Ձեր վստահելի աղբյուրը

«Այս տարվա օգոստոսի 8-ից մինչ օրս Ադրբեջանում գերեվարված է հայ զինվոր Հակոբ Ինջիղուլյանը, ով մոլորվելով տեղանքում` հայտնվել է ադրբեջանական գերության մեջ: Ոմանք կարծում էին, թե ԵԽ անդամ երկիր Ադրբեջանը գոնե կհարգի իր իսկ ստանձնած միջազգային պարտավորությունները, միջազգային իրավունքի նորմերը, այդ թվում` մարդասիրական: Սակայն Ադրբեջանը կոպտորեն խախտում է Ժնևյան կոնվենցիան` հայ զինվորին ադրբեջանական համազգեստ հագցնելով, ադրբեջանական հեռուստատեսությամբ կազմակերպում են «հարցազրույց» շոուներ, որի ժամանակ հստակ երևում են հայ զինվորի նկատմամբ կիրառված հոգեբանական և ֆիզիկական բռնության հետքերը»,- ԵԽԽՎ աշնանային նստաշրջանի մեկնարկ-նիստում իր ելույթի ժամանակ քիչ առաջ հայտարարեց հայկական պատվիրակության անդամ Նաիրա Զոհրաբյանը` շեշտելով, որ «Ադրբեջանը, ըստ էության արհամարհելով Կարմիր Խաչի ջանքերը, սահմանափակում է Հակոբի կապն իր ընտանիքի հետ, ինչի հետևանքով հայ զինվորի ընտանիքը չի կարողանում հստակ տեղեկություն ստանալ իր որդու մասին».

«Ավելին` հայ զինվորին զրկում են հայրենիք վերադառնալու իրավունքից և անհեթեթ տեղեկություններ են տարածում երրորդ երկիր Հակոբի մեկնելու ցանկության մասին: Միանշանակ է, որ այդ, այսպես կոչված, «ցանկությունը», Հակոբին պարտադրվել է ֆիզիկական և հոգեբանական բռնության արդյունքում»,- հայտարարեց Նաիրա Զոհրաբյանը:

Պատգամավորի խոսքով այն, ինչ անում է Եվրոպայի Խորհրդի անդամ Ադրբեջանը, ուղղակիորեն անթույլատրելի է.

«Եվ եթե Եվրոպայի Խորհուրդը շարունակի լռել, ապա այդ լռության հետևանքները կարող են կործանարար լինել: Հիշենք հայ հովիվ Մանվել Սարիբեկյանին, ով գերի ընկներով` անմարդկային կտտանքների ենթարկվեց ադրբեջանցիների կողմից, որից հետո հայ երիտասարդի գազանաբար տանջամահ արված մարմինը հանձնեցին նրա ծնողներին: Մեկ անգամ ևս ուզում եմ կրկնել` Հակոբը հայրենիքում որևէ պատասխանատվության չի ենթարկվելու և դա միանշանակ է: Թույլ չտանք, որ ԵԽ անդամ մի երկրի կողմից միջազգային իրավունքի կոպիտ խախտումը հերթական անգամ բերի անդառնալի ողբերգության: Հակոբին սպասում են հայրենիքում գ նա պետք է վերադառնա տուն»,- հավելել է իր ելույթը հայկական պատվիրակության անդամը:

Հիշեցնենք, օգոստոսի 7-ի լույս 8-ի գիշերը ՀՀ քաղաքացի Հակոբ Գևորգի Ինջիղուլյանը տեղանքում չկողմնորոշվելու հետևանքով պատահաբար հատելով շփման գիծը հայտնվել էր ադրբեջանական զորքերի պահպանության տարածքում և գերեվարվել վերջիններիս կողմից:

Նախորդիվ` 

ՊՆ. Ադրբեջանն ամեն ինչ անում է, որպեսզի հայ ռազմագերիները ընտրեն երրորդ երկիր տեղափոխվելու հնարավորությունը 
ՊՆ-ն կոչ է անում ԿԽՄԿ ուժերով կազմակերպել և ապահովել ՀՀ քաղաքացու անվտանգ և շուտափույթ վերադարձը Հայաստան