Ձեր վստահելի աղբյուրը

 Հոկտեմբերի 3-ի երեկոյան Ադրբեջանի հանրային հեռուստաընկերության եթերը հերթական անգամ վերածվել է Ժողովրդական ուժերի ազգային խորհրդի կողմից առաջադրված նախագահի թեկնածու Ջամիլ Հասանլիին ուղղված վիրավորանքների և հարձակումների հարթակի, հայտնում է ադրբեջանական «Թուրան» գործակալությունը:

Այսպես, հեռուստաբանավեճերի ընթացքում «Ժամանակակից Մուսավաթ» կուսակցության նախագահի թեկնածու Հաֆիզ Հաջիևը Հասանլիին անպատիվ է անվանել: «Դու պատվով էիր երդվում: Ինչպե՞ս կարող ես երդվել մի բանով, որ չունես», - ասել է Հաջիևը: Այնուհետև, նա սկսել է վիրավորել մյուս ընդդիմադիրներին` նրանց որակելով սեռական փոքրամասնություններին հատուկ բառերով:
Ի պատասխան` միասնական ընդդիմադիր թեկնածու Ջամիլ Հասանլին ասել է, որ Հաջիևը նման արարքներով վիրավորում է ամբողջ ժողովրդին, քանի որ կանայք և երեխաներ են դիտում եթերը:

Հասանլին պատասխանատվությունը վերագրել է նախագահ Իլհամ Ալիևին` ընդգծելով, որ հենց նա է «այդպիսի անբարոյականություն բերել ադրբեջանական քաղաքականության մեջ»: «Այդ պատճառով էլ Իլհամ Ալիևն Ադրբեջանը ղեկավարելու բարոյական իրավունք չունի», - ասել է Հասանլին: Ընդ որում` նա հավելել է, որ աշխարհում 40 տարուց ավել կառավարող երկու դինաստիա կա. մեկը Կիմ Իր Սենն է Հյուսիսային Կորեայում, իսկ մյուսը` Ալիևներն Ադրբեջանում:

«Աշխարհը փոխվել է: Ալիևյան դինաստիան և Ւլհամ Ալիևը պետք է հեռանան իշխանությունից», - ասել է Հասանլին: Այնուհետև, նա մի թուղթ է ցուցադրել, որտեղ, իր խոսքերով, նշված է Իլհամ Ալիևի կազմակերպության `Վիրջինյան կղզիներում գտնվող բանկային հաշիվը, որը գրանցվել է նրա պատգամավոր լինելու ժամանակ:

Ի պատասխան Ալիևի ներկայացուցիչ Սիյավուշ Նովրուզովը, Զահիդ Օրուջը և մյուսները Հասանլիին մեղադրել են հայկական աղբյուրներից վերցված տեղեկություն օգտագործելու և Ալիևին զրպարտելու մեջ:

Ադրբեջանական «Haqqin.az» լրատվական պորտալը նշում է, որ Հաֆիզ Հաջիևը Ջամիլ Հասանլիին մեղադրել է հայերի հետ բարեկամական կապ ունենալու մեջ` ընդգծելով, որ նրա դուրստրն ամուսնացել է հայկական ծագում ունեցող օտարերկրացու հետ:
Հեռուստաբանավեճերի ընթացքում Հասանլին բողոքել է, որ նրան ընդունում են որպես Ադրբեջանի ժողովրդական ճակատ կուսակցություն-Մուսավաթ միության մաս այն դեպքում, երբ իր թեկնածությունը սատարում է ուժերի մեծ կոալիցիա:
Իր խոսքերով` իր թեկնածությանը աջակցելու նպատակով գրանցվել է նաև իշխող «Ենի Ադրբեջան» («Նոր Ադրբեջան») կուսակցության մոտ 1500 անդամ:

«Թուրան»-ը նշում է, որ բանավեճերի ընթացքում նախագահի թեկնածու Իլյաս Իսմայլովի ներկայացուցիչ Մայիս Գյուլալիևն Արևմուտքին մեղադրել է Ադրբեջանի տնտեսական գաղութացման մեջ և կոչ է արել երկիրը փրկել Արևմտյան բանկերի և Արժույթի միջազգային հիմնադրամի բռնապետությունից:

Ազգային վերածնունդ կուսակցության առաջնորդ Ֆարիջ Գուլիևն իր հերթին հայտարարել է ԱՄՆ-ի, Իսրայելի և Թուրքիայի հետ հարաբերությունների խորացման մասին և միևնույն ժամանակ քողարկված կերպով մեղարդել է Ազգային խորհրդի առաջնորդին Ռուսաստանի հետ սիրախաղի և Ադրբեջանի անկախության դեմ ուղղված գործողությունների մեջ: