Ձեր վստահելի աղբյուրը

IDeA հիմնադրամը, որը միավորում է հայտնի գործարար և բարեգործ Ռուբեն Վարդանյանի ընտանիքը, ընկերներին ու համախոհներին, որոշել է աջակցել «Վիկիմեդիա Հայաստան» հասարակական կազմակերպությանը:

Հիմնադրամի մամուլի ծառայության տարածած հաղորդագրության համաձայն, այս տարվա օգոստոսին ստորագրված պայմանագրի համաձայն, IDeA հիմնադրամը աջակցում է «Վիքիմեդիա Հայաստան»-ի այն նախագծերին, որոնք ուղղված են Սյունիքի և Տավուշի մարզերում վիքի-նախագծերի առաջխաղացմանը և ազատ հանրագիտարանի նախագծերում մարզերի երիտասարդության ներգրավվմանը: Համագործակցության գլխավոր նպատակը հայերեն Վիքիպեդիայի որակական և քանակական ընդլայնումն է:

«IDeA հիմնադրամի հովանու ներքո իրագործվում են ռազմավարական բարեգործական նախաձեռնություններ` ուղղված կրթության և տուրիզմի զարգացմանը, ազգային ավանդույթների և հոգևոր վերածննդի ապահովմանը: Այս լույսի ներքո մենք կարևորում ենք հայերեն Վիքիպեդիայի զարգացումը՝ հայկական ժառանգությունը ցանցային տիրույթում արժանի կերպով ներկայացնելու համար»,- ասել է IDeA հիմնադրամի նախագահ Ռուբեն Վարդանյանը:

«Վիքիմեդիա Հայաստան» հասարակական կազմակերպության նախագահ Սուսաննա Մկրտչյանն ասել է, որ «IDeA հիմնադրամի հետ համագործակցության այս կարճ ժամանակահատվածում Գորիսում սեմինար էր կազմակերպվել «Վիքին սիրում է հուշարձաններ» մրցույթի շրջանակներում, որի շնորհիվ երիտասարդները վիքի- նախագծերին մասնակցելու որոշակի հմտություն են ձեռք բերել, իսկ ազատ հանրագիտարանը հարստացել է Սյունիքի և Տավուշի մասին պատմող հոդվածներով ու լուսանկարներով»:

Սյունիքի և Տավուշի մարզերի ընտրությունը պատահական չէ. այս մարզերում IDeA հիմնադրամն իրականացնում է լայնածավալ բարեգործական նախագծեր՝ Դիլիջանի միջազգային դպրոցը և «Տաթևի վերածնունդը»:

Հոկտեմբերի 5-ից 6-ը Հայաստանի Ամերիկյան համալսարանում կկայանա «Վիքիկոնֆերանս Երևան 2013»-ը, որը կամփոփի հայկական վիքի համայնքի տարեկան ձեռքբերումները և կմշակի վիքի-նախագծերի և ազատ բովանդակության զարգացմանն ուղղված նոր մոտեցումներ:

«Վիքիմեդիա Հայաստան»-ը ոչ առևտրային կազմակերպություն է, որը հիմնադրվել է 2013 թ. մայիսին և հանդիսանում է Վիքիմեդիա Հիմնադրամի հայաստանյան մասնաճյուղ։ Կազմակերպության նպատակն է խթանել վիքի-նախագծերի տարածումը և զարգացումը Հայաստանում և տարածաշրջանում, հանրայնացնել ազատ գիտելիքի գաղափարը։ 2013 թ. հոկտեմբերի 2-ի դրությամբ հայերեն Վիքիպեդիայում կար 97 հազար հոդված: