«Բիո», «Էկո», «Օրգանական» անվանումներով մթերքներ արտադրող ընկերությունները մոլորեցրել են սպառողներին. նրանք նախազգուշացվեցին
ՀՀ Տնտեսական մրցակցության պաշտպանության պետական հանձնաժողովը լայնածավալ ուսումնասիրություն է իրականացրել «Էկոլոգիապես մաքուր արտադրանք», «Բիո», «Էկո», «Օրգանական» և նման անվանումներով մթերքների արտադրության ոլորտում, պարզելու, թե որքանով են բարեխիղճ գործում արտադրող ընկերությունները: ՏՄՊՊՀ-ի այսօրվա նիստում ներկայացվեցին ուսումնասիրության արդյունքները:
Նիստում նշվեց, որ մի քանի ամիսների ընթացքում ուսումնասիրվել է պարենային ապրանքների ողջ շուկան և հայտնաբերվել է, որ տասնյակ դեպքերում նման անվանումները ունեն սպառողին մոլորեցնելու միտում: Խախտումներ են հայտնաբերվել մասնավորապես հացի, հրուշակեղենի, մեղրի, պահածոների, ձավարեղենի, թեյի և այլ շուկաներում: ՏՄՊՊՀ ուսումնասիրություններով պարզվել է, որ ընկերությունները, իրենց արտադրանքի վերաբերյալ սպառողին տրամադրել են ակնհայտորեն իրականությանը չհամապատասխանող տեղեկատվություն:
Համաձայն օրենսդրության, արտադրանքի մակնշման մեջ, ինչպես նաև գովազդում կարող է նշվել «օրգանական», «էկոլոգիական», «էկոլոգիապես մաքուր», «բիոլոգիական» տերմինները, եթե այն համապատասխան սերտիֆիկացում անցած արտադրանք է: Սակայն, ի պատասխան Հանձնաժողովի պահանջի, վերոնշյալ ընկերություններից որևէ մեկը հավաստման փաստաթուղթ չի ներկայացրել: Սակայն տնտեսվարողներն ու սպառողները պետք է հիշեն, որ ձեռնարկատիրական գործունեության ցանկացած գործողություն, որը մոլորեցնում է կամ կարող է մոլորեցնել հասարակությանը տնտեսվարողի առաջարկած ապրանքների վերաբերյալ, համարվում է անբարեխիղճ մրցակցության գործողություն: Ուստի, տնտեսվարողը պարտավոր է օրենքի պահանջին համապատասխան, արտադրանքի վերաբերյալ սպառողին տրամադրել ամբողջական և հավաստի տեղեկատվություն:
Նիստում նշվեց նաև, որ դիտանցումների արդյունքում բացահայտվել է, որ անբարեխիղճ վարքագիծ են դրսևորել հետևյալ ընկերությունները. «Թալին Ֆուդ»,«Կալաչ»,«Կոնսեր», «Արմավիրի պահածոների գործարան «Նյու Վեյվ», «Ռաֆայել Քոնթինի Թրեյդինգ Քամփնի», «ԱՁ Գ. Հյուսյան» և «Ամառտի»:
ՏՄՊՊՀ որոշմամբ, վերոնշյալ օրինախախտ ընկերություններին տրվեց խիստ նախազգուշացում՝ 10 օրյա ժամկետում խախտումները վերացնելու հանձնարարականով:
«Արմավիրի պահածոների գործարան «Նյու Վեյվ» ընկերության ներկայացուցիչ Աշոտ Ադուլյանը նշեց, որ իրենք չեն մտածել, որ սպառողին մոլորության մեջ են գցում, եթե իմանային, բնականաբար, նման խնդիր չէր լինի: «Խոստանում ենք, որ շատ արագ կվերացնենք այդ խնդիրը»,- ասաց նա:
ՏՄՊՊՀ նախագահ Արտակ Շաբոյանի խոսքերով` ուսումնասիրության նպատակն էր պարզել, թե այն ապրանքները, որոնց վրա նշված է «Էկո», «Բիո» անվանումները, արդյոք համապատասխանում են իրականությանը, թե՞ պարզապես դա արվում է, որպեսզի մյուս տնտեսվարողների նկատմամբ մրցակցային առավելություն ստանան: Արդյունքում պարզվել է, որ շատ դեպքերում այն իրականությանը չի համապատասխանում և շատ ժամանակ ձևական բնույթ է կրում: «Նրանց արարքը որակվել է որպես անբարեխիղճ մրցակցություն: Սակայն տնտեսվարողները պատճառանել են, որ սա օրենսդրության չիմացության արդյունք է, ուստի հաշվի առնելով, որ միգուցե տնտեսվարողները տեղյակ չեն օրենսդրության պահանջներին, Հանձնաժողովը այս անգամ մեղմ է մոտենում` պայմանով, որ այս տնտեսվարողները մի քանի օրվա ընթացքում կվերացնեն խախատումները»,- ասաց Ա.Շաբոյանը: Սակայն, նա միաժամանակ նշեց, որ եթե խախտումները նորից կրկնվեն, բնականաբար, ֆինանսական տուգանքներ կկիրառեն:
Ա.Շաբոյանը տեղեկացրեց, որ ՏՄՊՊՀ-ն վերոնշյալ խնդրի հետ կապված ուսումնասիրել է նաև ոչ պարենային ապրանքների շուկան: Պարզվել է, որ մաքրող և լվացող միջոցների, սանիտարահիգիենիկ նշանակության ապրանքների պարագայում ևս կիրառվում են «Բիո» և «Էկո» հասկացությունները: Սակայն օրենսդրությունը այս տեսակի ապրանքների մասով հստակ կանոնակարգված չէ և կարիք կա լրացումների: Խնդրի կանոնակարգման հետ կապված Հանձնաժողովը հանդես կգա օրենքում համապատասխան փոփոխություններ կատարելու առաջարկով:
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
