Ձեր վստահելի աղբյուրը

Այսօր ավագանու «Բարև Երևան» խմբակցության ղեկավար Անահիտ Բախշյանը առաջին դասարանցիների՝ մաթեմատիկայի գիրք-տետրերով ապահովված չլինելու խնդրով ծնողների ահազանգի հիման վրա նամակ-հարցում է ուղարկել ՀՀ ԿԳ նախարար Արմեն Աշոտյանին:
«Բարև Երևան» խմբակցության տարածած նամակում ասված է.

«Ծնողներն ահազանգում են այն մասին, որ առաջին դասարանում սովորող իրենց երեխաների դասարանում ոչ բոլորն են ապահովվել մաթեմատիկայի նոր գիրք-տետրերով, այլ երեխաներին տրվել են անցյալ տարվա արդեն օգտագործված գիրք-տետրերը, որոնց վրա գրված է՝ վերադարձման ենթական չէ: Ծնողներին խորհուրդ է տրվել կամ օգտագործված գրքերում գրվածները ջնջել, կամ գրախանութներից 1500 դրամով գնել նորն այն դեպքում, երբ պետությունը տարրական դպրոցի դասագրքերը տրամադրում է անվճար: Ի դեպ «Facebook» սոցիալական ցանցով այս մասին գրել են նաև Ձեզ:

Պարզվեց, որ այս անթույլատրելի երևույթը համատարած է: Ո՞վ է համարձակվել խեղաթյուրել պետության այս պարտականությունը և ծնողին առաջարկել դասագիրքը գրախանութից գնել այն դեպքում, երբ հրատարակիչներն ու տպարանները իրավունք չունեն տարվա այս ժամանակահատվածում վաճառքի հանել դասագրքերը: Նրանք դասագրքերն իրավունք ունեն վաճառելու միայն հոկտեմբերին, երբ դպրոցներում դրանց բաշխումն արդեն համարվում է ավարտված և վաճառքի հանված դասագրքերի շապիկը պետք է տարբեր լինի դպրոցին տրամադրվածից:

Խնդրում եմ պարզաբանել, թե.

1. պետբյուջեից հատկացվե՞լ է արդյոք տարրական դասարանների դասագրքերի տպագրման համար նախատեսված գումարը և որքա՞ն,
2. տպագրված դասագրքերի քանակը համապատասխանո՞մ է արդյոք դպրոցներից ստացված պատվերների քանակին,
3. մասնավորապես, առաջին դասարանի մաթեմատիկայի քանի՞ դասագիրք է տպագրվել և ինչո՞ւ դպրոցներում առաջին դասարանցիներն ապահովված չեն հատկապես մաթեմատիկայի դասագրքերով,
4. ընդհանրապես դպրոցներում աշակերտներն ապահովվա՞ծ են դասագրքերով:
Շնորհակալություն համագործակցության համար»: