«Այնքան միամիտ չեմ, որ հավատամ, որ անհատը կարող է համակարգ փոխել». Ժառանգությունը դեմ է Կոստանյանի թեկնածությանը
Ազգային ժողովի «Ժառանգություն» խմբակցությունը դեմ է ՀՀ գլխավոր դատախազի պաշտոնում Գևորգ Կոստանյանին նշանակելու մասին ՀՀ նախագահի առաջարկությանը: Այդ մասին այսօր Ազգային ժողովում գլխավոր դատախազի թեկնածության հարցի քննարկման ընթացքում խմբակցությունների տեսակետների ներկայացման ժամանակ հայտարարեց խմբակցության ղեկավար Ռուբեն Հակոբյանը:
«Ինձ համար չափանիշը մեկն է` մենք չենք ընտրում անձ: Հնարավո՞ր է գոյություն ունեցող դատաիրավական համակարգը անձով փոխել: Առայժմ դատախազությունը ապացուցեց, որ պետության ամենավտանգավոր, ամենադաժան իրավիճակներում դարձել է մուրճ քաղաքական դաշտում, և, ցավոք սրտի, այդ մուրճի միջոցով հնարավոր չեղավ բարեփոխումներ անել: Երբ 94-ից սկսած գլխավոր դատախազությունը զուտ քաղաքական դրդապատճառներով սկսեց հավաքել քաղաքական լիդերներին, ոչ մի նոր նշանակված դատախազ գնահատական չտվեց ու չասաց` ժողովուրդ մենք մտել ենք քաղաքական դաշտ, մենք մուրճ ենք դարձել քաղաքական ուժերի գլխին և դատապարտեր բոլոր վատ երևույթները», -հայտարարեց Հակոբյանը:
Նրա խոսքով, Հայաստանում այդպես էլ չկարողացան տեր կանգնել ՀՀ Սահմանադրության մեջ գրված նորմերին, որպեսզի մեր քաղաքացու իրավունքները պաշտպանված լինեն:
«Ոչինչ չունեմ Կոստանյանի անձի հետ կապված, հրաշալի հանդիպում կայացավ մեր խմբակցության անդամների հետ, ճշգրիտ բառապաշարով, նորմալ ու պրոֆեսիոնալ կեցվածքով: Ուրախ եմ, որ նման սերնդափոխություն է կատարվում: Բայց ես այնքան միամիտ չեմ, որ հավատամ, որ անհատը կարող է համակարգ փոխել, չեմ հավատում, որ մի ծաղկով գարուն կգա: Անձի մասին չէ խոսքը: Համակարգն այնպես է ձևավորվել, որ մենք խնդիր ունենք համակարգին անդրադառնալու, բոլորս ունենք մտահոգությունը, որ այս հրաշալի երիտասարդը կգնա, կկորի: Մենք դեմ ենք: Մենք կլինենք ձեր կողքին, եթե անկեղծորեն ասեք` օգնեք մեզ: Անկեղծորեն կցանկանայի, որ հետագայում ես այստեղ հայտարարեի, որ մենք սխալվել ենք ու հայտարարել, որ ժողովուրդ Հայաստանում շատ ճշգրիտ ընտրություն է կատարվել, քաղաքացին պաշտպանված է», -հավելեց Ժառանգություն խմբակցության ղեկավարը:
Լրահոս
Տեսանյութեր
18-20 տարեկան տղաներն իրենց կյանքի գնով Արցախում կանխել են ցեղասպանություն. Հովիկ Ավանեսով