Ձեր վստահելի աղբյուրը

Զբոսաշրջության համաշխարհային օրվա առթիվ Հայաստանի զբոսաշրջության խթանման ուղղությամբ իրականացվող քայլերի մասին Panorama.am-ը զրուցել է Հայաստանի ազգային մրցունակության հիմնադրամի գործադիր տնօրեն Արման Խաչատրյանի հետ:

-Պարոն Խաչատրյան, ի՞նչ է խորհրդանշում Զբոսաշրջության համաշխարհային օրը Հայաստանի համար: Դուք, որպես Հայաստանի զբոսաշրջության խթանման պատկան մարմնի ղեկավար, ինչպե՞ս եք տեսնում Հայաստանի դերը զբոսաշրջության համաշխարհային քարտեզում:
-Այս օրը նշանավորում է զբոսաշրջության դերը համաշխարհային հարթակում, թե ինչպես է այն ազդում աշխարհում գործող սոցիալական, մշակութային և տնտեսական արժեքային համակարգերի վրա: Հայաստանն այս առումով անմասն չի մնում այդ գործընթացներից. մեր երկրի զբոսաշրջության միջազգային վարկանիշն օրըստօրե բարձրանում է և, հաշվի առնելով ոլորտի բազմաբովանդակ բնույթը, դրանով իսկ բարձրանում է մեր երկրի միջազգային հեղինակությունը:

Զբոսաշրջությունը վաղուց արդեն չի սահմանվում՝ սոսկ որպես ճամփորդություն. այն դարձել է երկրների մարքեթինգի, ՓիԱր-ի, տնտեսության զարգացման հիմնարար հարթակը: Զբոսաշրջային արդյունքները առևտրային բնույթ են կրում, և դադարում են դառնալ միայն տվյալ երկրի բնակիչների սեփականությունը, դրանք դառնում են ավելի մեծ՝ գլոբի հիմնարար արժեքներ: Այս առումով կարող ենք հպարտորեն ասել, որ Հայաստանը արտասահմանցի զբոսաշրջիկներին առաջարկելու շատ բան ունի: Մեծ պոտենցիալը գտնվում է ոչ միայն զարգացած արդյունաբերական շրջաններում, մասնավորապես, քաղաքներում, որտեղ ծառայությունների ոլորտը բարելավված է, այլև տեղական համայնքներում՝ ծայրամասային գյուղերում: Մենք փորձում ենք օգտագործել առկա այն բոլոր հնարավորությունները, որ մեր աշխարհագրությունը, ազգային մշակույթը, ավանդույթներն ու քրիստոնեական ժառանգությունը արդեն մեզ ընձեռել է: Մենք ներդրում ենք արել այս ներուժի վրա:

Եթե ուսումնասիրեք վերջին տասը տարվա զբոսաշրջության աճի դինամիկան, ապա կտեսնեք, որ մենք դանդաղ, բայց կայուն քայլերով առաջընթաց ենք գրանցել: Այսպես, 2012 թվականին 2011 թվականի նկատմամբ արձանագրվել է ներգնա զբոսաշրջային այցելությունների երկնիշ աճ, և այդ աճը կայուն զարգանում է:

-Պարոն Խաչատրյան, Դուք նշեցիք Հայաստանի զբոսաշրջային արդյունքների միջազգային մակարդակում հանրայնացման և դրանով իսկ տնտեսական զարգացման մասին: Որո՞նք են այն մեխանիզմները, որոնց միջոցով իրականացվում են այդ քայլերը:
-Գլխավոր մեխանիզմն այն է, ինչ ընկած է նաև Հայաստանի ազգային մրցունակության հիմնադրամի գործունեության հիմքում. պետական-մասնավոր համագործակցությունը՝ տնտեսական զարգացման նորօրյա պատմության թերևս ամենագրավիչ հայտնագործությունը, գրավիչ ինչպես գործունեության սպեկտորը արագ ծավալել կամեցող մասնավոր հատվածի, այնպես էլ բեկումնային տնտեսական զարգացման պահանջ ունեցող երիտասարդ պետությունների համար: Մտածողության այս նոր կերպափոխումն է ապահովել մեր ծրագրերի արդյունավետ իրականացումը:

Մյուս՝ գործառնական, մեխանիզմները պայմանավորված են զբոսաշրջության ոլորտի առանձնահատկությամբ: Ինչպես զբոսաշրջությունն է իր ձևի և բովանդակության մեջ բազմաբնույթ, այնպես էլ զբոսաշրջության խթանումը: Եվ եթե գիտեք ձեր նպատակները, այսինքն նախանշել եք այն առավելագույնն ու նվազագույնը, որոնց պետք է հասնեք, մեխանիզմների ընտրությունն արդեն իսկ դառնում է ավելի դյուրին՝ դրանց թիրախային ու արդյունավետ լինելու տեսանկյունից:

Ըստ այդմ՝ Հայաստանի զբոսաշրջության խթանմանն ուղղված քայլերը զուգորդվում են 2 հիմնական մակարդակներում իրականացվող ծրագրերով. երկրի ներսում ենթակառուցվածքների ստեղծում ու բարելավում, ծառայությունների ոլորտի կարգաբերում և որակի բարձրացում, որը փոխլրացնում է Հայաստանի դրական իմիջի կերտմանն ուղղված քայլերին:
Կուզենայի առանձնացնել առաջին մակարդակում իրականացվող համայնքային զարգացման ծրագրերը միջազգային կազմակերպությունների, նվիրատուների և ներդրողների հետ համագործակությամբ: «Տաթևի վերածնունդը» իր համայնքային զարգացման կարևորագույն բաղադրիչով հաջողված պիլոտային այն ծրագրերից է, որը ծառայելու է որպես օրինակ մյուս տարածաշրջանների համար:

Հարկ է նաև ընդգծել համայնքային ունակությունների զարգացմանն ուղղված մեր ծրագրերի պահանջարկի մասին: Ստեղծվելիք ենթակառուցվածքները, իրականացվող ծրագրերը, ինչքան էլ լավը լինեն, չեն հաջողվի, եթե հաշվի չի առնված տեղական համատեքստը: Ըստ այդմ՝ մեր գործունեության կարևորագույն սկզբունքը ներդրվելիք լավագույն պրակտիկաների գործարկման փորձը համայնքներին հասցնելն է, նրանց այդ ունակություններով օժտելն է, որպեսզի ապահովվի համամասնական զարգացում, այնպիսի բազմաշերտ զարգացում, որն արդիականացնում է մտածողությունը, բարելավում կենսակերպը, ինչն իր հերթին բերում է ծառայությունների ու զբոսաշրջային արդյունքների առևտրայնացման որակի բարձրացմանը՝ դրանով իսկ նպաստելով զբոսաշրջության խթանման ընդհանուր առաքելությանը:
Ներքևից վերև նշված այս սկզբունքը հաջողության միակ կենսունակ պայմանն է:

-Դուք նշեցիք երկրի ներսում ներուժի զարգացմանն ուղղված քայլերի մասին, իսկ ինչպե՞ս է կազմակերպվում երկրից դուրս Հայաստանի ներկայացումը և ինչպե՞ս է զբոսաշրջիկներին գրավում մեր երկիրը:
-Թեև գրավիչ զբոսաշրջային վայր ունենալը պահանջում է զբոսաշրջային զանազան ուղղությունների ապահովում, այդուամենայնիվ, մեր փորձը ցույց է տվել, որ շատ հաճախ արտասահմանցի զբոսաշրջիկների պահանջարկը հոգևոր Հայաստանն է. մեր ազգի քրիստոնեական մշակույթի հարուստ ժառանգությունը գրավիչ է զբոսաշրջիկների համար՝ անկախ կրոնական պատկանելությունից: Եվ գոհունակությամբ կարող ենք նշել, որ եկեղեցաշինության գործընթացը վերջին շրջանում նոր թափ է ստացել, ինչը նաև գալիս է ամրապնդելու արժեքային այն համակարգը, որով մենք՝ հայերս, ապրում ենք:

Ուստի մեծ պատասխանատվություն է՝ կարողանալ պատշաճ կերպով հասցեագրել այդ արժեքները միջազգային շուկաներում, հատկապես հաշվի առնելով վերը նշված այն փաստը, որ զբոսաշրջային արդյունքների իրացման հարթակները վաղուց դադարել են լինելու միայն զբոսաշրջությանը, դրանք նաև երկիրը ներկայացնելու և թշնամական քարոզչությանը հակազդելու, երկրի միջազգային հեղինակության համար մրցութի հարթակներ են:

Ահա այդ առաքելությամբ էլ իրականացվում են Հայաստանի, նաև Արցախի ճանաչելիության մակարդակի բարձրացմանն ու զբոսաշրջության խթանմանն ուղղված ծրագրերը միջազգային ցուցահանդեսներին պատշաճ մասնակցությամբ, ճանաչողական այցերի և ներգնա զբոսաշրջության համար թիրախային համարվող երկրներից առաջատար ԶԼՄ-ների լրագրողական այցերի կազմակերպմամբ, բարձր վարկանիշ ունեցող լրատվական հարթակներում հրապարակումների ապահովմամբ, գովազդային-տեղեկատվական արշավների կազմակերպմամբ, հայկական պատմամշակութային և քրիստոնեական ժառանգությունը ցուցադրող բազմալեզու գովազդային տեղեկատվական նյութերի միջազգային հանրությանը հասանելի լեզվով ներկայացմամբ ու տարածմամբ և այլն:

Արագ փոփոխվող տեղեկատվական այն աշխարհը, որում մենք ապրում ենք, նոր պատուհաններ է բացել մեզ համար, և ազգային համատեքստի՝ ժամանակին համընթաց քայլելը մեր երկրին կբերի ավելի մրցունակ դիրքերի: Զբոսաշրջության խթանումն այդ քայլերթի փորձադաշտերից մեկն է. դրա համար ամենայն պատասխանատվությամբ ենք վերաբերվում մեզ վստահված գործին: