«Մեր ձայնը». «Գերատեսչությունների աշխատանքները գնահատելու ենք խիստ մեթոդներով»

Հասարակություն 13:39 14/10/2013

««Մեր ձայնը» նորաստեղծ նախաձեռնության նպատակն է ավելի մեծ հնչեղության ու հանրային ուշադրության արաժանացնել քաղաքացիների դիմումները, որոնք ուղղված են տարբեր գերատեսչությունների, բայց մնում են անպատասխան»,- ասուլիսում այս մասին ասաց նախաձեռնության ղեկավար, PR մասնագետ Հայկ Մութաֆյանը:

Ըստ նրա, գերատեսչություններից իրենց նամակներին պատասխան չստացած քաղաքացիները դիմում են նախագահական, այնուհետև` նամակը տեղափոխվում է լրատվական դաշտ: «Մենք հետևողական կլինենք, որ այդ նամակները լուծումներ ստանան` իրականցնելով մի շարք միջոցառումներ, ընդհուպ գնահատելու ենք գերատեսչությունների ամենամսյա աշխատանքները»,- ասաց նա` հավելելով, որ այսօր չկա քաղաքական, հասարակական որևէ ուժ, որ դնի որևէ պաշտոնյայի` նախարար, մարզպետ և այլն, պաշտոնաթողության հարցը: Հ. Մութաֆյանի դիտարկմամբ, իրենց գնահատակնները լինելու են խիստ մեթոդներով: Ըստ նրա, իրենց հիմնական խնդիրն է լինելու` տանել հասարակական աշխատանք ու այդ աշխատանքը տեսանելի դարձնել:

Նախաձեռնության անդամ, սոցիոլոգ Ահարոն Ադիբեկյանն ասաց, որ իրենց հիմնական գործառույթն է լինելու իրավաբանական հնչողություն տալ քաղաքացիների անպատասխան մնացած նամակներին:

Ասուլիսին ներկա տեղեկատվական անվտանգության մասնագետ Սամվել Մարտիրոսյանը, ով նախաձեռնության հետ կապ չունի, ասաց, որ քաղաքացիները շարունակում են բողոքել պետական գերատեսչություններում հանդիպող բյուրոկրատական քաշքշուկներից: «Նման պարագայում մարդիկ ստիպված են լինում շատ դեպքերում գտնել կարճ ճանապարհներ, որոնք օրենքից դուրս են: Այս բյուրոկրատական համակարգով եթե լինենք օրենքի երկիր, ինֆարկտի ու ինսուլտի դեպքերն ավելի շատ կլինեն»,- ասաց նա:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: