Ձեր վստահելի աղբյուրը

 ԵԱՀԿ Մինսկի խմբի համանախագահներ Իգոր Պոպովը (ՌԴ), Ջեյմս Ուորլիքն (ԱՄՆ) ու Ժակ Ֆորը (Ֆրանսիա) նախօրեին Նյու-Յորքում համատեղ հանդիպում են անցկացրել Ադրբեջանի ԱԳ նախարար Էլմար Մամեդյարովի և Հայաստանի ԱԳ նախարար Էդվարդ Նալբանդյանի հետ: Հանդիպմանը մասնակցել է նաև ԵԱՀԿ գործող նախագահի ներկայացուցիչ Անջեյ Կասպրշիկը: Այս մասին ասված է ԵԱՀԿ պաշտոնական կայքում զետեղված հաղորդագրությունում: 

Հայտարարության համաձայն, նախարարները և համանախագահները շարունակել են քննարկումները խաղաղ կարգավորման գործընթացի էության վերաբերյալ։
Համանախագահները վերահաստատել են իրենց երկրների հավատարմությունը հակամարտության խաղաղ կարգավորմանն ուժի կամ ուժի սպառնալիքի չկիրառման, տարածքային ամբողջականության և ժողովուրդների ինքնորոշման սկզբունքներին հիման վրա:

Հայտարարության մեջ հղում է արվում նաև եռանախագահող երկրների նախագահների 2013 թ-ի հունիսի 18-ի համատեղ հայտարարությանը, որում կողմերին առանձնակի կոչ էր արվում «զերծ մնալ այնպիսի գործողություններից և քայլերից, որոնք կարող են լարվածություն առաջացնել տարածաշրջանում և սրել հակամարտությունը»:

«Նախարարները վերահաստատել են իրենց վճռականությունը համանախագահների հետ շարունակել աշխատանքներն հակամարտության խաղաղ կարգավորմանն հասնելու նպատակով: Սպասվում է, որ նրանք նոյեմբերին կայցելեն տարածաշրջան նախագահների հետ քննարկելու մինչ տարվա վերջ ծրագրված գագաթաժողովի անցկացման հետ կապված հարցեր», - ասված է հայտարարության մեջ:

Վերոնշյալ հայտարարության, ինչպես նաև ԼՂ հակամարտության խաղաղ կարգավորման գործընթացում հնարավոր զարգացումների վերաբերյալ panorama.am-ը զրուցեց քաղաքագետների հետ:

Սերգեյ Մինասյանի կարծիքով այս և նմանանապտիպ այլ հայտարարությունների հիմնական նպատակը ռազմական գործողությունների վերսկսման կանխարգելումն է:

«Հայտարարությունը սպասված էր և տրամաբանական: Հասկանալի է, որ համանախագահների հիմնական գործառույթները ռազմական գործողությունների չվերսկսման ապահովումն է, նույնիսկ այն պարագայում, երբ տեսանելի ապագայում խաղաղ կարգավորման գորընթացում որևէ առաջընթաց ակնակելը իրատեսական չէ:
Արդեն երկու տասնամյակ ռազմական գործողությունները չեն վերսկսվում և դա միանշնակ կարելի է համարել ԵԱՀԿ Մինսկի խմբի ձեռքբերում»,- ասաց Սերգեյ Մինասյանը:

Բանախոսի կարծիքով` տարածաշրջանում լարվածության աճին և հակամարտության սրմանը նպաստող գործողություններից զերծ մնալու կոչը նախևառաջ ուղղված էր ադրբեջանական կողմին:

«Բոլորին, այդ թվում նաև ԵԱՀԿ ՄԽ-ի համանախագահներին հասկանալի է, թե հակամարտության որ կողմն է մշտապես հանդես գալիս սպառնալիքներով և ռազմական հռետորաբանությամբ լի հայտարարություններով , ինչպես նաև շփման գծում լարվածություն սերմանելով, փորձում է ազգել բանակցային գործընթացի ընթացքի վրա»,- ասաց Սերգեյ Մինասյանը:

Ինչ վերաբերում է համանախագահների` նոյեմբերին տարածաշրջան այցելելու և նախագահների հետ մինչ տարվա վերջ ծրագրված գագաթաժողովի անցկացման հետ կապված հարցեր քննարկելու մտադրությանը, ապա այն, ըստ քաղաքագետի, նույնպես տրամաբանական է:

«Համանախագահները տեսնում են, որ երկու նախագահները վերջին անգամ հանդիպել են գրեթե երկու տարի առաջ, հետևաբար փորձ է արվում ստեղծել ինչ-որ նոր ձևաչափ, որի շրջանակներում հնարավոր կլինի նախագահներին նստեցել բանակցային սեղանի շուրջ: Եթե նույնիսկ հնարարավոր չլինի առաջ տանել բանակցային գործընթացը, ապա գոնե հնարավորություն կնձեռնվի պայմանավորվել շփման գծում գրանցվող միջադեպերի հետաքննության, ինչպես նաև ռազմական հռետորաբանության նվազեցման հարցերի շուրջ»,- ասաց Սերգեյ Մինասյանը:

Իր հերթին Ալեքսանդր Մարկարովի կարծիքով նմանատիպ հանդիպումները կարող են լրացուցիչ խթան հանդիսանալ հակամարտության կարգավորման գործընթացի ակտիվացման գործում:

«Բոլոր կողմերի մոտ մշտապես առկա է եղել այն ընկալումը, որ անհրաժեշտ է ավելի հաճախակիացնել բանակցային գործընթացը և դա կարող է երկարաժամկետ հեռնակարում հանգեցնել ինչ-որ արդյունքների: Պարզ է, որ սա դյուրին գործընթաց չէ: Գործընթացը դրսևորվում է ոչ միայն համանախագահների տարածաշրջանային այցելություններով, այն նաև նախագահության ավելի համախմբված գործողություններով: Այս առումով նմանատիպ հանդիպումները, որոնց մասնակցում են նաև Հայաստանի և Ադրբեջանի արտգործնախարարները, կարող են լրացուցիչ խթան հանդիսանալ հակամարտության կարգավորման գործընթացի ակտիվացման գործում»,- ասաց Ա. Ալեքսանդր Մարկարովը:

Համանախագահների` նոյեմբերին տարածաշրջան այցելելու և նախագահների հետ մինչ տարվա վերջ ծրագրված գագաթնաժողովի անցկացման հետ կապված հարցեր քննարկելու մտադրությունը, քաղաքագետի կարծիքով, պայմանավորված է բանակցային գործընթացի` առավել բանական և չափավոր բնույթ ստանալու ակնկալիքներով:

«Հաշվի առնելով Ադրբեջանում ընտրական գործընթացների մոտալուտ ավարտը և դրա հետ կապված Բաքվից հնչող ռազմական հռետորաբանության նվազման ակնալիքները, մենք ներկայումս, կարծես թե, թևակոխում ենք, ինչ-որ առումով ավելի հանդարտ և բանական ժամանակաշրջան: Իմ կարծիքով հենց այս ամենով են պայմանավորված նոյեմբերին նախատեսված են համապատասխան հանդիպումները»- ասաց Ալեքսանդր Մարկարովը: