Դավիթ Սարգսյան. «Միջազգային կազմակերպություններն արձանագրել են, որ Հայաստանն այլևս աղքատ երկրների խմբում չէ»
Հայաստանի կողմից միջազգային շուկայում թողարկված եվրաբոնդերի տեղաբաշխումից առաջացած ամբողջ գումարն այս տարվա սեպտեմբերի 30-ի դրությամբ արդեն փոխանցվել է կառավարության հաշվեհամարին: Այս մասին այսօր ՀՀ կառավարության նիստին հաջորդած ճեպազրույցում ասաց ֆինանսների նախարար Դավիթ Սարգսյանը:
Նրա խոսքերով` այդ գումարը կօգտագործվի մի շարք ուղղություններով: Առաջինը` ՀՀ կառավարությունը վաղաժամկետ կմարի Ռուսաստանի Դաշնությունից 2009 թ-ին ստացած 500 մլն դոլար վարկը, երկրորդ` 60 մլրդ դրամ կհատկացնի ՀՀ կենտրոնական բանկին` փոքր և միջին բիզնեսի վարկավորման համար, երրորդ` 3,9 մլրդ դրամ կհատկացնի ՓՄՁ վարկային կազմակերպությանը` ցածր տոկոսադրույքներով վարկեր տրամադրելու համար, չորրորդ` 1 մլրդ 950 մլն դրամ կուղղվի արտահանման ֆինանսավորման ապահովագրական նոր կառույցին, որի նպատակն է ստեղծել մեխանիզմներ արտահանման խթանման համար:
«Իսկ մնացած մասն արդեն կուղղվի պետական պարտքի կառավարմանը: Այսինքն` որոշակի համամասնություններ ենք փոխելու ներքին շուկայում թողարկված պետական պարտատոմսերի կառուցվածքում, որի արդյունքում մինչև հաջորդ տարվա վերջ կարձանագրենք տոկոսադրույքների նվազում, ինչը բարենպաստ միջավայր կստեղծի փոքր և միջին բիզնեսի զարգացման համար»,- ասաց Դ.Սարգսյանը:
Նախարարը նշեց, որ Հայաստանը պարտատոմսերի թողարկման հիմքում դրել է հետևյալ խնդիրները: Առաջինը՝ միջազգային չափանիշներով Հայաստանն արդեն չի համարվում աղքատ երկիր և տեղափոխվել է միջին եկամուտ ունեցող երկրների խումբ: Դա նշանակում է, որ Հայաստանն այլևս արտոնյալ պայմաններով վարկեր չի ստանալու՝ ոչ Արժույթի միջազգային հիմնադրամից, ոչ՝ Համաշխարհային բանկից, ոչ՝ այլ միջազգային ֆինանսական կազմակերպությունից: Օրիանկ` եթե նախկինում ՀԲ-ից Հայաստանը ստանում էր վարկ 10 տարի արտոնյալ մարման ժամկետով, 0,75 % տարեկան տոկոսադրույքով, ապա 2007-2008 թվականներից արտոնյալ պայմաններով տևրամադրվող վարկերը նվազում են, և փոխարենը ավելի բարձր տոկոսով ֆինասավորում է առաջարկվում երկրին: «Սա նշանակում է, որ Հայաստանն այլևս արտոնյալ վարկեր չի ստանալու, քանի որ միջազգային կազմակերպություններն արձանագրել են, որ Հայաստանն այլևս աղքատ երկրների խմբում չէ: Եւ մենք պետք է ինքնուրույն ֆինանսավորում հայթայթի», - ասաց Դ.Սարգսյանը:
Երկրորդ խնդիրը վերաբերում է մասնավոր հատվածին, որը իր բիզնես նախագծերի համար ֆինասավորման կարիք ունի: Ըստ նախարարի` այսօրվա միջազգային ֆինանսական շուկայում կանոններն այնպիսին են, որ եթե պետությունն այդ շուկայում մասնակցություն չունի, ապա այդ մասնավորը այդ շուկայում կամ չի կարողանում ընդհանրապես ներգրավել միջոցներ, կամ եթե ներգրավում է՝ չափազանց վատ պայմաններով, բարձր տոկոսներով: «Այսինքն` պետությունը պետք է ապահովի զարգացման ուղենիշ միջազգային շուկայում, որը թույլ կտա մասնավոր հատվածին ներգրավել ֆինանսական միջոցներ»,- ընդգծեց Դ.Սարգսյանը:
Երրորդ շարժառիթն այն է, որ այնուամենայնիվ պարտատոմսերի թողարկումը նշանակում է երկրի ֆինանսավորման դիվերսիֆիկացում: «Եթե Հայաստանը մինչ այս կախված էր միջազգային կառույցներից կամ մի քանի խոշոր երկրներից, ապա այս քայլով մենք դիվերսիֆիկացնում ենք մեր ֆինանսավորման աղբյուրները և այսուհետև կարողանում ենէ ներգրավել ֆինանսական ռեսուրսներ մասնավոր հատվածից»,- նշեց Դ.Սարգսյանը:
Նախարարը նշեց նաև, որ ճգնաժամի պայմաններում միջազգային շուկայում տոկոսադրույքները նվազել են` 1%-ից ցածր: Սակայն համաշխարհային տնտեսությունը դուրս է գալիս ճգնաժամից, ինչը նշանակում է, որ առաջիկայում սկսելու է տոկոսների բարձրացում: Այդ պատճառով մի շարք զարգացող երկրներ, այդ թվում` Հայաստանը որոշել են պարտատոմսեր թողարկել այսօր, այլ ոչ թե 1-2 տարի հետո:
Հայաստանը տեղաբաշխել է 700 մլն դոլարի եվրապարտատոմսեր
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
