Ձեր վստահելի աղբյուրը

 «Եթե 2006թ-ին թեղուտցիները չէին հասկանում, թե Թեղուտի հանքի շահագործման հետևանքով ինչ խնդիրների առաջ կարող են կանգնել, ապա այսօր նրանք պարզ գիտակցում են, որ Թեղուտը գտնվում է օրհասական վիճակում»: Այս մասին այսօր լրագրողների հետ հանդիպման ժամանակ ասաց Թեղուտի բնակիչ Նարե Սմբատյանը:

Նրա խոսքերով` թեղուտցիներն արդեն զգում են հանքի շահագործման հետևանքները: «Թեղուտցիների հիմնական խնդիրը փոշին է. նրանք առավոտից երեկո շնչում են պայթեցումների հետևանքով առաջացած փոշին: Բացի այդ, Թեղուտում աղբյուրները ցամաքել են, ոռոգման և խմելու ջուրը պակասել է, մարդիկ չեն կարողանում ազատ տեղաշարժվել, անասուններին չեն կարողանում արոտավայրեր տանել, գյուղատնտեսությամբ զբաղվել»,-ասաց Ն.Սմբատյանը` թվարկելով Թեղուտում առկա խնդիրների մի մասը միայն:

Նա նշեց, որ հանքը շահագործող «Վալլեքս գրուպ» ընկերությունը դեռ 2006թ-ին թեղուտցիներին խոստացել էր, որ աշխատանքով կապահովի, սակայն այսօր նրանց քիչ տոկոսն է, որ աշխատանք ունի:

«Նրանք խոստացել էին, որ աշխատանքով կապահովեն, մինչդեռ այդ մարդկանց աշխատանքի չեն ընդունում, տարբեր գյուղերից են աշխատողներ բերում, իսկ ընդունելու դեպքում ցածր աշխատավարձեր են տալիս: Ընկերությունից թեղուտցիներին նաև ասել են` աշխատեք, թե ոչ, միևնույն է, հանքը շահագործվելու է: Եթե դուք չաշխատեք, սևամորթների կբերենք կաշխատեն»,- ասաց թեղուտցի Նարեն`հավելելով, որ Վալլեքսի նպատակն է, որպեսզի Թեղուտը մնա առանց թեղուտցիների:

Բնապահպան-ակտիվիստ Լևոն Ստեփանյանը նշեց, որ Թեղուտի հանքի շահագործումով խախտվել են մի շարք օրենքներ: «Այնքան օրենքներ են խախտվել, որ կարելի է քրեական գործ հարուցել»,- ասաց նա:

Ի դեպ, Լ.Ստեփանյանը հայտնեց, որ թեղուտցիները չեն կարողանում նույնիսկ իրենց սրբավայր գնան, քանի որ այնտեղ մուտք գործելու համար պետք է «անցաթուղթ» ունենան: «Հիմա հասկանում եք, թե Թեղուտը ինչ աղետալի վիճակում է գտնվում»,- ասաց նա:

Բնապահպան-ակտիվիստները հայտնեցին, որ հոկտեմբերի 10-ին երթ են կազմակերպելու` ի պաշտպանություն Թեղուտի: ՀՀ կառավարության շենքի մոտից կսկսվի երթը` դեպի «Վալլեքս գրուպ» և Բաղրամյան 26: