ԿԳՆ-ն արձագանքում է Անահիտ Բախշյանի` Արմեն Աշոտյանին ուղղված հրապարակային հարցմանը

Կրթություն, գիտություն 18:48 20/09/2013

ԿԳՆ-ն արձագանքում է Անահիտ Բախշյանի` Արմեն Աշոտյանին ուղղված հրապարակային հարցմանը

ՀՀ ԿԳՆ-ն արձագանքում է «Բարև Երևան» խմբակցության ղեկավար, ՀՀ կրթության և գիտության նախարարության կրթության ազգային ինստիտուտի փոխտնօրեն Անահիտ Բախշյանի` ՀՀ կրթության և գիտության նախարար Արմեն Աշոտյանին ուղղված հրապարակային հարցմանը՝ առաջին դասարանցիների «Մաթեմատիկայի» դասագրքերով ապահովված չլինելու վերաբերյալ:

ԿԳՆ-ից տեղեկացնում են, որ 2013-2014 ուսումնական տարվա համար 1-ին դասարանցիների «Մաթեմատիկա»" 1 /1 մաս/ դասագրքի տպագրության հայտը ձևավորվել է ըստ Երևանի քաղաքապետարանից և մարզպետարաններից ստացված հայտերի: Պատվիրվել է «Մաթեմատիկա» 1 /1 մաս/ 35875 հատ դասագիրք, որի գումարը կազմել է 48194,00 դրամ: Տպագրված դասագրքերի քանակը համապատասխանում է դպրոցներից ստացված պատվերների ընդհանուր քանակին:

1-ին դասարանցիների «Այբբենարանն» ու «Մաթեմատիկա» 1 /1 մաս/ դասագրքերը աշակերտներին տրվում են որպես նվեր, ուստի այդ գրքերը երեխաների կողմից դպրոցին ետ չեն վերադարձվում և տպագրվում են ամեն տարի:

ԿԳՆ-ից հայտնում են, որ մինչև այսօր հանրապետության որևէ դպրոցից ԿԳ նախարարությունը ոչ նշված, ոչ էլ որևէ այլ դասագրքի պակաս քանակի վերաբերյալ ահազանգ չի ստացել: Եթե բաշխման ժամանակ առաջացել են խնդիրներ, այսինքն դպրոցներում կանխատեսումներից ավել կամ պակաս աշակերտներ են ընդունվել, ինչից էլ հնարավոր է առաջացած լինեն տիկին Բախշյանի հարցադրումները, ապա նման դեպքերում ընդամենը անհրաժեշտ է դիմել ՀՀ կրթության և գիտության նախարարությանը կամ մարզային կրթության վարչությանը և հարցը լուծում կստանա:

Ինչ վերաբերում է հրատարակիչների կողմից տրամադրվող և գրախանութներում, տարբեր վաճառակետերում վաճառելու հարցին, ապա դրանց համար սահմանված ժամկետներ չկան, պարզապես դրանց վրա պետք է բացակայի «Վաճառքի ենթակա չէ» նշագրումը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: