Ձեր վստահելի աղբյուրը

 Ադրբեջանի իշխանությունը նոր տեղեկատվական տեխնոլոգիաները և միջազգային մասնագետներին օգտագործում է ընդդիմադիրներին հետևելու համար: Ադրբեջանական «Թուրան» լրատվական գործակալությունը հայտնում է, որ  նման հայտարարությամբ է հանդես եկել Ժողովրդավարական ուժերի ազգային խորհրդի միասնական թեկնածու Ջամիլ Հասանլին:

Նրար խոսքերով` Ադրբեջանի նախագահի աշխատակազմի տարբեր գրասենյակներում նստած մասնագետները նոր արտասահմանյան տեխնոլոգիաների միջոցով հետևում են երիտասարդների և քաղաքական ակտիվիստների էլեկտրոնային խոսակցություններին և սոցիալական ցանցերի էջերին:

«Երիտասարդների և իրենց բարեկամների կատարած գրառումների պատճառով նրանց հետապնդում են: Նախագահի աշխատակազմի հրահանգով ակտիվիստների ծնողներին և ընտանիքի այլ անդամներին ազատում են աշխատանքից: Նրանցից խլում են առևտրային օբյեկտներ և երբեմն ենթարկում են քրեական հետապնդման», - նշում է Հասանլին:

Միասնական թեկնածուն անդրադարձել է նաև Ադրբեջանում քաղբանտարկյալների թեմային` նշելով , որ նրանք երիտասարդանում են բնակչության աճի հակառակ համամասնությամբ: OTV-ի ուղիղ եթերով հեռարձակված նախագահական թեկնածուների հեռուստաբանավեճի ընթացքում տեղի ունեցած սկանդալի մասին խոսելիս Հասանլին նշել է, որ Ադրբեջանի իշխանությունն այնքան վատ վիճակում է, որ չի կարող տանել նույնիսկ հակառակորդի վեց րոպեանոց ելույթը:

Ջամիլ Հասանլին OTV-ի եթերում կատարվածն անվանել է սպասելի. «Որոշ նախագահական թեկնածուներ իշխանության կործանիչ գործունեության բաղկացուցիչ մասն են կազմում: Ըստ ռազմավարությանն` իրական ընդդիմությունը միշտ թիրախ է հանդիսացել, իսկ ընտրողները տեղյակ չեն եղել իրական դրությունից»:

Նա նաև ճիշտ չի համարել կլոր սեղանի շուրջ բանավեճ անցկացնելու ձևաչափը: Գործակալությունը նշում է, որ Հասանլին այս մասին հայտարարել է նաև ԵԱՀԿ-ի դիտորդական առաքելության հետ հանդիպման ընթացքում: Իր խոսքերով` «REAL» շարժման առաջնորդ Իլգար Մամեդովին ընտրություններին մասնակցելու և միևնույն ժամանակ Հաֆիզ Հաջիևին որպես նախագահական թեկնածու գրանցվելու արգելքի պատվիրատուները աշխատում են Ադրբեջանի նախագահի աշխատակազմում:

«Մեզ հայտնի է, թե կոնկրետ որ սենյաներում են նստած այդ պատվիրատուները: Այնտեղ, ի դեպ, Հաֆիզ Հաջիևի թեկնածության առաջադրման վերաբերյալ միասնական կարծիք չի եղել», - նկատել է Ջամիլ Հասանլին: Իր կարծիքով` Ժողովրդավարական ուժերի ազգային խորհրդի` իր նոր թեկնածուին առաջադրելու փաստը պատռեց իշխանության և նրա կողմնակիցների ընտրական քաղտեխոնոլոգիան:

Իր խոսքերով` եթե Ադրբեջանում լիներ անկախ հեռուստատեսություն, որի միջոցով մեկ ամսվա ընթացքում քարոզչություն տարվեր, ապա գործող ռեժիմը կտապալվեր. «Դա ապազգային փտած ռեժիմ է: Այդ ռեժիմը շահույթ է ստանում նույնիսկ ժողովրդի ողբերգության հաշվին»: Հասանլին կարծում է, որ ներկայիս ռեժիմը ցանկանում է Ադրբեջանը նմանեցնել Հյուսիսային Կորեային:
Ազգային խորհրդի թեկնածուն իշխող «Ենի Ադրբեջան» («Նոր Ադրբեջան») կուսակցությունն անվանել է ապազգային: Նա մամլո ասուլիսի ժամանակ հայտարարել է, որ իշխող կուսակցությունը կառավարման կոմունիստական մեթոդներ է օգտագործում և երկիրը տանում է դեպի միակուսակցականություն: Այդ կուսակցությունը հասարակության մեջ տեղ չունի: Այն կտապալվի գործող իշխանության հեռանալուն պես», - կարծում է Հասանլին:

Իր խոսքերով` ներկա պահին պայքար է ընթանում ընդդիմության և իշխանության, ազգային և ապազգային ուժերի միջև: «Այս ռեժիմը մարդկանց կաշառակերության է մատնում դեռ մինչև ծնվելը: Նույնիսկ մահանալիս մարդ գերեզմանոցում տեղի համար կաշառք է տալիս», - ասել է Հասանլին:

Հիշեցնենք, որ Ադրբեջանի նախագահական ընտրությունները կանցկացվեն 2013թ. հոկտեմբերի 9-ին:

Նախորդ նախագահական ընտրությունները կազմակերպվել էին 2008թ. հոկտեմբերի 15-ին: 2003թ. սկսած գործող նախագահ Իլհամ Ալիևն այդ պաշտոնում արդեն երկրորդ ժամկետն է անցկացնում: 2009թ. մարտին Ադրբեջանում հանրաքվե է կազմակերպվել Սահմանադրության մեջ փոփոխություններ մտցնելու նպատակով: Ըստ այդ փոփոխությունների՝ միևնույն անձը կարող է նախագահական պաշտոնը զբաղացնել ավելի քան երկու իրար հաջորդող ժամկետով: Եվրոպայի Խորհրդի Վենեցիայի հանձնաժողովն այդ կապակցությամբ ասել է. «Մեկ անձին նախագահի պաշտոնում բազմիցս ընտրվելու հնարավորություն տալը գնահատվում է որպես ժողովրդավարության զարգացման գործում մեկ քայլ հետ»: