Ձեր վստահելի աղբյուրը

«Հրաշք այգի» ՍՊԸ-ն ժամկետանց թունանյութեր ձեռք բերելու և իրացնելու համար ԳՆ սննդամթերքի անվտանգության ծառայության կողմից այս ամռանը տուգանվել էր 150 հազար դրամ: Մի քանի ամիս շարունակ ծառայությանը չէր հաջողվել գտնել տնօրենին, սակայն տուգանքի որոշումը պաշտոնական էջում տեղադրելուց հետո նա գտնվել է, ավելին տուգանքը վճարել է:

Ի՞նչ տեսակի, քանակի թունանյութի մասին է խոսքը, ովքե՞ր են տուժողները: Այս հարցերի վերաբերյալ Panorama.am-ը զրուցել է ծառայության աշխատակազմի ղեկավար Հովհաննես Գևորգյանի հետ:

-Պարոն Գևորգյան, ի՞նչի հիման վրա է ընկերությունում ստուգումն իրականացվել:

-ՀՀ ԳՆ սննդամթերքի անվտանգության պետական ծառայության կողմից «Հրաշք այգի» սահմանափակ պատասխանատվությամբ ընկերությունում ստուգում իրականացնելու համար հիմք է հանդիսացել ՀՀ վարչապետի գրավոր հանձնարարականը, որի հիման վրա ստուգվել է քաղաք Երևան, Արշակունյաց 214 հասցեում գտնվող «Հրաշք այգի» ՍՊԸ-ի գործունեությունը:

-Ինչո՞ւ է հենց 150 հազար դրամով տուգանվել ընկերությունը:

-Ստուգման արդյունքում «Հրաշք այգի» սահմանափակ պատասխանատվությամբ ընկերությանը պատկանող ք.Երևան, Արշակունյաց 214 հասցեում գործող վաճառակետում հայտնաբերվել է ժամկետանց «Կարատ» առևտրային անվանմամբ բույսերի պաշտպանության միջոցը` 800 գ: Խախտվել է «Բուսասանիտարիայի մասին» ՀՀ օրենքի 9-րդ հոդվածի 2-րդ մասի 1-ին կետը:
Այդ իրավախախտման համար պատասխանատվություն է նախատեսված «Վարչական իրավախախտումների վերաբերյալ» ՀՀ օրենսգրքի 109.1-րդ հոդվածով, համաձայն որի «Ժամկետանց, անորակ և արտադրությունից դուրս եկած բույսերի պաշտպանության քիմիական և կենսաբանական միջոցների, ինչպես նաև համապատասխան անվանացանկում չընդգրկված և ոչ թույլատրելի պայմաններում դրանց վաճառքի կանոնները խախտելը առաջացնում է տուգանքի նշանակում ֆիզիկական անձանց նկատմամբ` սահմանված նվազագույն աշխատավարձի հարյուրապատիկի չափով, պաշտոնատար անձանց նկատմամբ` հարյուրհիսնապատիկի չափով»: Հաշվի առնելով վերոնշյալը՝ ՍՊԸ-ի տնօրենը, որպես պաշտոնատար անձ, տուգանվել է սահմանված նվազագույն աշխատավարձի հարյուրհիսնապատիկի չափով (150.0 հազ. ՀՀ դրամ):

-Երբ տուգանքի որոշումը ամիսներ շարունակ չի հասնում ընկերության տնօրենին, ի՞նչ է պատրաստվում անել ծառայությունը:

-Տուգանքի որոշումը սահմանված կարգով փոստային ծառայությունների միջոցով ուղարկվել է «Հրաշք այգի» սահմանափակ պատասխանատվությամբ ընկերության տնօրեն Արթուր Իվանյանին՝ գրանցված բնակության հասցեով, սակայն փոստային ծառայությունների կողմից հետ է վերադարձվել «չի պահանջվել» մակագրությամբ, այնուհետև ուղարկվել է ՍՊԸ-ի գրանցման հասցեով և նորից հետ է վերադարձվել՝ կրկին «չի պահանջվել» մակագրությամբ: Նշյալ գործողություններից հետո, օրենքով սահմանված կարգով, տուգանքի որոշումը հրապարակվել է Ծառայության պաշտոնական կայքում, որից հետո 30.09.2013 թ. տնտեսավարողը վճարել է տուգանքը:

-«Հրաշք այգի» ՍՊԸ-ն ո՞ւմից, ո՞ր երկրից է ձեռք բերել թունանյութերը, ե՞րբ: Ինչպե՞ս է եղել, որ սահմանին չի հայտնաբերվել, որ թունանյութը ժամկետանց է եղել:

-Վաճառակետում հայտնաբերված «Կարատ» առևտրային անվանմամբ բույսերի պաշտպանության միջոցը, որը համարվում է միջատասպան միջոց, ՀՀ տարածք ներմուծել է «Հրաշք այգի» սահմանափակ պատասխանատվությամբ ընկերությունը՝ 2010 թվականի մարտ ամսին՝ Չինաստանից: Այդ ժամանակ տվյալ միջոցն ունեցել է գրեթե 3 տարի պիտանիության ժամկետ՝ արտադրված 2010 թվականի հունվար ամսին: Ներմուծման փուլում, մինչև մաքսային ձևակերպումները, Ծառայության կողմից կատարվել է բեռի զննում, նմուշառում: Որակը պարզելու նպատակով նմուշը ներկայացվել է լաբորատոր փորձաքննության, որի արդյունքում որակական շեղումներ չեն արձանագրվել, և ներմուծումը թույլատրվել է: Այսինքն, ներմուծման ժամանակ բույսերի պաշտպանության միջոցը եղել է ժամկետի մեջ և պահանջվող որակական ցուցանիշներին համապատասխան:
Ժամկետանց թունանյութի առկայությունը վաճառակետում տնտեսավարողը որակում է որպես անուշադրության հետևանք, քանի որ նույն կազմակերպությունը «Կարատ» է ներմուծել նաև 2011 թվականին և ամբողջությամբ իրացրել է: Ստուգման ժամանակ վաճառակետում առկա է եղել 2012 թվականի արտադրության «Կարատ» առևտրային անվանմամբ բույսերի պաշտպանության միջոցի խմբաքանակ, որի ժամկետը լրանում է 2015 թվականին:

-Ի՞նչ քանակությամբ են իրացվել, քանի՞ մարդ է գնել: Ի՞նչ կարող են անել ընկերության գործունեությունից տուժած, վնասներ կրած քաղաքացիները:

-Տնտեսավարողը «Կարատ» առևտրային անվանմամբ բույսերի պաշտպանության միջոց է ներմուծել 2010 թվականին՝ 6000 լ և 2011 թվականին՝ 3000 լ, որոնք ամբողջությամբ իրացրել է պիտանիության ժամկետում, և 2012 թվականին՝ 15000 լ, որը գտնվում է իրացման փուլում: Թե որ խմբաքանակից քանի անձ է գնել, Ծառայությունը տեղեկատվություն չի կարող ունենալ: «Հրաշք այգի» սահմանափակ պատասխանատվությամբ ընկերության գործունեությունից Ծառայությունը ո՛չ գրավոր և ո՛չ բանավոր բողոքներ չի ստացել:

-Ի՞նչ կարող են անել ընկերության գործունեությունից տուժած, վնասներ կրած քաղաքացիները:

-Ընկերությունների գործունեությունից տուժած և վնասներ կրած անձինք փոխհատուցման նպատակով կարող են դիմել համապատասխան ատյաններ: Հաշվի առնելով այն հանգամանքը, որ այդ հարցը դուրս է Ծառայության իրավասությունների շրջանակներից՝ գործողությունների մասին մանրամասն տեղեկատվություն տրամադրել չենք կարող:

Նախորդող`

Ժամկետանց թունանյութ վաճառած ընկերության տնօրենը տուգանվել է. Գյուղացիները կարող են դիմել դատարան

Գյուղացիներն ահազանգում են. Դաշտերը չորանում են

Հրանուշ Խառատյանը` հողերի խոշորացման մասին. Գերաղքատացած մեր գյուղացին, ամեն ինչից բացի, չի կարող սոցիալապես անապահով ճանաչվել

Հրանուշ Խառատյան. Թղթի վրա ունենք զգալի թվով բիզնես վարկեր, բայց իրականում դա տնտեսության մեջ ներդրում չեն