Ձեր վստահելի աղբյուրը

Երևանի Մ. Հերացու անվան պետական բժշկական համալսարանում այսօր մեկնարկել է «Կաթվածի բուժումը» գիտաժողովը, որի նպատակն է միջազգային առաջատար փորձի ներդրումով Հայաստանում կիրառել գլխուղեղի բոլոր անոթային հիվանդությունների բուժման ժամանակակից մեթոդները:

Ինչպես հայտնում են ՀՀ առողջապահության նախարարության լրատվական ծառայությունից, երեք տարի առաջ մեր հայրենակից, Ջորջիայի նյարդավիրաբուժության ինստիտուտի ընդհանուր և անոթային նյարդավիրաբուժության մասնագետ, Մերսերի համալսարանի նյարդավիրաբուժության ամբիոնի դոցենտ Արթուր Գրիգորյանի, Վարուժան Կոստանյանի, ինչպես նաև ամերիկացի գործընկերների աջակցությամբ Երևանի պետական բժշկական համալսարանի «Հերացի» հիվանդանոցային համալիրում հիմնադրվել է անոթային նյարդավիրաբուժության մասնագիտացված կենտրոն` հագեցված ժամանակակից սարքավորումներով և արտերկրում վերապատրաստված մասնագետներով:

Ողջունելով գիտաժոողովի մասնակիցներին առողջապահության նախարար, պրոֆեսոր Դերենիկ Դումանյանն ասել է.

«Պետք է արժանին մատուցել թե նախաձեռնողներին, թե մեր մասնագետներին, ի դեմս կլինիկայի ղեկավար, Երևանի պետական բժշկական համալսարանի նյարդավիրաբուժության ամբիոնի վարիչ, պրոֆեսոր Ռուբեն Ֆանարջյանին ու նրա թիմին, և փաստել, որ անցած երեք տարիների ընթացքում գլխուղեղի արյունազեղումներով հիվանդներն այստեղ բավական արդյունավետ բուժում են ստանում։ Սակայն միաժամանակ պետք է նշել, որ այլ տեսակի կաթվածներով սակավաթիվ հիվանդներ են բուժվում։ Դա պայմանավորված է ազգաբնակչության ոչ բավարար իրազեկվածությամբ, քանի որ գլխուղեղի կաթվածների բուժումն արդյունավետ է, եթե այն սկսվում է դրանց առաջացման պահից սկսած առավելագույնը 4,5 ժամերի ընթացքում։ Որոշակի խոչընդոտ էր նաև մեր բժիշկների լրացուցիչ մասնագիտացման և փորձառության անհրաժեշտությունը, ինչպես նաև Հայաստանում անհրաժեշտ դեղերի բացակայությունը։ Ինչ վերաբերում է դեղամիջոցներին, ապա պետք է նշեմ, որ դրանք արդեն Հայաստանում գրացվել են և հասանելի են օգտագործման համար:

Դուք հրաշալի գիտեք, որ գլխուղեղի կաթվածներն ամբողջ աշխարհում մահացության և հաշմանդամության հիմնական պատճառներից են: Վերջին տասնամյակները նշանավորվեցին համաշխարհային բժշկագիտության և մասնավորապես կաթվածների բուժման ոլորտում զգալի հաջողություններով: Նշված զարգացումը թույլ տվեց զարգացած երկրներում նվազեցնել կաթվածներից մահացությունը ՝ հասցնելով այն 20%-ի, ինչպես նաև զգալի նվազեցնել հաշմանդամությունը: Մինչդեռ ՀՀ-ում տարեկան արձանագրվող հինգ հազարից ավելի գլխուղեղի կաթվածներով հիվանդների շուրջ 50%-ի մոտ, ցավոք, հիվանդությունն ավարտվում է մահվան ելքով: Հետևաբար միջազգային այդ փորձը Հայաստանում ներդնելը պարզապես կենսական անհրաժեշտություն էր: Եւ այս գիտաժողովն առաջին հերթին կարևորվում է հենց նրանով, որ թևակոխում ենք մի նոր փուլ` նպատակ ունենալով միջազգային առաջատար փորձի ներդրումով Հայաստանում ստեղծել գլխուղեղի բոլոր անոթային հիվանդությունների մասնագիտացված տարածաշրջանային կենտրոն, որը կարող է սպասարկել ինչպես Հայաստանի, այնպես էլ հարևան երկրների ազգաբնակչությանը: Այս ոչ դյուրին ուղին հաղթահարելու գործին կրկին աջակցելու պատրաստակամություն են հայտնել միջազգային ճանաչում ունեցող, ներկայումս ԱՄՆ-ի ու Կանադայի առաջաատար բժշկական հաստատություններում աշխատող ամերիկահայ մեր գործընկերները։ Նրանք այսօր մեզ հետ են, որպեսզի իրենց հարուստ փորձը կիսեն Հայաստանի բժիշկների հետ:

Որպես Հայաստանի Հանրապետության առողջապահության նախարար ես չափազանց բարձր եմ գնահատում մեր հայրենակիցներից յուրաքանչյուրի ջանքերը մայր Հայաստանի և ազատագրված Արցախի առողջապահական համակարգերի բարելավման, դրանց առանձին ճյուղերի ու բուժիմնարկների շարունակական զարգացման, ինչպես նաև բժիշկների վերապատրաստման ուղղությամբ։ Անկախ այն բանից, դրանք առանձին որևէ մեկի նախաձեռնությունն են, թե միասնական, համակարգված ծրագրեր։ Նախարարությունը մշտապես նրանց կողքին է, ում համար մայր հայրենիքի առողջապահության համակարգի հզորացումը լուրջ նպատակ է։ Մենք շարունակելու ենք հնարավորինս սատար կանգնել ձեր բոլոր այդ նախաձեռնություններին»:

Նախարարը վստահություն է հայտնել, որ այս գիտաժողովը լուրջ խթան կհանդիսանա գլխուղեղի կաթվածների բուժման գոյություն ունեցող ժամանակակից նորամուծությունները և գիտական նվաճումները մեր երկրում, մասնավորապես, ԵՊԲՀ-ի նյարդավիրաբուժության կենտրոնում ներդնելու, ինչպես նաև մասնագետների վերապատրաստման գործում։