Ձեր վստահելի աղբյուրը

 Այսօր Ադրբեջանում անցկացվում են նախագահական ընտրություններ, որտեղ գործող նախագահ Իլհամ Ալիևը հավանաբար հաղթանակ կտանի լուրջ մրցակիցների բացակայության պատճառով, գրում է բրիտանական «BBC» հեռարձակող ընկերությունը: Ռեպորտաժում նշվում է, որ Ալիևն ինքն իրեն չի անհանգստացրել նույնիսկ նախընտրական քարոզարշավ անցկացնելու համար:

«Նա ճնշում է տարակարծությունը և երրորդ անգամ առաջադրվել թույլատրող սահմանադրական բարեփոխումներ է ընդունել: Իրավապաշտպանները պնդում են, որ Ադրբեջանում ճնշումներն ընթացիկ ընտրությունների նախաշեմին աննախադեպ մասշտաբներ են ընդունել», - նշում է ռեպորտաժի հեղինակը: Ըստ «BBC»-ի`երկրում ընտրություններից առաջ վախի և անտարբերության մթնոլորտ է տիրել:

Գերմանական «Deutsche Welle» պարբերականն ընդգծում է, որ ըստ քննադատների` չնայած հոկտեմբերի 9-ին Ադրբեջանում չեն լինի ազատ և արդար նախագահական ընտրություններ, Արևմուտքից բարձրագոչ քննադատություն սպասել պետք չէ, քանի որ «Բրյուսելի և Բաքվի հարաբերությունները սահմանում է էներգետիկան»: Բեռլինի «Գիտություն և քաղաքականություն» հիմնադրամի փորձագետ Ուվե Հալբախը «Deutsche Welle»-ի հետ զրույցում ասել է, որ ընթացիկ ընտրություններն ուղեկցվում են «ԶԼՄ-ների հրապարակումների մեջ նախագահի գերակայությամբ, ընդդիմադիր ուժերի հանդեպ կիրառվող կոշտ ուժերով, հավաքվելու ազատության սահամափակումով»:

Ըստ «Ամերիկայի ձայնի»` Ադրբեջանի այս ընտրություններում անակնկալներ հազիվ թե կլինեն: «Վերջին 44 տարվա ընթացքում երկրի առաջնորդի ազգանունը Ալիև է: Սկզբում Հեյդար Ալիևն էր, ով 32 տարի ղեկավարել է Ադրբեջանը, այժմ նրա որդի Իլհամն է», - նշում է ռադիոկայանը:

Ռեպորտաժի համաձայն` իշխանության ղեկը զբաղեցնելու 10 տարվա ընթացքում Իլհամ Ալիևն աստիճանաբար մեծացրել է իր օգտին գրանցվող ձայների քանակը: «2003թ. նրա համար քվեարկել է ընտրողների 76 տոկոսը, իսկ 2008-ին` արդեն 87 տոկոսը: Վերջին խորհրդարանական ընտրությունների արդյունքում խորհրդարանի բոլոր մանդատները զբաղեցրել են նախագահի կողմնակիցները», - գրում է «Ամերիկայի ձայնը»:

Նախօրեին «The Guardian» պարբերականը հրապարակել է ադրբեջանական ընդդիմության միասնական թեկնածու Ջամիլ Հասանլիի հոդվածը, որտեղ վերջինս հայտարարում է, որ «այն պահից ի վեր, երբ Իլհամ Ալիևն իր հորից` Հեյդար Ալիևից, ժառանգել է իշխանությունը, երկիրը մխրճված է կոռուպցիայի մեջ, իսկ իշխող վարչակարգն ավելի ավտորիտար և ճնշող է դարձել»:
«Ալիևը երբեք չի հաղթել ազատ և արդար ընտրություններում, և նա գիտի, որ չի կարող հաղթել նաև այս անգամ: Ադրբեջանում ընտրություններն ու հանրաքվեներն ուղեկցվում են մեծաքանակ խախտումներով և կեղծումներով: Երկրի բոլոր ընտրական հանձնաժողովներն իր վերահսկողության տակ վերցնելով` ալիևյան վարչակարգը սկսել է ավելի ինտենսիվորեն հետապնդել անկախ ԶԼՄ-ները, ընդդիմությանը և քաղաքացիական հասարակությանը`ստիպելով միջազգային իրավապաշտպան կազմակերպություններին և ԵՄ-ին դատապարտել և անհանգստություն արտահայտել», - իր հոդվածում նշում է Հասանլին և Լեռնային Ղարաբաղն անվանում «վիճելի տարածք»:

«Քաղաքացիական համերաշխություն» միջազգային հարթակը (Civic Solidarity Platform) «Ադրբեջանի ընտրությունների մասին հինգ փաստ, որոնց մասին Ալիևը չի ցանկանում, որ դուք իմանաք» վերնագրով հոդված է հրապարակել: Հոդվածում նշվում է, որ այդ երկրում մարդու իրավունքների իրադրությունն ավելի վատ է, քան երբևէ: Ըստ հոդվածի`առաջին հերթին, ներկա պահին Ադրբեջանում 142 քաղբանտարկյալ կա: Երկրորդը, նախընտրական շրջանում Իլհամ Ալիևն ավելի շատ է արժանացել ԶԼՄ-ների ուշադրությանը, քան մյուս թեկնածուները: Երրորդը, ընդդիմությունն Իլհամ Ալիևի` երրորդ անգամ առաջադրվելն անօրինական է համարում: Չորրորդը, հոդվածի հեղինակը նշում է, որ Ադրբեջանում արդար ընտրություններ չեն եղել Ալիևների` իշխանության գլուխ գալուց ի վեր: Եվ վերջապես, նշվում է, որ Ադրբեջանը չի կատարում միջազգային կազմակերպությունների առջև ստանձնած մարդու իրավունքների ոլորտին վերաբերող և ոչ մի պարտավորություն: