Ձեր վստահելի աղբյուրը

Ինֆորմացիայի Ազատության կենտրոնը հրապարակել է պաշտոնատար այն անձանց անունները, որոնք 2013 թվականի 3-րդ եռամսյակի ընթացքում խախտել են մարդկանց տեղեկություն ստանալու իրավունքը: ԻԱ կենտրոնից, տեղեկանում ենք , որ խախտողների առաջին հորիզոնականը զբաղեցնում է ԱԺ նախագահ Հովիկ Աբրահամյանը: 2013թ.-ի օգոստոսի 21-ին Ինֆորմացիայի ազատության կենտրոնը տեղեկություն ստանալու գրավոր հարցմամբ դիմել էր ՀՀ Ազգային ժողովին` խնդրելով տրամադրել տեղեկություններ ՀՀ ԱԺ-ի ծառայողական բջջային հեռախոսահամարների վերաբերյալ:

Հարցումն ուղարկելուց 6 օր անց ԱԺ-ն միջանկյալ գրությամբ հայտնել է, որ խնդրվող տեղեկությունները տրամադրելու համար անհրաժեշտ է կատարել լրացուցիչ աշխատանք, ուստի հարցման պատասխանը կտրամադրվի «Տեղեկատվության ազատության մասին» ՀՀ օրենքով նման դեպքում սահմանված 30-օրյա ժամկետում: ԱԺ-ն ընդամենը կես էջ բովանդակությամբ ուշացած լիարժեք պատասխան է տրամադրել 30-օրյա ժամկետի ավարտից հետո` 2013թ.-ի հոկտեմբերի 1-ին, ուստի Սև ցուցակում է հայտնվում ՏԱ ժամկետներն էականորեն խախտելու համար: 

Այնուհետև ցանկը շարունակում է ՀՀ էներգետիկայի և բնական պաշարների նախարար Արմեն Մովսիսյանը. 2013թ.-ի օգոստոսի 20-ին Ինֆորմացիայի ազատության կենտրոնը տեղեկություն ստանալու գրավոր հարցմամբ դիմել էր ՀՀ էներգետիկայի և բնական պաշարների նախարարությանը` խնդրելով տրամադրել «Գլոբալ Գոլդ Մայնինգ» ՍՊԸ-ի և ՀՀ Կառավարության միջև 2008թ.-ի փետրվարի 20-ին կնքված համաձայնագրի պատճենը: Հարցումն ուղարկելուց 3 օր անց նախարարությունն էլեկտրոնային փոստի միջոցով տրամադրել է հղումով պատասխան` հայտնելով, որ խնդրվող համաձայնագիրը գտնվում է ՀՀ էկոնոմիկայի նախարարությունում: Պատասխանը համարվել է անհիմն, քանի որ ՀՀ էկոնոմիկայի նախարարությունն իր հերթին է հղում արել էներգետիկայի և բնական պաշարների նախարարությանը, արդյունքում փակուղու առաջ դնելով տեղեկություն փնտրողին:

ՀՀ էկոնոմիկայի նախարար Վահրամ Ավանեսյանը ևս հայտնվել է ԻԱԿ «սև ցուցակում». 2013թ.-ի օգոստոսի 21-ին Ինֆորմացիայի ազատության կենտրոնը տեղեկություն ստանալու գրավոր հարցմամբ դիմել էր ՀՀ էկոնոմիկայի նախարարությանը` խնդրելով տրամադրել տեղեկություններ նախարարության ծառայողական բջջային հեռախոսահամարների վերաբերյալ: Նախարարությունը լիարժեք ուշացած պատասխան է տրամադրել հարցումն ուղարկելուց 16 օր հետո: Թեև պատասխան գրությունը թվագրված է սեպտեմբերի 3, սակայն գրության փոստային կնիքի ամսաթիվը վկայում է, որ այն ուղարկվել է սեպտեմբերի 6-ին, ուստի նախարարությունը Սեւ ցուցակում է հայտնվում ՏԱ ժամկետներն էականորեն խախտելու համար:

ՏԱ օրենքը խախտած և ԻԱԿ «սև ցուցակում» հայտնված մյուս պաշտոնյաներն են ՀՀ ԿԱ Պետական եկամուտների կոմիտեի նախագահ Գագիկ Խաչատրյանը, ՀՀ Ոստիկանության Ճանապարհային ոստիկանության պետ Արսեն Գալստյանը, ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանը, Երեւանի քաղաքապետ Տարոն Մարգարյանը, Կենտրոն վարչական շրջանի ղեկավար Արա Սադոյանը, «Փարքինգ Սիթի Սերվիս» ՓԲԸ-ի տնօրեն Վազգեն Հարությունյանը, «Պոլտերգեյստ-2» ՍՊԸ-ի տնօրեն Կարեն Աճեմյանը, «Կոստանդյան եղբայրներ» ՍՊԸ-ի տնօրեն Աննա Վանեցյանը, «Երևանի էլեկտրատրանսպորտ» ՓԲԸ-ի տնօրեն Հարություն Երեմյանը, «Երևանի ավտոբուս» ՓԲԸ-ի տնօրեն Էլբակ Թարփոշյանը, «Ավտոբուս» ՓԲԸ-ի տնօրեն Արամ Հակոբյանը, «Դյակո-Արթ» ՍՊԸ-ի տնօրեն Արտակ Նավասարդյանը, «Բյուրակն» ՍՊԸ-ի տնօրեն Համլետ Գրիգորյանը, «Արշակյան եղբայրներ» ՍՊԸ-ի տնօրեն Աշոտ Արշակյանը:

Թեմային առնչվող.

Քաղաքաշինության նախարարություն, ԱԺ, քաղաքապետարան. Ժանգոտ կողպեքն այս տարի շատ հասցեատեր ուներ