Ձեր վստահելի աղբյուրը

Հայաստանի նախագահին առընթեր Հանրային խորհրդի երիտասարդական ենթահանձնաժողովը շարունակելու է հետևողական լինել և օգնել բոլոր այն ուսանողներին, ովքեր ուսման վարձերի թանկացման հետևանքով խնդիրներ կունենան: «Թեև չհաջողվեց այնպես անել, որ վարձերը չթանկանան, այնուամենայնիվ, ենթահանձնաժողովը փորձելու է արդեն անհատապես օգնել վարձերի վճարման հետ խնդիրներ ունեցողներին»,- Panorama.am-ի թղթակցի հետ զրույցում վստահեցրեց Հանրային Խորհրդի Երիտասարդական ենթահանձնաժողովի նախագահ Հռիփսիմե Մարգարյանը:

Նա ընդգծեց, որ պետք է հետևողական լինել նաև, որ սոցիալական փաթեթների, արտոնությունների վերաբերյալ կրթության և գիտության նախարարի ներկայացրած կետերը գործեն: «Մենք հիմա աշխատելու ենք համալսարանների առաջին կուրսեցիների հետ: Մինչ այդ նամակով հանդես եկանք, նախարարի հետ հանդիպեցինք, մեր խնդրանքը, որ վարձերը չթանկանան չկատարվեց: Հիմա մեր հաջորդ քայլն այն է, որ մնում է հետևել, որ բոլոր ուսանողներն, ովքեր խնդիրներ կունենան, լուծվեն: Կարևոր է, որ բոլոր կարիք ունեցողները կարողանան օգտվել այդ արտոնություններից»,- ասաց նա:

Կան ուսանողներ, ովքեր փաստաթղթերով սոցիալական անապահովության որևէ կարգ չունեն, սակայն փաստացի ի վիճակի չեն մեծ գումար վճարել ուսման համար:

Հարցին, թե նրանց խնդիրներն ինչպե՞ս պետք է լուծվեն, Հռիփսիմե Մարգարյանը պատասխանեց, որ նրանց օգնելու հնարավորություն ևս կա: «Այս դեպքում խոսքը միջին խավի ուսանողների մասին է: Ներկայացվելու է ծնողների աշխատավարձի միջին չափը, և նրանք ցածր տոկոսներով ուսանողական վարկերից օգտվելու հնարավորություն են ստանալու: Մենք սպասեցինք, որ գոնե մեկ ամիս անցնի, հիմա արդեն բուհերում կհետևենք, թե առանձին ուսանողների խնդիրները լուծման ինչ ընթացք ունեն: Մենք կփորձենք հարցի լուծում տալ նաև ուսխորհուրդների հետ: Այն, որ հետևողական ենք լինելու, հաստատ է: Փորձելու ենք արդեն առանձին- առանձին օգնել բոլոր ուսանողներին»,- եզրափակեց ՀԽ Երիտասարդական ենթահանձնաժողովի նախագահը:

Նախորդող հրապարակումներ`

Հանրային խորհրդի անդամները խոստացել են պայքարել ուսման վարձերի թանկացման դեմ

Աշոտյան. Բուհերը վարձավճարների բարձրացման քայլին գնացել են պարտադրված