Ձեր վստահելի աղբյուրը

Այսօր երեկոյան Ստանիսլավսկու անվան ռուսական դրամատիկական թատրոնում կբացվի նախկին ԽՍՀՄ տարածքում ամենագլխավոր թատերական միջոցառումը: «ՀԱՅ ՖԵՍՏ 2013» միջազգային թատերական փառատոնի մեկնարկը կտրվի Մեծ Բրիտանիայի «1927» Թատրոնի «Կենդանիները և երեխաները գրավել են փողոցները» մուլտիմեդիա ներկայացումով:

Այսօր լրագրողների հետ հանդիպմանը փառատոնի նախագահ Արթուր Ղուկասյանը հայտնեց, որ այս ներկայացումը 2011-ի Էդինբուրգի փառատոնի լավագույններից է: 

Ասուլիսին ներկա էր նաև «Կենդանիները և երեխաները գրավել են փողոցները» ներկայացման դերասանուհի Լյուիս Բարֆութը: «Մեծ պատիվ է գտնվել Հյաստանում և շատ հեղինակավոր թատերախմբի հետ ներկայացնել բեմադրություն: Պետք է շնորհակալություն հայտնենք «ՀԱՅ ՖԵՍՏ»-ին»,- ասաց նա:

Դերասանուհին նշեց, որ «Կենդանիները և երեխաները գրավել են փողոցները» ներկայացումն առաջին անգամ բեմադրվել է 2010-ին և խաղացվել ավելի քան 50 երկրներում: «Այս ներկայացման թեման համամարդկային է, մարդիկ գտնում են այն իրենց կապակցելու միջոց: Ոգևորիչ է կարողանալ ներկայացնել այնպիսի արվեստ, որը ստիպում է ամբողջ աշխարհի մարդկանց ունենալ նույն զգացումները կամ զուգակցել այն իրենց կյանքի հետ»,- ասաց Բարֆութը: Նա նշեց, որ թատերախումբը հետաքրքրված է արվեստում տեղի ունեցող շարժմամբ, զարգացմամբ:

Թատերախումբը մեծապես ազդված է համր կինոյի դարաշրջանից, և թատրոնը «1927» անվանելու վրա մեծ ազդեցություն է ունեցել 1927թվականի «Ջազ երգիչ» ֆիլմը, որում առաջին անգամ ձայն է հնչել: Ոճական առումով մեծ ազդեցություն է ունեցել այդ ժամանակաշրջանի ուրբան քաղաքային բնութագիրը:

Արթուր Ղուկասյանն անդրադարձավ «ՀԱՅ ՖԵՍՏ»-ի սոցիալական ծրագրերին: «Այս տարի մենք դա անում ենք «Վոռլդ Վիժըն» կազմակերպության հետ: Այս անգամ Մովսես գյուղի անապահով ընտանիքների երեխաներն են իրենց ձեռքերով պատրաստել նվերներ թատերական խմբերի համար: Այսպիսով, իրենք էլ են մասնակցում «ՀԱՅ ՖԵՍՏ»-ին»,- ասաց նա:

Փառատոնի ղեկավարը նշեց, որ հոկտեմբերի երկուսից յուրաքանչյուրը կարող է գնալ և դիտել ներկայացումները: «Այս տարվա ներկայացումները ևս նորարարական են, փառատոնային, որոնք հուսով եմ կզարգացնեն թատերական կյանքը Հայաստանում»,- եզրափակեց նա:

Հավելենք, որ Փառատոնի ընթացքում հանդես կգա 18 երկրի 25 թատերախումբ` Մեծ Բրիտանիայից, Արգենտինայից, Իտալիայից, Լատվիայից, Լիտվայից, Իրանից, Ռուսաստանից և այլն: Նշանավոր ներկայացումներից են Օսկարաս Կարշունովասի թատրոնի «Միրանդա» ներկայացումը` ըստ Վ. Շեքսպիրի «Փոթորիկը» պիեսի (Լիտվա), «1927» թատրոնի (Մեծ Բրիտանիա) «Կենդանիները և երեխաները գրավել են փողոցները» մուլտիմեդիա ներկայացումը, Ա.Սթրինբերգի «Ֆրեկեն Ժյուլի»ներկայացումը`Վալմիերայի դրամատիկական թատրոն (Լատվիա), Յոզեֆ Բոյսի անվան թատրոնի «Ուզբեկ» մոնոներկայացումը (Ռուսաստան) և այլն:

«ՀԱՅ ՖԵՍՏ» փառատոնին կմասնակցեն թատերախմբեր ոչ միայն արտերկրից, այլ նաև Երևանից և Հայաստանի մարզերից, մասնավորապես` Գյումրիից, Եղեգնաձորից: Երևանյան թատրոններից փառատոնի հիմանական ծրագրում հանդես կգան Հովհ. Թումանյանի անվան Տիկնիկային, Երևանի պատանի հանդիսատեսի, «Փոքր», «Միհր» թատրոնները։

Նախորդիվ`

Սեր, Գաղափար, Գործողություն, Խիզախություն, Երազանք` «ՀԱՅ ՖԵՍՏ». Մուտքն ազատ է լինելու