Նախարարության լղոզված պատասխանն ու իրողությունը. Ի՞նչ է արվում մանկատան նախկին սաների համար
Մանկատան նախկին սաների ճակատագիրը շարունակում է մնալ անորոշ. պատասխանատու գերատեսչությունը` Աշխատանքի և սոցիալական հարցերի նախարարությունը, կարծես ալարում է հստակ պատասխաններ տրամադրել, թե ի՞նչ է սպասվում նրանց, որպեսզի վերջիններն, այսպես ասած, իրենց գլխի ճարն անձամբ տեսնեն:
Խնդիրը նրանում է, որ տարիներ առաջ մանկատանը հրաժեշտ տված սաները մինչ օրս սպասում են, թե երբ պետք է իրենց հերթը հասնի և ՕՐԵՆՔՈՎ իրենց հասանելիք բնակարանները ստանան, բայց հերթը, չգիտես ինչու, այդպես էլ չի հասնում: Panorama.am-ը խնդրին շատ է անդրադարձել և օրերս էլ որոշեց հերթական անգամ հարցում ուղարկել Աշխատանքի և սոցիալական հարցերի նախարարությանը հասկանալու, թե ի՞նչ է արվել վերջին մեկ տարում և ինչ է արվելու առաջիկայում:
Ինչպես և ակնկալում էինք` վերջին մեկ տարում գրեթե ոչինչ չի արվել և բնակարան ստանալու շահառուների հերթացուցակում մեկ տարի առաջ առկա թիվը ոչ միայն չի նվազել, այլև ավելացել է.
«2003 թ-ից 2013 թ-ը ներառյալ «Աջակցություն և խորհրդատվություն մանկատան շրջանավարտներին» ծրագրի շրջանակներում հաշվառված 254 շահառու չեն ստացել բնակարան»,- ասված է պատասխանում: Մինչդեռ 2012թ-ի հունիսին Panorama.am-ի նմանատիպ հարցմանը ստացված պատասխանում նախարարությունից տեղեկացրել էին, որ 2012թ-ի ընթացքում բնակարան սպասող շահառուների թիվը կկազմի 248 (այդ պահի դրությամբ դեռ չէին բաշխվել Մարալիկի սոցիալական տան բնակարանները, ինչի արդյունքում 270 հոգանոց հերթացուցակում թիվը պետք է կազմեր 248):
Ավելին, անցած տարի մեզ տեղեկացրել էին, որ Մարալիկում բնակարան պետք է հատկացվեր ընդամենը 22 շահառուի, սակայն իրականում հատկացվել է 27-ին, ինչը , իհարկե, ողջունելի է, բայց հարցերը, ինչպես ասում են, մնում են.
«2012թ. 27 շահառուի սոցիալական բնակարան է տրվել ՀՀ Շիրակի մարզ, ք. Մարալիկում»,- ասված է նախարարության պատասխանում:
Ենթադրենք, որ մյուս 6 շահառուն, որ մեկ տարվա ընթացքում ավելացել են հերթագրվածների ցուցակում այս տարվա մանկատան շրջանավարտներն են, սակայն նրանց մասով նախարարությունը ոչինչ չի գրել, իսկ մեր մի հարցին էլ ընդհանրապես չի պատասխանել:
Նախարարությունից, մասնավորապես, հետաքրքրվել էինք` քանի՞ նախկին սան է այս տարի ստացել/ստանալու բնակարան պետությունից, սակայն այս հարցն այդպես էլ մնացել է անպատասխան: Ինչը ենթադրել է տալիս, որ պետությունը, փաստացի, այս տարվա ընթացքում ոչինչ չի արել մանկատան շրջանավարտներին բնակարանով ապահովելու ուղղությամբ (նկատենք` խոսքն այստեղ միայն հերթագրվածների մասին է, մինչդեռ գրեթե նույնքան շրջանավարտ, եթե ոչ ավելի, նույնիսկ հերթագրված էլ չեն ու անօթևան են):
Ի դեպ ավելացնենք, որ մեր ունեցած տեղեկությունների համաձայն այս տարի ևս նախատեսվում է սոցիալական տներում բնակարանների բաշխում նաև մանկատան շրջանավարտներին, սակայն թե ինչո՞ւ Աշխատանքի և սոցիալական հարցերի նախարարության Ընտանիքի, կանանց և երեխաների հիմնահարցերի վարչությունը այդ մասին մեզ պատասխանում չի տեղեկացնում` հարց է, որի պատասխանը թերևս կարելի է ստանալ ևս մեկ հարցում ուղարկելով (կամ էլ չստանալ):
Նոր կառուցվելիք և առաջիկայում հատկացվելիք սոցիալական տներում բնակարանների մասին տեղեկացնելու փոխարեն նախարարության պատասխանում կարդում ենք.
«Վերահսկողության արդյունքում պարզվել է, որ 12 շահառու չեն բնակվում իրենց տրամադրված բնակարաններում: Առ այսօր 7 շահառուի հետ իրականացվել է դատական կարգով պայմանագրերի լուծման գործընթաց: Տվյալ բնակարանները կտրամադրվեն այլ շահառուների»: Ստացվում է, որ փոխանակ բնակարանաշինությամբ զբաղվեն, նախարարությունը հույսը դրել է այլ շահառուներից բնակարանները խլելու (թեկուզև այդ գործընթացը լինի օրինական) և մյուսներին տրամադրելու վրա:
Եվ վերջին հարցը, որը նույնպես մնաց անպատասխան. հետաքրքրվել էինք, թե Վանաձորի մանկատան նախկին սաներ Թագուհի Քոչարյանն ու Ռոման Կուդաշինը, «Զատիկ» մանկատան նախկին սան Աշխեն Կոնինյան-Կոպանովան, որոնք վաղուց հերթագրված են, ե՞րբ վերջապես կստանան իրենց հասանելիք բնակարանը: Panorama.am-ը ստիպված էր կոնկրետ այս անձերի մասին հարցում անել, քանի որ, նախ, մենք գրել ենք նրանց խնդիրների մասին, իսկ բացի այդ, այս անձանց նախարարությունից կոնկրետ պատասխան չեն տալիս, մասնավորապես հիշյալ վարչության պետ Լալա Ղազարյանը և ստացվում է, որ նրանք տարիներ շարունակ անարդյունք գնում-գալիս են նախարարություն ու վերջն էլ չի երևում: Սակայն Panorama.am-ն էլ հաջողության չհասավ` Լալա Ղազարյանը ճիշտ համարեց մեզ էլ խուսափողական պատասխան տալ, թե.
«Ինչ վերաբերում է Ձեր 3-րդ կետի հարցադրմանը, ապա հայտնում եմ, նշված շահառուների բնակարանային խնդիրները կլուծվի ՀՀ կառավարության 2013 թվականի օգոստոսի 1-ի N 894-Ն որոշման համաձայն»,- ասված է պատասխանում:
Նշենք, որ մատնանշված փաստաթուղթը ամբողջական մի փաստաթուղթ է, որը վերաբերում է ընդհանուր համակարգին և սահմանում է կարգ`
բնակելի տարածության կարիք ունեցող սոցիալապես անապահով և հատուկ խմբերին դասված անձանց (ընտանիքներին) հաշվառելու, կացարանի և այլ սոցիալական ծառայությունների տրամադրման:
254 շահառուների հետևում մարդկային ճակատագրեր են, որոնք այսօր ոչ թե ապրում են, այլ գոյատևում մեծամասամբ անմարդկային պայմաններում` նկուղներում կամ վարձով, կիսաքանդ բնակարաններում, խոնավության մեջ երեխաների դաստիարակում ու մարդավայել ապագա ունենալու փոխարեն հիվանդություններ ձեռք բերում (մասնավորապես Աշխեն Կոնինյան-Կոպանովան): Մինչդետ պետական պաշտոնյաները, որոնք այդ պաշտոնում են նրանց կյանքը հնարավորինս թեթևացնելու, խնդիրները լուծելու համար, անգամ լրատվամիջոցի հարցումն են թողնում անպատասխան կամ տալիս ոչինչ չասող, լղոզված մի պատասխան, որն անգամ տարրական տեղեկատվություն իր մեջ չի պարունակում:
Նախորդիվ`
Մանկատան 85 շրջանավարտ անօթևան է, ևս 49-ն էլ գրեթե նույն կարգավիճակում են
Քշվածները. Դատավորի ներքին համոզումն ու մանկատան նախկին սաների խեղված ճակատագրերը
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
