Ձեր վստահելի աղբյուրը

«Չտեսանք համախմբված ուժեղ ընդդիմություն, և դա է դրդապատճառներից մեկը, որ մենք փորձում ենք վերականգնել այն քաղաքական ուժը, որում գործել ենք տարիներ շարունակ: Հոկտեմբերի 26-ին անցկացնելու ենք Հայոց համազգային շարժման հիմնադիր համագումարը: Կփորձենք ընդդիմության բացը լրացնել»,- այսօր լրագրողների հետ հանդիպմանն անդրադառնալով Հայաստանում ընդդիմության գործունեությանը և Մաքսաին միությանը միանալու հարցում ոչ միասնական դիրքորոշմանը, նման տեսակետ հայտնեց ՀՀՇ կուսակցության նախաձեռնող խմբի անդամ Արարատ Զուրաբյանը:

Նա դժվարացավ նշել այն պատճառները, թե ինչու ԵՄ հետ Ասոցացման համաձայնագրի ստորագրմանը կողմ ընդդիմադիր ուժերը չմիավորվեցին, սակայն հույս հայտնեց, որ, այնուամենայնիվ, կլինի որոշակի միավորում:

«Ընդդիմության զգալի հատվածը պրոռուսական ուժեր են: Ընդդիմադիր դաշտը չի կարող այսպիսին մնալ: Եթե Հայաստանում շարունակվի ընդդիմության այս վիճակը, Հայաստանն ընդհանրապես կգնա կործանման: Տեսեք, ԱԺ-ում մի փոքր քվեարկություն էր և որքան հարցերի պատասխանեց այդ փոքր քվեարկությունը: Եթե այս պայմաններում երկրում սկսում է գոյություն չունենալ լուրջ ընդդիմություն, երկիրը դատապարտված է»,- նշեց Ա. Զուրաբյանը:

Մանրամասնելով իր դիրքորոշումը ԱԺ-ում գլխավոր դատախազի ընտրության ժամանակ ընդդիմության քվերակության վերաբերյալ` բանախոսը համոզմունք հայտնեց, որ «նման ծանր դեպք պատկերացնել հնարավոր չէ»:

«Շատ նորմալ կգնահատեի, եթե հայտարարեին, որ մենք կողմ ենք քվեարկելու, բայց երբ հայտարարում են, որ դեմ են և մտածում են, թե կլինեն այլ դեմ քվեներ ու չի երևա, թե ով է դեմ քվեարկել, արձանագրում ենք այն իրողությունը, որ արձանագրել ենք: Մի քիչ անլուրջ է: Կարծում եմ, որ քաղաքական գործունեության մեջ մարդիկ պետք է բաց լինեն, անեն այն, ինչ հայտարարում են, սակայն, ցավոք սրտի, ականատես ենք այլ իրողության»,- ընդգծեց նա:

Անդրադառնալով հարցին, թե նոր ՀՀՇ կուսակցության հիմնադրման դեպքում արդյոք անվան հետ կապված իրավական խնդիրներ չկա՞ն, բանախոսը պնդեց, որ ոչ, քանի որ ՀՀՇ-ն վերանվանվեց ՀԱԿ կուսակցության:

«Եթե ՀՀՇ-ն փակվեր, ապա իրավական խնդիր էր առաջանում, ինչ-որ ժամկետ կա, որ պետք է անցնի նույն անունը օգտագործելու համար: Սակայն ՀՀՇ-ն վերանվանվեց և դարձավ ՀԱԿ, որից հետո նրանք անցկացրեցին համագումարը: Ճշտել ենք Արդարադատության նախարարության պաշտոնյաներից, և որևէ խոչընդոտ չկա»,- փաստեց բանախոսը:

Panorama.am-ի հարցին, թե կա՞ արդյոք իրավահաջորդության խնդիր և նորաստեղծ ՀՀՇ-ն կարո՞ղ է վիճարկել նախկին ՀՀՇ-ի իրավունքները, մասնավորապես միջազգային կառույցներում` Եվրոպայի լիբերալ–դեմոկրատական և ռեֆորմիստական կուսակցությանում անդամակցությունը, Ա. Զուրաբյանը օրինակ բերեց ընտանիքը և նշեց, որ ծնողի, այսինքն` ՀՀՇ-ի բոլոր երեխաներն էլ կարող են լինել իրավահաջորդ:

«Չեմ կարծում, թե ՀԱԿ-ն ու ՀՀՇ-ն պետք է մրցակցեն իրար հետ, որովհետև մրցակցելու առանձնապես բան չունենք: Կան հարցերում հակասություններ, սակայն կան շատ հարցերում միասնական մոտեցումներ: Կարծում եմ` ևս մեկ անգամ մենք կդիմենք անդամակցության համար միջազգային կառույցներին, և բարդություններ չեն լինի», ասաց Արարատ Զուրաբյանը: