Հարությունյան. Ցանկացած քաղաքական որոշում գին ունի, եվրոպացիները մեզ պետք է վճարեն
Արտաքին քաղաքական ցանկացած նախաձեռնություն պետք է համապատասխանի մեր ազգային անվտանգության առաջնահերթություններին: Անդրադառնալով Մաքսային միությանը Հայաստանի անդամակցության որոշմանը, լրագրողների հետ հանդիպման ժամանակ այս մասին նշեց Քրիստոնեա-դեմոկրատական կուսակցության նախագահ, ԱԺ ՀՀԿ խմբակցության անդամ Խոսրով Հարությունյանը:
«Կարծում եմ, որ շատ օրիգինալ միտք արտահայտած չեմ լինի, եթե փաստեմ, որ մեր արտաքին քաղաքական ցանկացած նախաձեռնություն նախևառաջ պետք է համապատասխանի մեր ազգային անվտանգության առաջնահերթություններին: Որևէ արտաքին քաղաքական նախաձեռնություն չի կարող վտանգել մեր ազգային անվտանգությունը, վերածվել նոր սպառնալիքների և ավտանգության նոր մարտահրավերի»,- նշեց Խոսրով Հարությունյանը:
Բանախոսի համոզմամբ` հենց հաշվի առնելով ազգային անվտանգության հարցում երկրի առջև ծառացած մարտահրավերները` Հայաստանը որոշում կայացրեց ընտրել համագործակցության Եվրասիական վեկտորը`այն է Մաքսային միության անդամակցությունը:
«ՀՀ-ի հիմնական արտաքին քաղաքականության սպառնալիքը թուրք ադրբեջանական տանդեմն է: Եվ հենց ազգային անվտանգության նկատառումներից ելնելով` երկրի ղեկավարությունը կայացրել նման որոշում»,- նշեց Խոսրով Հարությունյանը:
«Վլադիմիր Պուտինը հայտարարեց, որ փորձելու է վերականգնել ԽՍՀՄ երբեմնի ուժային կենտրոնը: Իսկ դա միայն մեկ պարագայում է լուծելու, եթե փորձեն ապահովել ազդեցությունը գոնե ԽՍՀՄ տարածքում: Դա ՌԴ-ի համար այս երկրների՝ իր հետ լինել-չլինելն էր: Ուստի ՌԴ-ն սկսեց կասկածել, որ արևելյան գործընկերության ծրագիրը նպատակ ունի տարածաշրջանում իր աշխարհագրությունը նեղացնել»,- հավելեց բանախոսը:
Սակայն, ըստ Խոսրով Հարությունյանի, անհրաժեշտ է շեշտել այն իրողությունը, որ Մաքսային միությանը Հայաստանի անդամակցությունը բխում է, թե՛ Ռուսաստանի և թե՛ Հայաստանի` անվտանգության ոլորտում ռազմավարական հետաքրքրություններից:
«Ռուսաստանը «պատրոն» չէ, մենք էլ նրա «կլիենտը» չենք: Ռուսաստանում դա պիտի հասկանան: Խոսքը գնում է ոչ միայն Հայաստանի և Արցախի անվտանգության, այլ նաև Հարավային ուղղությամբ Ռուսաստանի շահերի անվտանգության ապահովման մասին: Սա է կարևորը: Այն տեսակետը, թե Մաքսային միությանը անդամակցությունը բացարձակապես բխում է միայն Հայաստանի անվտանգության շահերից, թերի է և քաղաքական առումով կիսատ-պռատ: Մենք պետք է հասկանանք, որ այս գործընթացը, նախևառաջ, բխում էր Ռուսաստանի շահերից, այլապես պաշտոնական Մոսկվան այդչափ նախանձախնդիր վարք չէր ցուցաբերի այս հարցում»,- ասաց Խոսրով Հարությունյանը:
Անդրադառնալով Ասոցացման համաձայնագրին` բանախոսը նշեց, որ թե ասոցացման համաձայնագիրը, թե խորը համապարփակ առևտրի համաձայնագիրը հետապնդում էին միայն տնտեսական նպատակներ:
«Աշխարհաքաղաքական առումով ԵՄ-ն ՀՀ-ի ձեռքերով փորձում էր դուրս մղել Ռուսաստանին տարածաշրջանից: Իրենց թվում էր, թե կունենան դիվանագիտական հաղթանակ: Բայց ռուսները միամիտ չեն»,- ասաց Խոսրով Հարությունյանը:
Այնույնուհանդերձ , ըստ ԱԺ ՀՀԿ խմբակցության անդամի, այժմ «Եվրոպայի պատուհանը» Հայաստանի համար, ոչ թե փակ է, այլ` «կիսաբաց»:
«Իսկ թե այդ պատուհանը ինչքան կբացվի ՀՀ-ի առաջ՝ պայմանավորված է ՀՀ-ով: Ցանկացած քաղաքական որոշում գին ունի, եվրոպացիները մեզ պետք է վճարեն: Ինչպես եվրոպացիներն են սիրում ասել՝ գնդակը եվրոպացիների դաշտում է: Մենք կաշխատենք, բայց որոշումները նրանք են կայացնում: Պիտի կծենք այնպիսի կտոր, որ կարողանանք կուլ տալ, եվրոպացիների հետ պետք է գնանք այս ճանապարհով: Ինձ թվում է՝ մինչև նոյեմբեր ինչ-որ մի հուշագիր մենք ԵՄ-ի հետ կստորագրենք»,- ասաց Խ. Հարությունյանը:
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
