Ձեր վստահելի աղբյուրը

Այսօր Վերաքննիչ քրեական գործերով դատարանում այսօր շարունակվեց Հայ Ազգային կոնգրեսի ակտիվիստներ Տիգրան Առաքելյանի, Սարգիս Գևորգյանի, Արտակ Կարապետյանի ու Դավիթ Քիրամիջյանի գործով դատական նիստը: Այս նիստում կողմերը հանդես եկան պաշտպանական ճառերով: Արտակ Կարապետյանը հրաժարվեց ճառից` նկատելով, որ բոլորը գիտեն, թե ինչ դրդապատճառներ ունի այս գործը և հրաժարվեց ավելին ասել: Մյուս ամբաստանյալ Սարգիս Գևորգյանը հայտարարեց, որ այս գործը քաղաքական դրդապատճառներ ունի, իսկ կայացած որևէ վճիռ հիմքեր չունի: Իր պաշտպանական ճառն ասելիս, Տիգրան Առաքելյանն ասաց, որ այն կարծիքին չէ, թե վճռի վրա որևէ ազդեցություն կունենա իր ճառը: Իր խոսքով, Առաքելյանը չանտեսեց ՀՀ նախկին ոստիկանապետ Ալիկ Սարգսյանի գործոնը և նկատեց, որ մեծ սխալ թույլ տվեց դատարանը, երբ հրաժարվեց նրան կանչել հարցաքննության:

«Մենք խոսում ենք արդարադատության մասին, հասարակության մեջ արդարադատության վստահությունը բարձրացնելու մասին: Հասարակությունը պնդում է, որ մարդասպանը պետք է բանտում նստի՝ հայտնի դեպքով: Բայց նույն հասարակությունը, 27 ԶԼՄ-ներ պահանջում են, որ կալանքից ինձ ազատեն, ստորագրում են, որ ես քաղբանտարկյալ եմ, բայց դատարանը չի լսում հասարակությանը: Ես նույնիսկ վարչական իրավախախտում չեմ արել, բայց գտնվում եմ կալանքի տակ: Գոնե մի դրվագ, որն ապացուցված եք համարում, ներկայացրեք»,- հայտարարեց Տիգրան Առաքելյանը` նշելով, որ ինքը ցանկանում է, որ արդարություն լինի:

Այնուհետև մեղադրական ճառով հանդես եկավ մեղադրող դատախազ Հակոբ Մարտիրոսյանը, որի ելույթի ժամանակ դահլիճում աղմուկ էր և ոչ մեկ դատախազի ելույթը չէր լսում: «Ինչի՞ ես խորացել, էս ի՞նչ ա ասում», -դատախազի ճառի ժամանակ բարձր խոսում էին դատարանում: Նիստը նախագահող դատավոր Եվա Դարբինյանը, դիմելով ամբաստանյալներին, հարցրեց. «Դուք որ խոսում էիք, որևէ մեկը Ձեզ խանգարո՞ւմ էր», ինչին դահլիճից արձագանքեցին այսպես. «Մենք սենց հակաէսթետիկ դեմքով չէինք խոսում»:

Մեղադրող դատախազը հայտարարեց, որ «ամբաստանյալի գործողությունները եղել են օրենքից չբխող և անօրինական» ու պնդեց մեղադրանքը: Իսկ Արտակ Կարապետյանի մասով հայտարարեց, որ նրա նկատմամբ համաներումը կիրառելի է ու դատարանին միջնորդեց ազատել պատժից: Հակոբ Մարտիրոսյանի մեղադրական ճառից հետո դահլիճից գոռացին` «Հա-կոբ սը-րիկա, Հա-կոբ, սը-րիկա»:

«Դատարանին նույնիսկ տհաճ էր լսել դատախազի մեղադրանքը, նա չկարողացավ պաշտպանել իր մեղադրանքը: Նույնիսկ մեղադրանք չկա, ինչու այսքան պատմություն, այսքան հանդիսատես: Միանշանակ է, մենք պետք է արդարացվենք», - իր վերջին խոսքում ասաց Արտակ Կարապետյանը: