Ձեր վստահելի աղբյուրը

 Կոմիտաս 5 հասցեի բնակիչները շարունակում են պայքարել, որ իրենց բակում շենք չկառուցվի: Նրանք դեմ են թե՛ 14, թե՛ 7 հարկանի շինությանը: Բնակիչներն այսօր նորից քաղաքապետարանի մոտ էին, պահանջը` դարձյալ նույն էր, միայն թե դժգոհությունն ու անհանգստությունն է ավելի մեծ:

Բնակիչների խոսքով` կառուցապատողը սկսել է շենքի հիմք փորել, ինչի հետևանքով մյուս շենքերի վրա ճաքեր են առաջացել:
«Աստված չանի, երկրաշարժ եղավ, մեր շենքերը կփլվեն, բա մեղավորն այդ ժամանակ ով է լինելու»,- Panorama.am-ի թղթակցին ասաց բնակիչներից մեկն ու ընդգծեց, որ իրենք առհասարակ դեմ են որևէ շինության, ու դա քմահաճույք չէ, իրենց բակում շենք կառուցել չի կարելի:

Նրանք շեշտում են, որ երբեք համաձայնություն չեն տվել, պարզապես առաջարկել են կառուցապատողին այլ տեղ հատկացնել: Իսկ կառուցապատողն էլ նոր տեղերի առաջարկները չի ընդունել:

«Մեր շահերը ոչ մի կերպ հաշվի չի առնվում, մեր իրավունքները չեն հարգվում: Կշեռքի մի նժարին 100 և ավելի բնակիչների շահերն են, մյուս նժարին` գործարարի: Մեր արևը փակվում է, մեր շենքերը ճաքեր են տալիս, վնասներ ենք կրում: Ո՞վ է դրա համար պատասխան տալու, եթե ոչ քաղաքապետը»,- ասաց բնակիչ Գոհար Սահակյանը:

Բնակիչներից մեկն էլ նկատեց, որ տարածքը բարձր գին ունի, դա է պատճառը, որ չեն ցանկանում հրաժարվել: «Մի հատ փոքր տարածք են գտնում, շենք են կանգնացնում: Ագահություն են անում էլի»,- դժգոհեց Նելլի Ոսկանյանը:

Բնակիչներն այսօր ցանկանում էին հանդիպել քաղաքապետի կամ գլխավոր ճարտարապետի հետ, սակայն նրանց ընդունեցին քաղաքապետարանի աշխատակազմի քարտուղարի տեղակալն ու գլխավոր ճարտարապետի օգնականը:

Բնակիչները ևս մեկ անգամ ներկայացրել են իրենց պահանջը, իսկ քաղաքապետարանի աշխատակիցները խոսք են տվել երկուշաբթի այցելել Կոմիտաս 5 և ուսումնասիրել այն: Քաղաքապետարանի աշխատակիցներին բնակիչներն առաջարկել են բարձրահարկ շենքի փոխարեն խաղահրապարակ կառուցել:

Նշենք, որ գործը սկսվել է 2007թ-ին, Երվանդ Զախարյանի քաղաքապետ լինելու ժամանակ հողատարածք է վաճառվել՝ առանց հասարակական լսումների: Ինչպես պնդում են բնակիչները` Գագիկ Բեգլարյանի օրոք արդեն ներկայացվել է 14 հարկանի շենքի նախագիծը և ստացել թույլտվություն, իսկ Տարոն Մարգարյանը վավերացրել է այն: Բնակիչները չեն համաձայնում իրենց բակում որևէ շինություն կառուցելու հետ, այժմ կառուցապատողը նախատեսվում է կառուցել 7 հարկանի շենք: Սակայն հաստատված նախագիծ մինչ այս պահը չկա:

Նախորդող`

Կոմիտաս 5-ում 7 հարկանի շինության նախագիծը վաղը կներկայացվի Ճարտարապետների միություն

Նախագիծը չի համաձայնեցվի, մինչև բոլոր պարամետրերը ձեր աչքով չտեսնեք. Նարեկ Սարգսյանը` Կոմիտաս 5-ում կառուցվող շենքի մասին

«Ամոթ, ամոթ». Դավիթ Օհանյանը հեռացավ Կոմիտաս 5-ից (Տեսանյութ)

Արաբկիրի ղեկավար. Կոմիտաս 5Ա-ի բնակիչների կարծիքները հաշվի են առնվել (Տեսանյութ)

Կոմիտաս 5-ում տղամարդը կտրել է երակները (Տեսանյութ)