Ձեր վստահելի աղբյուրը

«Հակոբ Ինջիղուլյանը գիշերային պայմաններում մոլորվել և հայտնվել է Ադրբեջանի տարածքում: Մենք համապատասխան միջոցներ ենք ձեռնարկել նրան հետ վերադարձնելու ուղղությամբ, սակայն դրա հիմնական խոչընդոտ է հանդիսանում պետական կապի բացակայությունը Ադրբեջանի ղեկավարության հետ»,- այսօր ԵՊՀ-ում ուսանողների և պրոֆեսորա-դասախոսական անձնակազմի հետ հանդիպման ժամանակ անդրադառնալով Ադրբեջանում գերեվարված հայ զինվորի ճակատագրին, ասաց ՀՀ պաշտպանության նախարար Սեյրան Օհանյանը:

Նա նշեց, թե հայ զինծառայողին Հայաստան վերադարձնելու գործընթացը իրականացվում է միջնորդավորված միջազգային կազմակերպությունների օգնությամբ, սակայն նրանց քայլերի դանդաղ ընթացքը, նախարարի խոսքով, պայմանավորված է եղել նրանով, որ Ադրբեջանում տեղակայված «Կարմիր խաչի» միջազգային կազմակերպության անդամները հնարավորություն չեն ունեցել անմիջապես հանդիպել Հակոբ Ինջիղուլյանի հետ:

«Սակայն հանդիպումից հետո բոլոր կապի միջոցներն ու նամակագրությունը մինչև այսօր իրականացվում է: Այսօր էլ պայքարում ենք, որ նա հետ վերադառնա Հայաստան: Ադրբեջանի ղեկավարությունն ասում է, որ նա ցանկանում է երրորդ երկիր գնալ: Մեր կողմից հետևյալ հայտարարությունն եմ արել, որ Հակոբի նկատմամբ իրավական հետապնդում երբեք չի լինի, քանի որ նա մոլորվել է: Երբևիցե ՀՀ զինված ուժերի պատմության մեջ չի եղել, որ Ադրբեջանի տարածք մոլորությամբ հայտնված զինծառայողը իրավական հետապնդման ենթարկվի և դատվի: Ես չէի ցանկանա, որպեսզի որևէ մեկը լիներ Հակոբի տեղը և գերեվարման մեջ ընկներ: Մինչև օրս էլ չգիտենք, թե ինչպիսի ճնշումների տակ է նա: Բայց մոտավորապես պատկերացնում ենք, թե ինչ ճնշումներ կարող են գործադրվել նրա նկատմամբ: Այդ ճնշումների տակ ադրբեջական հեռուստատեսությամբ ցուցադրված նրա տարբեր արտահայտությունները, քննադատությունները մեր զինված ուժերի նկատմամբ պետք է ընդունել նորմալ երևույթ: Քանի որ նրա ծնողների էլ ասում են, որ ինքը ոչ մի բողոք չի ունեցել բանակի վերաբերյալ»,- ընդգծեց Սեյրան Օհանյանը: