«Թշվառական գործողություններ են». Ռոբերտ Ամիրխանյանն արձագանքում է երիտասարդ կոմպոզիտորներին
«Հրահրված անձնավորություններ են, որոնց խոսքերը չեմ ուզում մեկնաբանել»,- այսպես արձագանքեց Հայաստանի Կոմպոզիտորների և Երաժշտագետների միության նախագահ Ռոբերտ Ամիրխանյանը Panorama.am-ի հարցին, թե ինչպե՞ս կմեկնաբանեք երիտասարդ կոմպոզիտորների դժգոհությունները, մտահոգությունները, որ նրանք բարձրաձայնել են նամակի միջոցով: Նշեց, որ չի էլ ցանկանում լսել, թե ինչ է գրված նամակում, ինչից են դժգոհ:
Նշենք, որ այսօր Երիտասարդ կոմպոզիտորները նամակ էին տարածել, որտեղ նշված էր. ««Երիտասարդ կոմպոզիտորներն իրենց մտահոգությունն են հայտնում Հայաստանի Կոմպոզիտորների և Երաժշտագետների Միությունում (ՀԿԵՄ) արդեն տարիներ շարունակվող անհուսալի իրավիճակի կապակցությամբ: Մեզ անհանգստացնում է փաստը, որ արդեն երկրորդ անգամ ՀԿԵՄ նախագահ Ռոբերտ Ամիրխանյանը գրեթե երեք տարի ուշացումով է անցկացնում ՀԿԵՄ նախագահի ընտությունները: Իսկ վերջին համագումարից հետո, որը տեղի է ունեցել 2009 թվականին, անգամ վարչություն չի ընտրվել, այսինքն՝ գրեթե հինգ տարի ՀԿԵՄը ղեկավարվում է ինքնիշխան, ինչի պարզ հետևանքն են ներկայիս խնդիրները: Վերջին տարիներին վարվող երաժշտական հետամնաց քաղաքականության արդյունքում մի շարք երիտասարդ կոմպոզիտորներ անիմաստ են համարում անդամագրվել ՀԿԵՄ-ին, քանզի այն զրկված է ժամանակակից հայացքներից, կրեատիվ նախաձեռնություններից և չունի գործող իրավաբանական համակարգ: Մինչդեռ կոմպոզիտորներից շատերն արդեն տարիներ շարունակ ապրում և ստեղծագործում են արտերկում՝ առնչվելով և համագործակցելով տարբեր ստեղծագործական կառույցների հետ: Նրանց համոզումն է, որ ներկայիս Միության գործելակերպը խիստ անհեռանկարային է նոր զարգացումների ասպարեզում, ինչն անմիջականորեն կապված է ներկայիս ղեկավարության հետ:
Առկա է նաև Դիլիջանի ստեղծագործական տունը իր հիմնադրի՝ Էդուարդ Միրզոյանի անունով անվանակոչության հարցը: Միության նախագահը գրեթե մեկ տարի առաջ նշել էր, որ որոշում կայացնելու համար հարկավոր է ընդամենը ժողով կազմակերպել, ինչը փաստորեն նրա համար մինչ այսօր անհնար եղավ: Հարց է ծագում՝ եթե միության անդամների մեծ մասն արդեն իսկ տվել է իր համաձայնությունը, և եթե հայտնի է, որ այդ ժամանակահատվածում արդեն իսկ հրավիրվել է ՀԿԵՄ «վարչության» նիստ, ապա ո՞րն է պատճառը, որ անվանակոչման հարցը դեռևս լուծում չի ստանում:
Միության ներքո կազմակերպվող սակավաթիվ համերգները վաղուց արդեն անհետաքրքիր են և դարձել են ինքնանպատակ: Միությունը գրեթե անգործության է մատնված և այդ պատճառով էլ կորցրել է իր դերը մշակութային կյանքում: Ավելորդ է ասել, որ նոր տեխնոլոգիաններն այս կառույցին ամբողջովին անհաղորդ են մնում: Ցավոք պետք է նշել, որ չեն օգտագործվում նաև Միության եղած միջոցները` կոմպոզիտորների միության շենքն իր երգեհոնային դահլիճով, Դիլիջանի ստեղծագործական տունը և այլն, որոնք կարելի էր ծառայեցնել մի շարք հրաշալի ծրագրերի, ինչը երիտասարդները դժվարությամբ փորձում են անհատապե՛ս կյանքի կոչել:
Հաշվի առնելով այս և այլ հանգամանքները՝ գտնում ենք, որ պետք է տեղի ունենա ներկայիս նախագահի փոփոխություն, և կոչ ենք անում Միության անդամներին Համագումարի ընտրության ժամանակ քվեարկել ընդդիմադիր թեկնածուի օգտին: Հակառակ դեպքում սերնդափոխության հարցը կշարունակվի մնալ արդիական, ինչով և ՀԿԵՄ-ի գործունեությունն ապագայում վերջնականապես կիմաստազրկվի»:
«Թշվառական գործողություններ են, նրանց խնդիրն է ամեն գնով այստեղ ունենալ ուրիշ մարդ առանց ռեալության աստիճանի: Իսկ Կոմպոզիտորների միության խնդիրը իրագործում են միայն միության անդամները»,- ասաց Ռ. Ամիրխանյանը: Նա նաև հավելեց, որ իրեն չի հետաքրքրում, թե ինչ է նշված նամակում, նշեց, որ եթե որևէ բան ունեն ասելու, թող գան միություն: «Ի՞նչ է նշանակում հրապարակայնորեն պախարակել ինձ, նվաստացնել, վերագրել անհավանական գործարքներ, որոնց համար ինձ պետք էր հենց հիմա գնդկահարել: Պարկեշտ մարդ ես՝ արի միություն, ասա այսպիսի խնդիր ունեմ, փորձենք լուծել: Ի՞նչ է նշանակում հրապարակավ մեկին մեղադրել գողության, անազնվության մեջ»,- ասաց Ռ. Ամիրխանյանը:
Նշենք, որ Կոմպոզիտորների և Երաժշտագետների միության համագումարը կայանալու է հոկտեմբերի 26-ին:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
