Եգիպտացի լրագրող. Թուրքիան սարսափ է ապրում, որ Եգիպտոսը կարող է ընդունել Հայոց ցեղասպանությունը
«Թուրքիան մեծ սարսափ է ապրում, որ Եգիպտոսը կարող է ընդունել Հայոց ցեղասպանությունը»,- ասուլիսի ժամանակ նման հայտարարություն արեց եգիպտացի մշակութային և դիվանագիտական հարցերով լրագրող Ալաա Էլդինը, ով եգիպտացի լրագրողների պատվիրակության հետ ժամանել է Երևան:
«Երբ Թուրքիայի վարչապետ Էրդողանն իր սահմանն անցավ Եգիպտոսի հանդեպ և հայտարարեց, որ Եգիպտոսում ոչ թե հեղափոխություն է, այլ հեղաշրջում, Եգիպտոսն ակնարկեց, որ կարող է ընդունել Հայոց ցեղասպանությունը: Այժմ դա համընկնում է եգիպտացի ժողովրդի ցանկությունների հետ: Էրդողանն այս հայտարարությունից հետո հանդարտվեց: Սակայն մինչ այդ հայտարարությունը եգիպտացին տեղյակ չէր Հայոց ցեղասպանության մասին, նրանք սկսեցին հետաքրքրվել: Ընդհանուր կարծիք ձևավորվեց եգիպտական հասարակության մեջ, որ պետական մակարդակով ճանաչվի Հայոց ցեղասպանությունը: Դա նաև կլինի հակաքայլ Թուրքիային»,- ասաց նա:
Լրագրող, միջազգայնագետ Հազեմ էլ Մալլահն իր հերթին նկատեց, որ Հայաստանի և Եգիպտոսի միջև բարեկամական հարաբերություններ կան, իսկ այժմ Եգիպտոսի ժողովուրդը տեղյակ է Հայոց ցեղասպանության մասին:
«Առաջիկայում, կարծում եմ, որ պետք է ճնշումները շատանան, որ Հայոց ցեղասպանությունն ընդունվի»,- ասաց նա:
Հեռուստալրագրող Մոհամեդ Մանտուրն ընդգծեց, որ կարևոր է Հայոց ցեղասպանության հարցը բարձրաձայնելը, որպեսզի հասարակությունն ավելի լավ տեղեկանա դրա մասին:
«Կարծում եմ, որ նախքան որևէ կառավարություն որոշում ընդունի, ժողովուրդը պետք է տեղյակ լինի այդ հարցի մասին: Ինչ վերաբերում է պաշտոնական կարծիքին, դրան անդրադառնում են դիվանագետները, մենք պատասխանատվություն վերցրեցինք, որ հասարակությանն ավելի լավ ծանոթացնենք Հայոց ցեղասպանությանը: Մի շարք փաստաբաններ, համագործակցելով հայ համայնքի հետ, դիմել են արդարադատությանը, որպեսզի ընդունվի և ճանաչվի Հայոց ցեղասպանությունը: Ես կարծում եմ՝ ժամանակն է, որ Եգիպտոսի ժողովրդին ներկայացվի խնդիրը, որպեսզի ավելի ռեալ քայլերը դեպի առաջ հնարավոր լինեն:
Անդրադառնալով Լեռնային Ղարաբաղի խնդրին, լրագրողները նկատեցին, որ դրան Եգիպտոսը կարող է անդրադառնալ, երբ երկրում կայություն հաստատվի:
«Պաշտոնական Եգիպտոսը շեշտում է, որ այդ հարցը պետք է կարգավորվի միջազգային օրենքների շրջանակներում: Պետք է խաղաղ ճանապարհով որոշում լինի»,- ասաց ազատ լրագրող Ահմէդ էլ Ֆարրան:
Լրահոս
Տեսանյութեր
Մենք Թումանյանին այնքան էլ լավ չգիտենք. Թանգարանի տնօրեն
