Ձեր վստահելի աղբյուրը

Երևանի քաղաքապետարանի կողմից «Իրազեկ և պաշպանված սպառող» հասարակական կազմակերպությանն է այսօր ներկայացվել Երևան քաղաքում ավտոբուսով և միկրոավտոբուսով ուղևորափոխադրման ծախսերի հաշվարկների նախագծերը` 1 ավտոբուսի և 1 միկրոավտոբուսի համար 1 ամսվա կտրվածքով:

«Նախագծերի ուսումնասիրության ավարտից հետո Կազմակերպությունը հանդես կգա համապատասխան հայտարարությամբ»,-ասված է ՀԿ տարածած հաղորդագրության մեջ:

Panorama.am-ին ՀԿ նախագահ Բաբկեն Պիպոյանն ասաց, որ այս պահին ուսումնասիրում են ծավալուն փաստաթուղթը, գնահատականներ տալ առայժմ չեն կարող:

Նա միայն նշեց, որ քաղաքապետարանի կողմից ներկայացված թվերի համաձայն, մեկ միկրոավտոբուսի մեկ ամսվա ծախսերի ընդհանուր հաշվարկը կազմում է 1 մլն 45 հազար 90 դրամ: Այն իր մեջ ներառում է վառելիքի, շարժիչի յուղի, տեխնիկական սպասարկման, նորոգման, անվադողերի, մարտկոցի փոխարինման ծախսերը, հարկերը, տուրքերը, պարտադիր վճարները, ինչպես նաև ամորտիզացիոն ծախսերը:

ՀԿ նախագահի ներկայացմամբ, այս թիվը քաղաքապետարանի նախորդ ներկայացրած թվի համեմատ զգալիորեն ավելացել է:
Հիշեցնենք, որ ավելի վաղ հրապարակած հիմնավորման համաձայն մեկ միկրոավտոբուսի ամսական ծախսը կազմում է 807.190 դրամ:

Ըստ այդ հաշվարկի, միկրոավտոբուսով մեկ ուղևորի փոխադրման սակագինը կազմում էր 144.9 դրամ:

Նախորդող հրապարակում`

Քաղաքապետարանի «մաթեմատիկան» ու մաթեմատիկան