Ձեր վստահելի աղբյուրը

 Նախօրեին Դաշնակցության Սյունիքի մարզային կոմիտեն հանդես եկավ հայտարարությամբ` ընտրողներին կոչ անելով չմասնակցել թիվ 38 ընտրատարածքում սեպտեմբերի 29-ին անցկացվելիք Ազգային ժողովի պատգամավորի լրացուցիչ ընտրություններին:

Կոմիտեն նաև հայտարարեց , որ «ընտրության արդյունքը չլեգիտիմացնելու» համար որևէ կերպ չի ներգրավվելու ընտրական գործընթացում` առաջադրված ոչ իշխանական թեկնածուներին առաջարկելով ինքնաբացարկ հայտարարել, «զերծ մնալ իշխանության ծրագրած ընտրական ֆարսին մասնակցելուց և թվացյալ մրցակցություն ստեղծելուց»:

Նշենք, որ ԱԺ պատգամավոր Վահե Հակոբյանի մարզպետ նշանակվելուց հետո թիվ 38 ընտրատարածքում թափուր մնացած մանդատի համար պայքարում է երեք թեկնածու՝ իշխող Հանրապետական կուսակցության կողմից առաջադրված Արմեն Կարապետյանը, ընդդիմադիր «Ժառանգություն» կուսակցության կողմից առաջադրված Սամվել Հայրապետյանը և ինքնաառաջադրված «Կապանի հաշվապահական հաշվառման գրասենյակ» ընկերության տնօրեն Վահրամ Հովհաննիսյանը:

Այնուհանդերձ` ինչո՞ւ իրեն ընդդիմություն հայտարարող ՀՅԴ-ն նպատակահարմար չհամարեց սատարել մեկ այլ ընդդիմադիր քաղաքական ուժի `«Ժառանգության ներկայացուցչին, այն դեպքում, երբ ՀԱԿ-ը հայտարարել է, որ ընտրություններում սատարելու է Սամվել Հայրապետյանին:

Այս ամենի վերաբերյալ panorama.am-ը զրուցեց «Ժառանգություն» կուսակցության փոխնախագահը Արմեն Մարտիրոսյանի հետ:

Վերջինս կարծիքով, իշխանություններին, ընդհակառակը, ձեռնտու է ՀՅԴ որդեգրած գործելաոճը:

«Այս հայտարարության հիմքում ընկած տրամաբանությունը, եթե տարածենք 2012 թ կայացած ԱԺ ընտրությունների վրա, իսկ Սյունիքում կայնալիք ընտրությունները ԱԺ թափուր տեղի ընտրություններ են, ապա ստացվում է որ և՛ ՀՅԴ-ն և՛ «Ժառանգությունը» և՛ ՀԱԿ-ը պետք է իրենց մանդատները վայր դնեն, որովհետև այդ մեկ տասնյակից ավելի մանդատները ընդհանուր համապատկերում ոչինչ չեն փոխում և իշխանությունների բոլոր որոշումները անխտիր ընդունվում են: Այս տրամաբանությամբ ՀՅԴ խորհրդարանում իր ներկայությամբ լեգիտիմացնում է խայտառակ կեղծիքներով անցած 2012 թ խորհրդարանական ընտրությունները: Ես չեմ կիսում ՀՅԴ նման դիրքորոշումն ու գործելաոճը:

Մյուս կողմից` չմասնակցությունը, դեռ չի նշանակում բոյկոտ: Բոյկոտը դա ավելի ակտիվ քաղաքական աշխատանք պահանջող գործընթաց է, քան չմասնակցությունը, որովհետև, բոյկոտի ժամանակ դու պետք է կարողանաս համոզել որքան հնարավոր է շատ քաղաքացիների, որպեսզի նրանք չմասնակցեն ընտրություններին: 2005 թ մենք Սահմանադրական փոփոխությունների հետ կապված ունեցանք իրական բոյկոտի գործընթաց, երբ ամբողջ ընդդիմությունը միավորվեց և կոչ արեց բոյկոտել Սահմանադրական բարեփոխումները: Արդյունքում մի շարք քաղաքներում և գյուղերում քաղաքացիները ընդհանրապես չմասնակցեցին գործընթացին և իշխանությունները ստպված եղան կրկին դիմել ընտրակեղծիքների: Իսկ Դաշնակցությունը ընդամենը չի մասնակցում, այլ ոչ թե բոյկոտում է: Իսկ չմասնակցությունը, ընդհակառակը լեգիտիմացնում է իշխանությունների հաղթանակը, որովհետև, վստահ լինելով սեփական հաղթանակի մեջ, իշխանություններ այլևս ստիպված չեն գնալ ընտրախախտումների և կեղծիքների ճանապարհով»,- ասաց Ա. Մարտիրոսյանը:

«Տանը կամ գրասենյակում նստելը միանշանակ բոյկոտ չէ: Եթե ընդդիմությունը խորհրդարանում ունենա գոնե մեկ մանդատ, այն պետք է օգտագործի: Պարզ է, որ որոշումների ընդունման ժամանակ մեծ ազդեցություն ընդդիմությունը չի ունենում, սակայն ժողովրդական լայն շերտերի կարծիքը խորհրդարանում հնչեցվում է»,- հավելեց բանախոսը:

Հարցի վերաբերյալ Դաշնակցության տեսակետը ներկայացնելու նպատակով մենք կապ հաստատեցինք ՀՅԴ ներկայացուցիչ Արտյուշա Շահբազյանի հետ, ով նշեց, որ ՀՅԴ-ն իր որոշման բոլոր հիմնավորումները տվել է  տարածված հայտարարության մեջ:

Ինչ վերաբերում է «Ժառանգության» թեկնածուին չսատարելու դրդապատճառներին` Ա. Շահբազյանը նախ հարց հնչեցեց առ այն, թե արդյո՞ք ունի «Ժառանգության» ներկայացուցիչը ընտրություններում հաղթելու իրական շանսեր, ապա նշեց. «Ես այստեղից չեմ կարող ասել թե ինչո՞ւ Սյունիքում որոշեցին չսատարել»:

Փորձեցինք կապ հաստատանել Դաշնակցության Սյունիքի մարզային կոմիտեի հետ: Այստեղ մեզ խնդրեցին զանգահարել մեկ ժամից, սակայն մեկ ժամ անց մեր հեռախոսազարգերը անպատասխան մնացին:

Նախորդիվ`

Թիվ 38. ՀՅԴ Սյունիքի մարզային կոմիտեն առաջարկում է «Ժառանգության» թեկնածուին ինքնաբացարկ հայտնել