Ձեր վստահելի աղբյուրը

 Ադրբեջանի Հանրային հեռուստաընկերության եթերում կայացել են նախագահի թեկնածուների եզրափակիչ` թվով 9-րդ բանավեճերը, որոնց գործող նախագահ Իլհամ Ալիևն այդպես էլ չի մասնակցել, նշում է ադրբեջանական «Թուրան» լրատվական գործակալությունը:

Հեղինակը նշում է, որ Ժողովրդավարական ուժերի ազգային խորհրդի նախագահի թեկնածու Ջամիլ Հասանլին, այդ հանգամանքը նկատի ունենալով, հեգնել է, ասելով որ ընտրողները «շատ բան չեն կորցրել» դրանից, քանի որ Ալիևն ինտելեկտով շատ չի տարբերվում իր «վստահված անձանցից»:

Դա վրդովեցրել է «Ժամանակակից Մուսավաթ» կուսակցության ղեկավար Հաֆիզ Հաջիևին, ով հերթական անգամ Ջամիլ Հասանլիին անվանել է «հայի աներ»: Հասանլին իր հերթին հիշեցրել է, որ 1996թ. Հաջիևին ձերբակալել են հենց այն բանի համար, որ վերջինս հայտարարել է Հեյդար Ալիևի մոր` հայ լինելու փաստի մասին: Գործակալությունը նշում է, որ այդ միջադեպից հետո Հաջիևը կարմրել է, նյարդացել և, իր ժամանակն օգտագործելով, խոսել է միևնույն բանի մասին` «Հասանլին, Ալի Քերիմլին, Իսա Գամբարը դավաճաններ են, ժողովուրդը նրանց չի սատարում»:

Հասանլին, իր ելույթում կարճ թեզեր օգտագործելով, նվիրել է սեփական ծրագրին` հաղթանակի դեպքում ոսկե համաներում խոստանալով: Բացի այդ, նա խոստացել է կրկնակի նվազեցնել լույսի, գազի, ջրի համար նախատեսված վճարները, չեղյալ հայտարարել Ադրբեջանում մնալու սահմանափակումը Վրաստանի` ազգությամբ ադրբեջանցի քաղաքացիների համար, 2-3 անգամ բարձրացնել ուսուցիչների, բժիշկների, պետական ծառայողների աշխատավարձերը, թոշակները, 20 անգամ մեծացնել հիպոթեկի հիմնադրամը, ինչպես նաև երիտասարդության համար նվազեցնել հիպոթեկային կրեդիտները:

«Ազատություն» ռադիոկայանը հայտնում է, որ «Ումիդ» կուսակցության նախագահի թեկնածու Իգբալ Ագազադեն վստահ է, որ ընտրողները Ադրբեջանի իշխանությանը դեմ կքվեարկեն, քանի որ այդ իշխանության հաղթանակի դեպքում ոչինչ չի փոխվի երկրում: Թոշակառուների վիճակը չի բարելավվի, կոռուպցիայի մակարդակը չի նվազի:
«Ադալյատ» կուսակցության նախագահի թեկնածու Իլյաս Իսմայիլովն իր ելույթում Ադրբեջանին սպառնող վտանգներց մեկը համարել է կոռուպցիան, ինչը կազմալուծում է հասարակությունը:
«Այսօր բնակչության հարուստ շերտը ոչ թե գործարարներն են, այլ պաշտոնյաները: Կարծում եմ անհրաժեշտ է, որ պաշտոնյաներին գործարարությամբ զբաղվելն արգելող օրենք ընդունվի: Առաջին հերթին, պաշտոնյաները պետք իրենց եկամուտների և ծախսերի վերաբերյալ զեկույց ներկայացնեն: Դա կոռուպցիայի դեմ պայքարի միջոցներից մեկն է: Երկրում անպայման պետք է անկախ դատական իշխանություն ձևավորվի», - ասել է Իլյաս Իսմայիլովը: