Ձեր վստահելի աղբյուրը

Արցախի Հանրապետության Նախագահ Բակո Սահակյանը աշխատանքային այցով ժամանել է Բելգիայի Թագավորություն:

Արցախի Հանրապետության նախագահի աշխատակազմի տեղեկատվության գլխավոր վարչության հաղորդմամբ, այսօր Նախագահ Սահակյանը մասնակցել է նույն օրը Բրյուսելում մեկնարկած Եվրոպայի հայության 3-րդ համաժողովին:

Իր ողջույնի խոսքում Բակո Սահակյանը նման միջոցառումները կարևոր է համարել ինչպես Եվրոպայում ապրող մեր հայրենակիցների և այստեղ գործող հայկական կազմակերպությունների համար, այնպես էլ հայրենիքի հետ կապերի շարունակական ամրապնդման ու խորացման տեսանկյունից:

Երկրի ղեկավարի խոսքով` Արցախում հատուկ ուշադրություն է դարձվում Սփյուռքում գործող տարբեր կազմակերպությունների հետ փոխգործակցությանը, և այս համատեքստում առանձնակի կարևորում են եվրոպական ուղղության նշանակությունը:

Նախագահ Սահակյանն ընդգծել է, որ անընդհատ զարգացող և փոփոխվող աշխարհը թելադրում է համապատասխան շտկումներ մտցնել նաև Սփյուռք-Արցախ համագործակցության մեջ` պահպանելով և էլ ավելի խորացնելով ձևավորված ավանդական փոխգործակցության տարրերը, միևնույն ժամանակ հատուկ ուշադրություն դարձնելով նոր ուղղություններին ու գաղափարներին:

Այս համատեքստում Բակո Սահակյանն առանձնացրել է Սփյուռքի տարբեր կազմակերպությունների և Արցախի ու Հայաստանի շահագրգիռ կառույցների միջև համակարգված աշխատանքի իրականացումը ԼՂՀ միջազգային ճանաչման, երկկողմ հարաբերությունների հաստատման, Արցախն ավելի ճանաչելի դարձնելու, մեր երկիրը որպես անվտանգ և կայուն զարգացող պետություն ներկայացնելու, ներդրումների համար ամենագրավիչ ոլորտներն ու ծրագրերը պատշաճ կերպով մատուցելու և կեղծիքի ու ստի վրա հիմնված հակառակորդի կողմից տարվող սադրիչ քաղաքականությանն օպերատիվ արձագանքելու ուղղությունները:

Միջոցառմանը մասնակցում էին Հայ Առաքելական Եկեղեցու Մեծի Տանն Կիլիկիո կաթողիկոս Արամ Ա-ն, Հայ Առաքելական եկեղեցու Ֆրանսիայի թեմի առաջնորդ Նորվան արքեպիսկոպոս Զաքարյանը, ՀՀ Ազգային ժողովի նախագահ Հովիկ Աբրահամյանը, ԼՂՀ փոխվարչապետ Արթուր Աղաբեկյանը, արտգործնախարար Կարեն Միրզոյանը, պաշտոնատար այլ անձինք:

Նախորդող հրապարակում`
Բակո Սահակյանը Լիոնում ծաղկեպսակ է դրել Մեծ Եղեռնի անմեղ զոհերի հիշատակը հավերժացնող հուշարձանին