Ձեր վստահելի աղբյուրը

Քիչ առաջ Ազգային Ժողովում ավարտվեց ՀՀ գլխավոր դատախազի առաջադրված թեկնածու Գևորգ Կոստանյանի հանդիպումը ՀԱԿ խմբակցության անդամների հետ, թեև որքան հասկացանք` Գ.Կոստանյանի հետ հանդիպել էր ոչ թե խմբակցությունն ամբողջ կազմով, այլ միայն խմբակցության քարտուղար Արամ Մանուկյանն ու ղեկավար Լևոն Զուրաբյանը: Վերջինս էլ լրագրողներին ներկայացրեց հանդիպման մանրամասները` նշելով, որ քննարկումը ծավալվել է ընդհանուր առմամբ չորս հիմնական հարցերի շուրջ:

Նախ, ըստ Լ. Զուրաբյանի, Կոստանյանին է ներկայացվել ՀԱԿ-ի սպասումները մարտիմեկյան դեպքերի բացահայտման առումով. «մենք ներկայացրեցինք, որ գլխավոր դատախազ Հովսեփյանը ոչ միայն չի բացահայտել այդ սպանությունները, այլև պարտակել է այդ հանցագործությունների բացահայտումը ու ներկայացրել ենք Փաստահավաք խմբի փաստաթղթերը, որոնք վկայում են, թե քննիչները փաստեր են ոչնչացրել»:

Հաջորդ հարցը, որ ներկայացվել է Գ.Կոստանյանին, վերաբերում է մարտիմեկյան դեպքերին հաջորդած դատավարություններին ու նրան, որ ըստ Լ.Զուրաբյանի` բազմաթիվ դատախազների ու քննիչների կողմից կայացվել են ակնհայտ անարդար վճիռներ. «Մենք բարձրացրեցինք այն հարցը, որ բոլոր այդ մարդիկ պետք է պատիժ կրեն»,- տեղեկացրեց ՀԱԿ ներկայացուցիչը:

Երրորդ. ՀԱԿ խմբակցությունը Գ.Կոստանյանին է ներկայացրել նաև Տիգրան Առաքելյանի և երեք ՀԱԿ ակտիվիստների գործը և չորրորդը` ՍԴՀԿ-ի դեմ ոտնձգությունների հարցն է: Այս բոլոր հարցերի վերաբերյալ ՀԱԿ-ը մատնանշել է նաև իր մոտեցումները, նաև հետաքրքրվել Գ.Կոստանյանից, թե ինչ քայլեր է պատրաստվում վերջինս այդ պաշտոնում իրականացնել կոռուպցիայի դեմ պայքարում:

Դատախազի թեկնածուի արձագանքն էլ եղել է հետևյալը. «Լինելով գրագետ իրավաբան Գ.Կոստանյանն ասաց միայն, որ այդ բոլոր հարցերը դեռ պետք է ուսումնասիրի, որովհետև այդ բոլորին ծանոթ է միայն լրատվամիջոցների հրապարակումներից և չի կարող, բնականաբար, իր անելիքների մասին պատկերացումները հիմնել այդ հրապարակումների վրա: Դա հասկանալի է, և իր ներկայացմամբ` իր գործողությունները կլինեն բացարձակ օրենքի և իրավականության սահմաններում»,- տեղեկացրեց Լ.Զուրաբյանը` հավելելով, որ որևէ կասկած չունեն, որ Գ.Կոստանյանի հարցը վճռված է:

Նախորդիվ`
ՕԵԿ-ը դրական է գնահատում Գ.Կոստանյանի մոտեցումները