Ձեր վստահելի աղբյուրը

Միջազգային մամուլն անդրադարձել է այսօր Ադրբեջանում տեղի ունեցող նախագահական ընտրություններին:

«Բի-Բի-Սի» լրատվական գործակալությունը` «Ադրբեջանի ընտրություններ` կանխորոշված նախագահ» վերնագրի ներքո գրում է. «Ադրբեջանցիներն ընտրում են նախագահ, ինչպես նշում են միջազգային իրավապաշտպան կազմակերպությունները, ահաբեկման հեղձուցիչ մթնոլորտում: Ալիևը ընտրություններում հաղթանակ կտանի, սակայն նրա նախագահության օրոք շատ էին կաշառակերության վերաբերյալ դեպքերը: Նաև նշվում է, որ նա կործանում է ժողովրդավարությունը: Իրավապաշտպան կազմակերպությունները նշում են, որ Ադրբեջանում 100 քաղբանտարկյալներ կան: Ալիևի հիմնական մրցակիցը ընդդիմության միասնական թեկնածու Ջամիլ Հասանլին է»:

«Ռոյթերս» լրատվական գործակալություն. «Ադրբեջանի նախագահը հայացքը գցել է երրորդ ժամկետով ընտրվելուն» վերնագրի ներքո գրում է. «51-ամյա Ալիևը, ներքին և արտաքին քննադատությունների դեմ առ դեմ կանգնելով, ցանկանում է վերընտրվել: Քննադատները նշում են, որ երկիրը տառապում է կաշառակերությունից, հարուստների և աղքատների միջև անդուդը գնալով ավելի է խորանում, իսկ նախագահական ընտրությունների նախաշեմին էլ կրկնապատկվել է քաղբանտարկյալների թիվը»:

«Deutsche Welle»` «Գործող նախագահը ցանկանում է երրորդ ժամկետով դառնալ նախագահ». «Ադրբեջանում ընտրատեղամասերը առավոտյան ժամը 8-ից բացվել են:
Ալիևը վերընտրվելու է, չնայած իր հիմնական մրցակիցը նրան մեղադրում է այն բանում, որ Ադրբեջանում վերջերս տեղի ունեցած ռեպրեսիաների պատճառով արդար ընտրություններ տեղի ունենալ չեն կարող»:

Նույն պարբերականը մեկ այլ` «Ադրբեջանում, ԵՄ-ն իր ուշադրությունը սևեռել է ժողովրդավարության փոխարեն էներգիայի վրա». «Ադրբեջանում ընտրությունների նախաշեմին, ԵՄ-ն լուռ է ժողովրդավարական բացակության հարցում»:

«Al Jazeera»` «Ադրբեջանը գնում է ընտրության». «Միջազգային իրավապաշտպան խմբերը գործող նախագահ Ալիևին մեղադրում են կառավարության քննադատներին կտտանքների և հալածանքների ենթարկելու մեջ»:

«Եվրասիանեթ» կազմակերպության պաշտոնական կայք` «Ադրբեջանը ընտրության քարոզարշվի ընթացքում քննադատ ԶԼՄ-ներին ցանկանում է «Давай, До Свидания» վերնագրի ներքո գրում է. «Մոտ ապագայում այստեղ փոփոխություններ չեն լինի: Ակնկալվում է, որ Ալիևի հաղթանակով ԶԼՄ-ների հանդեպ ևս հինգ տարի նման վերաբերմունք կցուցաբերվի»:

«ABC» լրատվական գործակալություն` «Ադրբեջանի նախագահը հեշտությամբ կվերընտրվի» վերնագրի ներքո գրում է. «Նավթով հարուստ Ադրբեջանը ավելացնում է իր հարստությունը` ամենաաղքատ մարդկանց խաբելով: Նախագահին պետք չէ իր դինաստիան պահելու համար շատ ճնշումներ գործադրել»:

«The Guardian». «Ադրբեջանում Ալիևի հետ մրցող 8 թեկնածուները կեղծ մրցակիցներ են» խորագրի ներքո գրում է. «Ադրեջանի երկարատև նախագահ Իլհամ Ալիևը պատրաստվում է հաղթանակ տանել ընտրություններում, չնայած ընդդիմության այն պնդումներին, թե քվեարկությունը ոչ լեգիտիմ է և աղավաղված` հօգուտ գործող նախագահի»:

«The Washington Post». «Ադրբեջանցիները հոկտեմբերի 9-ին քվերակության կգնան վախի և խորը անտարբերության մթնոլորտում» խորագրի ներքո գրում է. «Մի շարք փորձագետների կարծիքով, այս ընտրություններում հաղթանակ կտանի գործող նախագահ Իլհամ Ալիևը, ով այդ պաշտոնը զբաղեցնում է տասը տարի շարունակ: Ալիևի ընտրությունն անխուսափելի է, քանի որ ներկա ռեժիմն օգտագործում է իր ռեսուրսները, ընտրական գործընթացում մրցակցություն չկա, սակայն առկա են ճնշումներ և սպառնալիքներ ռեժիմի քննադատների հանդեպ»:

«Քարնեգի» հիմնադրամի ավագ վերլուծաբան Թոմաս դը Վալի կանխատեսմամբ` Ալիևի կառավարման հետագա 5 տարիներին Ադրբեջանի տնտեսությունն անկում է ապրելու:

«Human Rights Watch» միջազգային իրավապաշտպան կազմակերպությունը Հարավային Կովկասի գծով ավագ հետազոտող Գեորգի Գոգիան նշում է, որ նախագահական ընտրությունների նախաշեմին կառավարությունը դիտավորյալ կերպով իր քննադատներին լռեցնում է և խոչընդոտում ընդդիմության քաղաքական ակտիվությունը:

«Amnesty International», «Human Rights House», IRFS իրավապաշտպան կազմակերպությունները նշել են, որ Ալիևը հետապնդում է ԶԼՄ-ներին:

Հ.Գ. Համացանցում արդեն իսկ տարածվել են հոլովակներ, որոնցում պարզապես նկարահանված է, թե ինչպես են լցոնվում քվեատուփերը: