Ձեր վստահելի աղբյուրը

Այս տարի «DigiTec Expo 2013» միջազգային ցուցահանդեսը տեխնոլոգիական հայությանը կներկայանա հոկտեմբերի 4-6-ը, «Երևան Էքսպո» կենտրոնում, որի շրջանակներում ՏՏ ոլորտի ընկերությունները կներկայացնեն իրենց վերջին ձեռքբերումներն ու նորարարությունները:

Ինչպես Panorama.am-ի թղթակցի հետ զրույցում նշեց Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը, DigiTec-ի հիմնական նպատակը բարձր տեխնոլոգիաների ընկերությունների, սպառողների միջև հաղորդակցման բարենպաստ միջավայր ստեղծելն է, ինչպես նաև հայաստանյան ՏՀՏ դաշտի իրական պատկերն ուսումնասիրելու, ձեռքբերումներին ծանոթանալու, առկա մարտահրավերներն ու հնարավորությունները տեսնելու հնարավորություն է տալիս, այն նաև միտված է միջազգային կապերի ընդլայնմանը:

«Այս տարի ցուցահանդեսին կմասնակցեն մի քանի ընկերություններ, որոնք Հայաստանի ՏՏ շուկա կմտնեն հենց ԴիջիԹեքի միջոցով: Այսինքն` բոլոր ընկերություններն իրենց նորարարությունները առաջին անգամ կներկայացնեն այս ցուցահանդեսում»,- նշեց Կ.Վարդանյանը:

Ցուցահանդեսի կարևոր առանձահատկությունը նաև կայանում է նրանում, որ այն տեսանելի է դարձնում Հայաստանի տեխնոլոգիական ապագան: «Սա շատ կարևոր հանգամանք է, քանի որ Դիջիթեքը հանդիսանում է նաև օրինակ և երիտասարդները տեսնում են, որ իրենք ունեն ապագա Հայաստանում, որ իրենք կարող են ընտրել այնպիսի մասնագիտություն, որը կարևոր դերակատարություն ունի յուրաքանչյուր երկրի տնտեսության զարգացման համար: Դիջիթեքին մասնակցելով բազմաթիվ երիտասարդներ նաև իրենց համար մասնագիտությունն են ընտրում»,- ընդգծեց Կ.Վարդանյանը:

Ի դեպ, այս տարի ցուցահանդեսի կազմակերպիչները ակնկալում են, որ ցուցահանդեսին կմասնակցի 150 կազմակերպություն` անցած տարվա 120-ի համեմատ, իսկ այցելուների թիվը կհասնի 26.000-ի` 2012 թվականի 24.000-ի փոխարեն: «Եթե Հայաստանում բացվող բոլոր ցուցահանդեսների այցելուների թիվը գումարենք, ապա նորից այդ թիվը չի ստացվի: Կարծում եմ, որ սա մեկ անգամ ևս խոսում է այն մասին, որ այն կայացել է, ԴիջիԹեքի հեղինակությունը տարեցտարի աճում է, ավելանում են տեղական և արտասահմանյան մասնակիցների և այցելուների քանակը»,- ասաց ԻՏՁՄ նախագահը:

Նրա խոսքերով` հասարակությունն արդեն հասկանում է, որ տեխնոլոգիական զարգացումը Հայաստանում հնարավոր է և իսկապես կարող է հանդիսանալ այն լոկոմոտիվը, որը կխթանի տնտեսության բոլոր ոլորտների և հասարակական կյանքի առաջխաղացումը:

Նշենք նաև, որ ՏՏ ոլորտում տարեկան հասույթը կազմում է 350 մլն դոլար: Տեղեկատվական տեխնոլոգիաների արտադրանքի շուրջ 60%-ն արտահանվում է, իսկ 40%-ը սպառվում է ներքին շուկայում: Ընդհանուր առմամբ` Հայաստանում գործում է մոտ 450 ընկերություն, որից 100-ը` արտասահմանյան: