Ձեր վստահելի աղբյուրը

 Ադրբեջանը պատրաստվում է անկախության ձեռք բերումից ի վեր վեցերորդ ընտրություններին, և 20 տարվա ընթացքում այդ երկրում դեռ որևէ ընտրություն արդար և թափանցիկ չի անցել, գրում է բրիտանական «BBC» հեռարձակող ընկերությունը: Ըստ նյութի` չնայած ընդդիմությունը միավորվել է մեկ թեկնածուի` Ջամիլ Հասանլիի շուրջ, համընդհանուր կարծիքի համաձայն` դա չի ազդի ընտրության արդյունքների վրա, և Իլհամ Ալիևը երրորդ անգամ կվերընտրվի:

«BBC»-ն նշում է, որ Ադրբեջանի իշխանությունը երկու ուժեղ թեկնածուների` Ռուստամ Իբրահիմբեկովի և Իլգար Մամեդովի համար ընտրություններում մասնակցելու խոչընդոտներ է ստեղծել: Իլհամ Ալիևը նախընտրական քարոզարշավի ժամանակ մեծ աջակցություն է ստացել ԶԼՄ-ների կողմից, մինչդեռ ընդդիմությունը զրկված էր նման հնարավորությունից: Ընդդիմությունը հայտարարում է, որ հեռուստաընկերությունների մեծամասնությունն իշխանության ճնշման պատճառով նախընտրել է ընդդիմությանը եթեր չտրամադրել, նշված է հրապարակման մեջ:

«The Washington Times» պարբերականը նկատում է, որ չնայած Ադրբեջանի ընտրությունները հետաքրքրում են ԱՄՆ-ին, հազիվ թե որևէ ամերիկացի կարողանա ճիշտ գրել այդ երկրի անունը կամ առաջին անգամից գտնել այն աշխարհի քարտեզի վրա: Հոդվածի հեղինակը գրում է, որ երրորդ ժամկետի համար առաջադրված Իլհամ Ալիևն իր հորից` Հեյդար Ալիևից ժառանգել է նավթով հարուստ և կոռուպցիայի մեջ խրված երկիր: «Արաբական գարունը», Մերձավոր Արևելքում և Հյուսիսային Աֆրիկայում տեղի ունեցած ժողովրդավարական շարժումներն ամենայն հավանականությամբ վախեցրել են Ալիևի կառավարությանը, ընդգծում է հեղինակը: Նշվում է, որ Ադրբեջանի իշխանությունը սոցիալական կայքերում մեծաքանակ հետևորդներ ունեցող մի շարք երիտասարդ ակտիվիստների է ձերբակալել:

«Ազատություն» ռադիոկայանի ռեպորտաժի համաձայն` ամեն ինչ մատնանշում է նրան, որ Ադրբեջանի գործող նախագահ Իլհամ Ալիևը կվերընտրվի երրորդ հնգյամյա ժամկետով: «Դինաստիայի ժառանգը հաղթանակ կտանի երրորդ ժամկետի մասին վիճելի, սակայն սահմանադրությամբ ամրագրված դրույթի հիման վրա», - գրում է ռադիոկայանը` նշելով, որ Իլհամ Ալիևը միլիոնավոր նավթադոլարների անսահմանափանակ հնարավորություն ունի:

Ռադիոկայանը հիշեցնում է, որ այնպիսի միջազգային կառույցներ, ինչպիսին են ՄԱԿ-ը, Եվրամիությունը և ԵԱՀԿ-ն, իրենց անհանգստությունն են արտահայտել Ադրբեջանում նախընտրական շրջանում ակտիվիստների, լրագրողների և ընդդիմադիր քաղաքական գործիչների վրա գործադրվող «շարունակական ճնշման» վերաբերյալ: «Ընդդիմադիր Ազգային խորհրդի անդամները հայտարարում են, որ արդար ընտրությունների դեպքում իրենք հաղթանակ կտանեն, սակայն դա դժվար է ստուգել մի երկրում, որն ընտրությունների համար անընդհատ ցածր գնահատականներ է ստանում», - ասվում է նյութում:

«Huffington Post»-ը գրում է, որ հենց Իլհամ Ալիևի նախագահության շրջանում սկսվեց Ադրբեջանում մարդու իրավունքների հետ կապված իրադրության վատթարացումը: Հոդվածի հեղինակի խոսքերով` այս երկրում մարդու իրավունքների խախտումներն արդեն վաղուց լուրջ խնդիր են հանդիսանում, սակայն դրանք հատկապես ուժեղացել են նախընտրական ժամանակաշրջանում: «Նախագահի և նրա կառավարության հասցեին ուղղած քննադատությունը պատժվում է. նրանք, ովքեր կիրառում են խոսքի ազատության իրենց իրավունքը, հաճախ պատասխան են տալիս ազատազրկմամբ, ֆիզիկական անվտանգությամբ և անձնական կյանքի իրավունքով», - գրված է հոդվածում:

Ադրբեջանի ընտրությունների կանխատեսմամբ է հանդես եկել նաև բրիտանացի լրագրող, Քարնեգի հիմնադրամի Կովկասի հարցերով ավագ գիտաշխատող Թոմաս դե Վաալը: Նա կարծում է, որ Իլհամ Ալիևի վերընտրումը կասկածից դուրս է: Ամենակարևոր խնդիրներից մեկը, որին Իլհամ Ալիևը կբախվի երրորդ հնգամյա ժամկետի ընթացքում, ըստ փորձագետի, նավթային բումի ավարտն է: Արտաքին քաղաքականության հարցերի` մասնավորապես Ղարաբաղյան խնդրի համատեքստում, դե Վաալը կարծում է, որ դրությունն անփոփոխ կմնա, կպահպանվի «ոչ պատերազմ, ոչ խաղաղություն իրավիճակը»:

Լրագրողը նաև ընդգծում է, որ «Ադրբեջանը ժողովրդավարական երկիր չի հանդիսանում` չնայած անցկացվող ընտրություններին»: «Ընդդիմությունը դժվար պայմաններում է գործում: Վերջին տարվա ընթացքում տարակարծությունը խստորեն ճնշվում էր: Մի քանի ակտիվիստներ ձերբակալվել են: Ընդդիմադիր կուսակցութունները չեն կարողացել հանրահավաքներ կազմակերպել», - հավելում է դե Վաալը: