լոռու մարզի ընդհանուր իրավասության դատարանի դատավոր Մուշեղ Հարությունյանի 2012-ի հուլիսի 13-ին կայացրած վճռով, Ռոման Կուդաշինը մանկատան մյուս սաներից մեկի` Արթուր Կիրակոսյանի ու Վանաձորի բնակիչ Տարոն Մելիքջանյանի հետ միասին մուտք են գործել մանկատուն և գողացել մանկատան երաժշտական կենտրոնը: Եվ նույն դատարանի վճռով Արթուրն ու Տարոնը դատապարտվել են հինգ տարի ազատազրկման, իսկ Ռոմանը` 4:

Առաջին ատյանի դատարանի վճիռը Վերաքննիչ դատարանը թողել էր ուժի մեջ, իսկ Վճռաբեկ դատարանը վարույթ չէր ընդունել: Դատական այս քաշքշուկի մեջ Թագուհին երեխա էր կորցրել, իսկ կյանքը վերածվել դժոխքի: Ռոմանն այժմ հետախուզման մեջ է: Թագուհին վերջերս նամակ էր գրել Հայաստանի նախագահին, արդարադատության նախարարին, Վճռաբեկ դատարանի նախագահին` խնդրելով օգնել իրեն արդարության հասնելու համար:

Օրերս կառավարության առաջ իրականացրած բողոքի ակցիայից հետո Լոռու մարզի դատախազ Հակոբ Ղարախանյանը ընդունել էր Թագուհուն, լսել խնդիրը, բացատրել խնդրի հետ կապված իրավական նրբությունները: Այժմ փաստաբան Ռուբեն Հակոբյանը ուսումնասիրում է գործի նյութերը նոր երևան եկած հանգամանքների մասով վճռաբեկ բողոք ներկայացնելու համար:

«Ես հույս ունեմ, որ գոնե այս անգամ Վճռաբեկ դատարանը հարցին լուծում կտա», -Panorama.am-ի թղթակցի հետ զրույցում ասաց Թագուհին:

«Այս պարագայում միակ ելքը նոր երևան եկած հանգամանքի ի հայտ բերելն է: Եթե նյութերում եղավ այդպիսի հանգամանք, դրա համար ժամկետային սահմանափակում չկա», -հավելեց փաստաբանը` չբացառելով, որ նոր հանգամանքներ, այնուամենայնիվ, կլինեն:

Նշենք, որ ՀՀ Քրեական դատավարության օրենսգրքի համաձայն, նոր երևան եկած կամ նոր հանգամանքներով վերաքննիչ և վճռաբեկ դատարանների դատական ակտերը վերանայում է Վճռաբեկ դատարանը` ներկայացված բողոքի հիման վրա:

Կարդացեք նաև`

Քշվածները. Դատավորի ներքին համոզումն ու մանկատան նախկին սաների խեղված ճակատագրերը

 Ապրում էինք միմյանց ջերմությամբ. Մանկատան նախկին սանը Հայաստանի նախագահից օգնություն է խնդրում

 Ես գրություն կթողնեմ ու ինձ կգտնեք կախված. Վանաձորի մանկատան նախկին սանը` կառավարության առաջ (տեսանյութ)