Ձեր վստահելի աղբյուրը

Սուրբ Աթոռում ՀՀ դեսպանության բացման արարողությանը մասնակցած Տեր Մեսրոպ քահանա Արամյանը Երևան է վերադառնում վառ տպավորություններով. «Ամեն բան շատ բարձր մակարդակով էր կազմակերպված: Այն մեկնարկեց մարդկության պատմության մեծագույն սրբերից մեկի` Գրիգոր Լուսավորչին նվիրված հարգանքի տուրքով: Սուրբ աթոռում` Վատիկանում ՀՀ դեսպանության բացումը շատ կարևոր է, իսկ սկիզբը` խոստումնալից»,- Panorama.am-ի թղթակցի հետ բացառիկ հարցազրույցում տպավորությունների մասին պատմեց դեռևս Իտալիայում գտնվող Տեր Մեսրոպը:

Հիշեցնենք, Հռոմի Պալացո դե լա Կանչելերիա սրահներում երեկ տեղի է ունեցել Սուրբ Աթոռում ՀՀ դեսպանության բացման և ՀՀ անկախության 22-րդ տարեդարձի կապակցությամբ ընդունելություն, ինչպես նաև «Սուրբ Գրիգոր Լուսավորիչ. քրիստոնեության ընդհանուր ժառանգություն» ցուցահանդեսի բացումը։


Վատիկանում ՀՀ դեսպանի կողմից տրված ընդունելությանը ներկա են եղել Սուրբ Աթոռի Արևելյան եկեղեցիների միաբանության ղեկավար և Արևելյան պապական խորհրդի նախագահ Կարդինալ Լեոնարդո Սանդրին, Սուրբ Աթոռի Պետությունների հետ հարաբերությունների հարցերով քարտուղար արքեպիսկոպոս Դոմինիկ Մամբերտին, Հայ առաքելական եկեղեցու հոգևորականներ, Հայ կաթոլիկ եկեղեցու ներկայացուցիչներ, Վատիկանի բարձրաստիճան հոգևորականներ, Հայաստանի և Իտալիայի խորհրդարանների անդամներ, Վատիկանում հավատարմագրված դեսպաններ, եվրոպական և իտալական հասարակական կազմակերպությունների ղեկավարներ, գործարարներ, հայ համայնքի ներկայացուցիչներ: 





Տեր Մեսրոպի խոսքով, Սուրբ Աթոռում ՀՀ դեսպանության բացումը շատ կարևոր է, իսկ սկիզբը նա գնահատում է խոստումնալից:

«Կաթոլիկ աշխարհի հոգևոր կենտրոնում մեզ համար` որպես քրիստոնեական երկրի, շատ կարևոր նշանակություն ունի այնտեղ ունենալ մեր ներկայացուցիչները, որովհետև նրանց ազդեցությունը աշխարհում շատ պրոցեսների վրա բավականին մեծ է, և էլ չեմ ասում, որ քրիստոնեական համերաշխության` միասին քայլեր կատարելու համատեքստում ամենակարևորը Վատիկանի հետ դիվանագիտական հարաբերությունների հաստատումն է: Սա շատ կարևոր քայլ էր»,-ասաց Տեր Մեսրոպ քահանան:
Նա կարևորեց Գրիգոր Լուսավորչին նվիրված ցուցահանդեսի բացումը: 

«Ինչպես գիտենք, նա համաքրիստոնեական մեծագույն սրբերից մեկն է, ճանաչված բոլոր քրիստոնյաների կողմից, շատ սիրված նաև կաթոլիկ աշխարհում, իր կյանքի ճանապարհը, պատմությունը, իսկապես, շատ ցնցող է, և ցուցահանդեսն էլ շատ գեղեցիկ էր կազմակերպված, կարծում եմ, բոլորը ստացան մեծագույն տպավորություն և բավականություն»,-ասաց քահանան:

Տեր Մեսրոպը հավատացած է, որ եթե որևէ գործի մեջ հոգևորը չի ներդրվում, ապա ցանկացած ձեռքբերում ունայնություն է: «Թե դիվանգիտական լեզվով իմ ասած հոգևոր փիլիսոփայական արտահայտությունը ինչպես կթարգմանվի չեմ կարող ասել, բայց սկիզբը շատ լավ էր»,-ասաց նա:



ԱԳՆ մամուլի և տեղեկատվության վարչության հաղորդմամբ, ընդունելությանը ողջույնի խոսքով հանդես էր եկել ԱԳ նախարար Էդվարդ Նալբանդյանը, ով նշել է.

«Մեծապես խորհրդանշական օր է այսօր: Հայաստանը` հանդիսանալով քրիստոնեությունը պետական կրոն հռչակած առաջին երկիրը, դիվանագիտական ներկայացուցչություն է բացում Սուրբ Աթոռում: Երկար տարիներ համատեղության կարգով լինելով Վատիկանում Հայաստանի Հանրապետության ոչ ռեզիդենտ դեսպան` մշտապես մտորել եմ այն օրվա մասին, երբ մեր երկու պետությունները դիվանագիտական ներկայացուցչություններ կբացեն և ռեզիդենտ դեսպաններ կնշանակեն` Երևանում և Վատիկանում: Այսօր մենք շարժվում ենք այդ ճանապարհով։ 

Շնորհավորելով մեզ բոլորիս այս կապակցությամբ՝ հաջողություններ եմ մաղթում դեսպան Միքայել Մինասյանին` Հայաստանի և Սուրբ Աթոռի միջև հարաբերությունների խորացմանը և ամրապնդմանն ի նպաստ իր առաքելության իրականացման գործում: Մեր փոխհարաբերությունները պատմական խորը արմատներ ունեն: Քրիստոնեական հավատքը դարձել է այդ առանձնահատուկ կապերի հիմքը: Հարաբերությունների ամրապնդման գործում իրենց նպաստն են բերել այնպիսի մեծանուն գործիչներ, ինչպիսիք են` Սուրբ Ներսես Շնորհալին, Մխիթար Սեբաստացին և շատ այլ երախտավորներ: 

Միանգամայն խորհրդանշական է, որ Հայաստանի Հանրապետության դիվանագիտական ներկայացուցչության պաշտոնական բացումը համընկնում է մեր երկրի Ազգային տոնի տարեդարձի հետ: Հայաստանի անկախության վերականգնմամբ, երկու տասնամյակ է, որ մեր երկրի և Սուրբ Աթոռի միջև համագործակցությունը նոր թափ է ստացել։ 



Այս տարվա մարտին Հայաստանի Հանրապետության Նախագահ Սերժ Սարգսյանը և Ամենայն Հայոց Կաթողիկոս Գարեգին Երկրորդը ներկա գտնվեցին Ֆրանցիսկոս Պապի գահակալության հանդիսավոր պատարագին: Մոտ մեկ տարի դրանից առաջ ` 2011թ. դեկտեմբերին Նախագահ Սերժ Սարգսյանն այցելեց Սուրբ Աթոռ և հանդիպեց Բենեդիկտոս XVI Պապի հետ: Անմոռանալի հիշողություններ ենք պահպանում 2001թ. Հովհաննես-Պողոս II Պապի` մեր երկիր կատարած պատմական այցից, որը տեղի ունեցավ Հայաստանում քրիտոնեությունը պետական կրոն հռչակելու 1700-ամյակի կապակցությամբ՝ ի նշան Հայաստանի և Վատիկանի միջև բարեկամական կապերի և մեր երկու եկեղեցիների եղբայրական հարաբերությունների։ Հայաստանը բարձր է գնահատում 2000թ.-ին Հայոց ցեղասպանության ճանաչումը Սուրբ Աթոռի կողմից, որը վերահաստատվեց նաև 2001թ.-ին:

Մենք հուզմունքով ենք հիշում Երևանում Հովհաննես-Պողոս II Պապի այցելությունը Հայոց ցեղասպանության հուշահամալիր և «Ավե Մարիա»-ի հուզառատ կատարումը աշխարհում ամենահռչակավոր հայի՝ Շառլ Ազնավուրի կողմից: Ես շատ ուրախ եմ, որ մեր թանկագին մաեստրոն մեզ հետ է նաև այսօր՝ այս արարողությանը»:
Նախարար Նալբանդյանը կարևորել է Սուրբ Աթոռի Քարտուղարության Պալատում Սուրբ Գրիգոր Լուսավորչին նվիրված ցուցահանդեսի բացումը՝ նշելով, որ Հայ առաքելական եկեղեցու հիմնադրի արձանի Սուրբ Պետրոս տաճարի արտաքին որմնախորշերից մեկում տեղադրումը 2005թ.-ին և նրա անունով մերձակա հրապարակի անվանակոչումը 2008թ.-ին կատարվել են Հովհաննես Պողոսի II պապի կողմից: 

«Հայաստանի Հանրապետության դեսպանության բացումը վկայում է Հայաստանի և Սուրբ Աթոռի միջև սերտ բարեկամական հարաբերությունների բարձր մակարդակի մասին, բայց արտացոլում է նաև այդ հարաբերություններն առավել սերտացնելու և խորացնելու մեր երկրի ցանկությունը» - ընդգծել է Հայաստանի արտաքին քաղաքական գերատեսչության ղեկավարը։ 

Վատիկանում ՀՀ դեսպանության բացման կապակցությամբ Սուրբ Աթոռի անունից ողջույնի խոսքով հանդես է եկել Արևելյան եկեղեցիների միաբանության ղեկավար և Արևելյան պապական խորհրդի նախագահ Կարդինալ Լեոնարդո Սանդրին։
Էդվարդ Նալբանդյանը երեկ այցելել է նաև Սուրբ Աթոռում Հայաստանի դեսպանատուն, ծանոթացել դեսպանության աշխատանքային պայմաններին, հանդիպել դեսպանության աշխատակիցների հետ։