Ձեր վստահելի աղբյուրը

Ադրբեջանի իշխանության լոբբիստները չեն կարողացել համոզել Վաշինգտոնին` սատարել հոկտեմբերի 9-ին կայացած ընտրությունների արդյունքները, գրում է «Թուրան» լրատվական գործակալությունը: Հոդվածում նշվում է, որ «Հայացք գցելով Ադրբեջանի ապագայի վրա» խորագրով միջոցառումը տեղի է ունեցել Քարնեգի հիմնադրամում. մասնակիցները փորձել են դատողություններ անել, թե ինչ է սպասում երկրին մոտակա տարիներին` Իլհամ Ալիևի երրորդ ժամկետի ընթացքում:

«Թուրանի» թղթակիցը, ով ներկա է գտնվել լսումներին գրել է, որ այդ հարցով մասնակիցների կարծիքներն ամբողջովին տարբերվել են: Քարնեգի հիմնադրամի փորձագետ Թոմաս դե Վաալը ելույթ է ունեցել հիմնական զեկույցով, իսկ Ռուսաստանում ԱՄՆ նախկին դեսպան Ջեյմս Քոլլինզը եղել է հանդիպման մոդերատորը: Երկուսն էլ պատրաստվում են նոյեմբերին այցելել Բաքու:

«Ադրբեջանի վերջին ընտրությունները քիչ են տարբերվել բոլոր նախկիններից, չնայած երկրի զարգացման հաջորդ փուլն ավելի դժվար է լինելու, քան նախկինում էր: Նավթային բումը կավարտվի և հնարավորություն կստեղծվի դեպի Եվրոպա արտահանող գազի լուրջ մատակարար դառնալ: Ադրբեջանական հասարակության շրջանակներում դժգոհություն անկասկած կա և այն հիմնականում կոռուպցիայի ու հարստության բաշխման ահռելի անհավասարության պատճառով է: Ընդդիմությունը չկարողացավ ստանալ ընտրողների ձայները և իր հույսը կդնի բավարար քանակի բողոքի ցույցերի և բնակչության դժգոհության վրա: Հարցն այն է` կսովորի արդյո՞ք Ալիևն ապրել ընդդիմության հետ, թե ոչ»,-ասել է դե Վաալը: Ընտրությունների վերաբերյալ պետդեպարտամենտի դիրքորոշման մասին խոսելիս դե Վաալն այն անվանել է օգտակար` որպես ցուցանիշ այն բանի, որ կողքի քաշվելը «բավականին վտանգավոր» է:

Մեկ այլ բանախոս` ամերիկա-իսրայելական փորձագետ և Ադրբեջանի կառավարության հանրահայտ լոբբիստ Բրենդա Շաֆերն այլ կարծիք է հայտնել. «Ադրբեջանի հանդեպ քննադատությունը շատ է, սակայն կան նաև այլ երկրներ, որոնք լուրջ խնդիրներ են ստեղծում», - ասել է նա` մեկնաբանելով պետդեպարտամենտի հայտարարությունը: Ադրբեջանի ժողովրդավարական ապագայի մասին խոսելիս նա հավելել է, որ ընդդիմադիր առաջնորդները «չեն ցանկանում, որ իրենց երկրում լինեն արաբական հեղափոխություններ»: Շաֆերի տեսակետը կիսել են Ադրբեջանի դեսպանատան ներկայացուցիչները և լսարանում իրենց կողմնակիցները:

Նյութի հեղինակը նշում է, որ քննարկումների ընթացքն անսպասելիորեն խախտել է Ադրբեջանում ԱՄՆ նախկին դեսպան Ռիչարդ Կոզլարիչը: «Ինձ խորապես անհանգստացնում է այն ուղղությունը, որով շարժվում է Ադրբեջանը: Այդ ընտրությունները ֆիկտիվ էին», - ընդգծել է Կոզլարիչը` սատարելով ԱՄՆ պետդեպարտամենտի հայտարարությունը: «Ես կուզեի ցանկացած, թեկուզ և փոքրիկ, քայլ տեսնել դեպի ժողովրդավարություն»,- ասել է նա` հավելելով, որ Ալիևի կառավարությունը պետք է անմիջապես ազատ արձակի քաղբանտարկյալներին, թույլատրի անկախ ԶԼՄ-ների նորմալ գործունեությունը:

«Դժբախտաբար, մենք Ադրբեջանում միայն հակառակ քայլեր տեսանք», - իր հերթին հավելել է Ժողովրդավարության ազգային հիմնադրամի` Ռուսաստանի և Եվրասիայի գծով նախագահ Միրիամ Լանսկոյը: Նա նշել է, որ 10 տարի առաջ Ադրբեջանը ցանկանում էր լինել ՆԱՏՕ-ի անդամ, մոտենալ Եվրամիությանը և միջազգային վարկանիշներում ունենալ այնպիսի ցուցանիշ, ինչպիսին ունի Վրաստանը, սակայն Ադրբեջանը մոտ է Ուզբեկստանին:

Ամփոփելով քննարկումը` Ջեյմս Քոլլինզը նշել է, որ ադրբեջանական կառավարությունը բազում խնդիրների է բախվելու, քանի որ «կլինեն մեծ սպասելիքներ ավելի քիչ գումարի և ռեսուրսների դեպքում»:

Քննարկման արդյունքներն ամփոփելիս «Թուրանի» թղթակցին  միջոցառման մասնակիցներից մեկը` նախկին դիվանագետ, հայտնել է, որ որոշ բանախոսների ելույթները օրինակ են ծառայում, թե ինչպես է Ադրբեջանը, որտեղ մարդու իրավունքներն ու ազատությունները ոտնահարվում են, ընկերներ փնտրում և գտնում ժողովրդավարության բարձր մակարդակ ունեցող այնպիսի երկրներում, ինչպիսին ԱՄՆ է:

«Այդ լոբբիստներն օգտագործում են ԱՄՆ կառավարության հետ ունեցած սեփական հարաբերությունները իրենց պատվիրատուների շահերի առաջխաղացման համար», - նշել է նա: