Ձեր վստահելի աղբյուրը

«Սիրիայում և Մերձավոր Արևելքում տեղի ունեցող դրական և բացասական երևույթները իրենց ազդեցությունն են ունենում Կովկասյան տարածաշրջանի վրա: Այս պահին Եգիպտոս գրեթե չկա, Լիբիան մասնատված է, բացի այդ, մասնատման գործընթացներ են նկատվում նաև Թուրքիայում»,-այսօր Մոսկվա-Թբիլիսի-Երևան տեսակամրջի ընթացքում անդրադառնալով Մերձավոր Արևելքում և Սիրիայում ստեղծված իրավիճակին, ասաց Նորագույն պետությունների միջազգային ինստիտուտի «Մերձավոր Արևելք-Կովկաս» հետազոտական կենտրոնի տնօրեն Ստանիսլավ Տարասովը: Նա նշեց, որ իրավիճակը Մերձավոր Արևելքում շարունակվում է լարված մնալ և անհրաժեշտ է հետևել այնտեղ տեղի ունեցող իրադարձություններին:

Անդրադառնալով Սիրիայում ստեղծված իրավիճակին և դրա հնարավոր ազդեցությանը Հայաստանի և Հարավային Կովկասի վրա ԳԱԱ արևելագիտության ինստիտուտի տնօրեն Ռուբեն Սաֆրաստյանը նշեց, որ Սիրիայում իրավիճակի հանգուցալուծը դեռևս չի երևում և գոյություն ունի Սիրիա արտաքին ներխուժման իրական վտանգ: «Թուրքիան հնարավոր է ներխուժի Սիրիա, քանի որ այդ երկիրը սիրիական ճգնաժամի հենց սկզբից ակտիվորեն աջակցել է ահաբեկիչներին, սիրիացի գրոհայիններին և ամեն կերպ աջակցել է Սիրիայի ընդդիմությանը»,-նշեց Սաֆրաստյանը:

Նրա խոսքերով, Թուրքիային Սիրիա ներխուժելուց հեռու է պահել թուրքական գեներալիտետը, սակայն ներխուժման վտանգը շարունակում է ակտուալ մնալ, քանի որ թուրք-սիրիական սահմանին տեղակայված է մեծ քանակությամբ հարձակողական զենքեր: «Այս պահին Թուրքիայում նկատվում է նաև ինքնագիտակցության ճգնաժամ, ինչի վրա ազդեցություն թողեց նաև Ստամբուլում վերջերս տեղի ունեցած բողոքի ցույցերը»,-ասաց նա:

Ռ. Սաֆրաստյանը նշեց, որ այսօր Հայաստանում գտնվում է 7.000 սիրիահայ և սիրիահայ համայնքը, այդ թվում Հալեպի հայ համայնքը գտնվում է մեծ վտանգի առջև: «Թուրքական ներխուժման դեպքում Հալեպի հայ համայնքը մեծ վնասներ կկրի և հայ համայնքը ստիպված կլինի լքել քաղաքը»,-ասաց Սաֆրաստյանը:

Թբիլիսիից տեսակամրջի մասնակից քաղաքագետ Գելա Վասաձեն անդրադառնալով սիրիական ճգնաժամին նշեց, որ այսօր Թուրքիան ցանկանում է իր ազդեցությունը վերականգնել Օսմանյան կայսրության տարածքների վրա և Էրդողանը պանթուրքական արտաքին քաղաքական վեկտորը վերափոխել է նեօսմանական վեկտորի: «ՄԱԿ-ի բանաձևը սիրիական քիմիական զենքի օգտագործման հետ կապված կաշխատի և իմ կարծիքով, այլևս ոչ ոք չի ցանկանա քիմիական զենք կիրառել: Իսկ Ասադի տապալումը կարող է Սիրիայի բնակչության 20%-ը դնել ֆիզիկական ոչնչացման վտանգի առջև»,-ասաց Վասաձե: