Ձեր վստահելի աղբյուրը

 Ժամը 23.20-ի դրությամբ (Բաքվի ժամանակով) Ադրբեջանի ԿԸՀ-ի նախնական տվյալների համաձայն, հանրապետության գործող նախագահ Իլհամ Ալիևը հաղթանակ է տարել հոկտեմբերի 9-ին կայացած ընտրություններում: Ինչպես նշված է ԿԸՀ-ի կայքում՝ Ադրբեջանի գործող նախագահի օգտին քվեարկել է ընտրողների 84,68%-ը (1159760 անձ):

Նախնական տվյալների համաձայն, երկրորդ տեղում է ընդդիմադիր Ժողովրդավարական ուժերի ազգային խորհրդի միասնական թեկնածու Ջամիլ Հասանլին: Վերջինս հավաքել է ընտրողների ձայների 4,74%-ը:

Երրորդ տեղը զբաղեցնում է «Ումիդ» կուսակցության ղեկավար Իգբալ Ագազադեն, ով հավաքել է 2,33% ձայն, ինքնառաջադրված Զահիդ Օրուջը՝ 1,63%, Ադրբեջանի միասնական ժողովրդական ճակատ կուսակցության ղեկավար Գուդրատ Հասանգուլիևը՝ 2,16%, «Ժամանակակից Մուսավաթ» կուսակցության ղեկավար Հաֆիզ Հաջիևը՝ 0,66%, Ադրբեջանի Սոցիալ-դեմոկրատական կուսակցության ղեկավար Արազ Ալիզադեն՝ 0,92%, Ազգային վերածնունդ կուսակցության ղեկավար Ֆարիջ Գուլիևը՝ 0,95%, «Ադալյատ» կուսակցության ղեկավար Իլյաս Իսմայլովը՝ 1,26% և Ադրբեջանի ժողովրդավարական կուսակցության ղեկավար Սարդար Ջալալօղլուն՝ 0,66%:

Ըստ ԿԸՀ տվյալների` Բաքվի ժամանակով 19:00-ի դրությամբ 5 միլիոն 145 հազար ընտրողներից քվեարկել է 3 720 643-ը (72,31 %):

Նշենք, որ «Մուսավաթ» կուսակցության առաջնորդ Իսա Գամբարը, Ադրբեջանի ժողովրդական ճակատ կուսակցության ղեկավար Ալի Քերիմլին, Ադրբեջանի ժողովրդավարական կուսակցության ղեկավար Սարդար Ջալալօղլուն և «EL» շարժման առաջնորդ Էլդար Նամազովը քվեարկության ընթացքում հայտարարել են նախագահական ընտրություններում գրանցված «բացարձակ խախտումների» և կեղծումների մասին: Ազգային խորհրդի թեկնածու Ջամիլ Հասանլին, մատնանշելով ընտրությունների ընթացքում կատարված զանգվածային խախտումները, դրանց պատասխանատվությունը վերագրել է գործող նախագահ Իլհամ Ալիևին: Ջամիլ Հասանլիի շտաբը պարբերաբար հրապարակել է ընտրությունների ընթացքում տեղ գտած խախտումները (քվեաթերթիկների լցոնումները, «կարուսելները» և այլն) մանրամասնորեն լուսաբանող հաղորդագրութուններ:

Այն բանից հետո, երբ Ադրբեջանի ԿԸՀ հայտարարեց ընտրությունների ավարտի մասին, Ջամիլ Հասանլին հանդես եկավ ընտրությունների կեղծման մասին հայտարարությամբ, որտեղ նշվում է, որ Ազգային խորհուրդը չի ընդունում ընտրության արդյունքները:

«Թուրան» լրատվական գործակալությունը, «Ազատություն» ռադիոկայանի ադրբեջանական ծառայությունը և «Minval.az» կայքը ընտրությունների ընթացքում գրանցված խախտումների մասին (սպառնալիքներ, ծեծ, Ազգային խորհրդի դիտորդի առևանգում) տեղեկատվություն, լուսանկարներ և տեսագրություններ են հրապարակել:

Հիշեցնենք, որ Ադրբեջանի գործող նախագահ Իլհամ Ալիևն այդ պաշտոնը զբաղեցնում է արդեն երկու ժամկետով` 2003թ-ից ի վեր: Նախորդ նախագահական ընտրությունները կազմակերպվել էին 2008թ. հոկտեմբերի 15-ին: 2009թ. մարտին Ադրբեջանում հանրաքվե է կազմակերպվել Սահմանադրության մեջ փոփոխություններ մտցնելու նպատակով: Ըստ այդ փոփոխությունների, միևնույն անձը կարող է նախագահի պաշտոնը զբաղացնել ավելի քան երկու իրար հաջորդող ժամկետով: Եվրոպայի Խորհրդի Վենեցիայի հանձնաժողովն այդ կապակցությամբ ասել է. «Մեկ անձին նախագահի պաշտոնում բազմիցս ընտրվելու հնարավորություն տալը գնահատվում է որպես ժողովրդավարության զարգացման գործում հետ քայլ»:
 

Նախորդիվ` 

Այս ընտրություններն ամենակեղտոտն են Ադրբեջանի պատմության մեջ. լցոնումներ, ծեծեր, հափշտակումներ և սպառնալիքներ

Մասնակցության ցուցանիշն Ադրբեջանում հրապարակվել է օրենքի խախտմամբ

Ընտրություններն Ադրբեջանում. ԿԸՀ հրապարակած ցուցանիշները բազմաթիվ հարցեր են առաջացնում

Ադրբեջանի նախագահական ընտրությունների տարօրինակ ընթացքը շարունակվում է

Ադրբեջանում ընտրությունների արդյունքները «կազմվել են» Excel-ի օգնությամբ (Լուսանկար)

Ադրբեջանում նախագահական ընտրությունները, մեղմ ասած,տարօրինակ ընթացք են արձանագրում