Ինչո՞ւ արտագաղթի ցուցանիշներով առաջատար Շիրակի մարզի ՏԻՄ-երում կանայք «դեֆիցիտ են»
Շիրակի մարզը համարվում է Հայաստանի սոցիալապես ամենավատ վիճակում գտնվող մարզերից մեկը` այստեղ բարձր է և’ աղքատության, և’ գործազրկության ցուցանիշը, և սրանցից ելնելով բարձր են նաև արտագաղթի ցուցանիշները: Սակայն սրա հետ մեկտեղ կանանց ներկայացվածությունը մարզի ՏԻՄ-երում, որքան էլ զարմանալի է, այնքան էլ բարձր չէ` մարզի 119 համայներից միայն 37-ում են առկա կին ավագանու անդամներ, իսկ կին համայնքի ղեկավարներն այստեղ ուղղակի «դեֆիցիտ են»` ընդամենը երկուսն են համայնք ղեկավարում:
Թվային առումով պատկերը հետևյալն է. մարզի 687 ավագանու անդամներից 626-ը տղամարդ են, միայն 61-ը կին: Սրան գումարենք նաև 117 համայնքի տղամարդ ղեկավարների և ստացվում է, որ կանայք այստեղ, ինչպես ասում են, բացարձակ փոքրամասնություն են: Անգամ «հայրաքաղաք» Գյումրին, որ ունի 20 ավագանու անդամ, միայն մեկ կին ավագանի ունի, իսկ մարզի մյուս երկու քաղաքները` Արթիկն ու Մարալիկը (15 ավագանու անդամ մեկում, 11 մյուսում) առհասարակ զուրկ են ավագանիում կնոջ ներկայությունից:
Panorama.am-ի հետ զրույցում Շիրակի մարզի երկու կին համայնքապետերից մեկը` Արեգնադեմ համայնքի ղեկավար Աղունիկ Հազրյանը, պատասխանելով հարցին, թե ինչպե՞ս է այդպես ստացվում, որ արտագաղթի բարձր ցուցանիշների հետ մեկտեղ կանանց ներկայացվածությունը ՏԻՄ-երում ամենևին էլ չի ավելանում, նախ, համաձայնեց դիտարկման հետ և նշեց`«թվում է, թե տվյալ պարագայում կանանց թիվը իսկապես պետք է ավելի մեծ լինի, բայց կանայք, երևի թե, վախենում են պարտվելուց, ասեկոսեի առիթ դառնալուց, գուցե դա է պատճառը, որ նաև քիչ են առաջադրվում: Կանայք նաև ֆինանսապես շատ թույլ են, գրավը մուծելու հնարավորություն քիչ ունեն»,- ավելացրեց նա:
Տիկին Հազրյանի խոսքով, նաև պատճառներից մեկը կարելի է դիտել այն, որ գյուղական վայրերում հիմնականում անասնապահությամբ են զբաղվում և դա ավելի եկամտաբեր է, քան ՏԻՄ-երում աշխատելը, ուստի կանայք էլ գերադասում են տան հոգսերով զբաղվել, քան ամբողջ օրն անցկացնել դրսում:
Ինչ վերաբերում է այն հարցին` կանանց հետ է հեշտ աշխատել, թե՞ տղամարդկանց, տիկին Հազրյանն ասաց, որ կոնկրետ ինքը նման խնդիրներ չունի և, մասնավորապես, իրենց համայնքի ավագանիում մեկ կին անդամ կա` չորս տղամարդ, իսկ աշխատակազմում էլ կանայք են գերակշռում. «Ես ամենևին չեմ դժվարանում կանանց հետ աշխատել. եթե աշխատողը գիտակից է, հասկանում է և գիտի իր գործը, իսկ ամենակարևորը` սիրում է իր աշխատանքը համայնքում, ի՞նչ տարբերություն կնոջ հետ ես աշխատում, թե տղամարդու»,- արձագանքեց նա ու հավելեց, որ իրենց մարզում կանանց նման ցածր ցուցանիշները ամենևին էլ չեն կաշկանդում և հաջորդ ընտրություններին էլ պատրաստվում է առաջադրվել` դեռ չի սպառել իրեն ու ասելիք էլ դեռ շատ ունի. «Քանի ուժերս ներում են, ես առաջադրվելու եմ»,- հավաստիացրեց նա:
Նշենք, որ Շիրակի մարզի համայնքների ավագանիների գերակշիռ մասում կանանց ներկայացվածությունը 1:4-ն է` մեկ կին չորս տղամարդու դիմաց: Միայն Կարմրաքար, Աղվորիկ, Արդենիս, Բաշգյուղ և Զարիշատ, ինչպես նաև Նոր Կյանք համայնքներում է, որ կին ավագանիները թվային առավելություն ունեն….
Նախորդիվ`
«Խառնվածքով» բազմազան Արագածոտնի մարզը շարունակում է մնալ տղամարդկանց տիրապետության տակ
Սյունյաց կանայք ՏԻՄ-երում. Համայնքներ կան, ուր ավագանու անդամները բացառապես կանայք են
Լրահոս
Տեսանյութեր
Վ.Հակոբյան. Ռուսաստանի հետախուզությունն ասում է՝ գիտենք, ինչ փողեր են գալիս, ում գրպաններն են մտնում
