Ձեր վստահելի աղբյուրը

 Ադրբեջանում հոկտեմբերի 9-ին կայանալիք նախագահական ընտրությունները շարունակում են մնալ միջազգային լրատվամիջոցների ուշադրության կենտրոնում:

«Չնայած մի շարք խնդիրներին, Ադրբեջանի նախագահը մտադիր է շարունակել ղեկավարել»,-այս մասին գրում են «Ռոյթերս» և «World Bulletin» լրատվական գործակալությունները:

Ըստ վերոնշյալ աղբյուրներից ծաղկաքաղի ` պատկերը հետևյալն է.

«Ադրբեջանի 51-ամյա նախագահ Ալիևի ընդդիմադիրները նշում են, որ այլախոհների հանդեպ վերահսկողության պայմաններում նրանք քիչ հնարավորություններ ունեն Ալիևին թույլ չտալու երրորդ ժամկետով ընտրվել:

Իսկ նրա ընտրությունը կընդլայնի դինաստիական իշխանությունը. նա և իր հայրը` Հեյդար Ալիևը, մուսուլմանական այս պետությունը ղեկավարում են 1969թ-ից ի վեր:

Գտնվելով Իրանի և Ռուսաստանի միջև, Ադրբեջանը Եվրոպային էներգիա է մատակարարում և համարվում է տարանցիկ ճանապարհ Աֆղանստանում` ԱՄՆ զորքերի համար: Քննադատները պնդում են, որ այս ամենը Արևմուտքին ստիպում է աչք փակել իրավունքների մի շարք ոտնահարումների հարցում:

Դժգոհություններ կան առ այն, որ գնալով մեծանում է հարուստների և աղքատների միջև անդունը:

«Ես չեմ կարծում, որ այս երկրում ընտրությունների միջոցով փոփոխություններ տեղի կունենան, քանի որ այստեղ իրական ընտրություններ չեն լինում»,-նշել է բլոգեր Ադնան Հաջիզադեն:

Ադրբեջանում գործող Մարդու իրավունքների ակումբը հրապարակել է ցուցակ` բաղկացած 142 լրագրողներից, հոգևոր գործիչներից և իրավապաշտպաններից, ովքեր տվյալ պահին քաղաքական դրդապատճառներով ձերբակալված են Ադրբեջանում: Կազմակերպությունը համեմատության համար ընդգծում է, որ հունավարին Ադրբեջանում առկա քաղբանտարկյալների թիվը 60 էր»: