Ձեր վստահելի աղբյուրը

 «Ադրբեջանը չի կատարում միջազգային հանրության առաջ ստանձնած պարտավորությունները, այդ թվում՝ ռազմագերիների ու նրանց վերադարձման հետ կապված ընդունված մի շարք կոնվենցիաներ: Ամեն դեպքում, այս հարցում մշտապես խնդիրներ կան»,- Panorama.am-ի հարցին, թե ինչո՞ւ է պայմանավորված հայ ռազմագերու շուրջ ստեղծված իրավիճակի ձգձգումը, նշեց ԱԺ պատգամավոր, Աֆղանստանի վետերանների միության նախագահ Արմեն Մխիթարյանը:

Նրա խոսքերով, Ադրբեջանն ամեն ինչ անում է այս պրոցեսը ձգձգելու հարցում, իսկ միջազգային հանրությունը, Ադրբեջանի ստանձնած պարտավորությունների կատարման հարցում հետևողական չէ:

«Ռազմագերի խնդիրը մշտապես առկա է, քանի որ Ադրբեջանն ամեն ինչ անում է, որպեսզի մեր զինծառայողները հայրենիք չվերադառնան՝ ընտրելով երրորդ երկիր տեղափոխվելու տարբերակը: Ավելին, մենք նույնիսկ ողբերգական դեպքերի ականատես ենք եղել»,- ասաց Ա. Մխիթարյանը:

Ըստ պատգամավորի, համապատասխան միջազգային կառույցները պետք է նոր մեխանիզմներ մտածեն, որպեսզի հնարավոր լինի Ադրբեջանում ապահովել հայ ռազմագերիների անվտանգությունն ու նրանց հայրենիք վերադարձման գործընթացը:

«Ի տարբերություն Ադրբեջանի, հայկական կողմն ադրբեջանցի ռազմագերիներին մարդասիրական մոտեցում է ցուցաբերում և նրանց՝ մեր տարածքում գտնվելուց անմիջապես հետո տեղյակ պահում շահագրգիռ կազմակերպություններին ու կառույցներին»,- նշեց վերջինս:

Ա. Մխիթարյանը նշեց, որ ՀՀ յուրաքանչյուր քաղաքացու իրավունքների պաշտպանությունը մեր երկրի համար կարևոր է և պետք է ամեն ինչ անել, որպեսզի նույնիսկ գերության դեպքում հայ զինծառայողների իրավունքները չոտնահարվեն:

«Բարև, մամ ջան». գերության մեջ գտնվող Հակոբ Ինջիղուլյանը նամակ է գրել