«Le Monde». Ղարաբաղում, եթե պատերազմ սկսվի, այլ երկրներից կմիանան նաև բազմաքանակ հայ կամավորներ

Աշխարհում 19:00 17/10/2013

Լեռնային Ղարաբաղի հակամարտության շուրջ Ադրբեջանի և Հայաստանի միջև լարվածությունը պահպանվում է նույնիսկ մեկ քառորդ դար անց, գրված է ֆրանսիական «Le Monde» թերթի հոդվածում, որի թարգմանությունը կարելի է գտնել «inopressa.ru» կայքում:

Հեղինակը նշում է, որ Ադրբեջանի նախագահական ընտրությունների նախօրեին հանրապետությունում անձի ազատությունները սահմանափակվել էին:

««Իշխանությունը ծայրահեղ զգայուն և ագրեսիվ է դարձել», - նշում են Բաքվի սրճարաններից մեկում նստած երիտասարդները: Նրանցից մեկը պատմում է, որ Բաքու է վերադարձել արտերկրում սովորելուց հետո: «Կարծում եմ` իշխանությունն անվստահությամբ է վերաբերվում արտերկրում ուսում ստացած երիտասարդությանը. ժողովրդավարությունը գործում տեսնելուց հետո նրանք նույնը կպահանջեն այստեղ: Այս գեղեցիկ շենքերը և «մերսեդեսները», որ Դուք տեսնում եք, միայն արտաքին տեսքն են, Ադրբեջանն ամբողջությամբ թաղվել է կոռուպցիայի, ազատությունների և արդարության բացակայության մեջ, և դա քաղաքացիների մեծամասնությանը խանգարում է արժանապատվորեն ապրել»»:

Հայաստանում,- շարունակում է հեղինակը,- խոսքի ազատությունը թույլ է տալիս երիտասարդներին քննադատել երկրում տիրող իրավիճակը: «Նման կարծիք է հայտնել Վարսիկան` Գյումրիում ծնված 25-ամյա ուսանողուհին»:

Հոդվածի հեղինակը նշում է, որ Լեռնային Ղարաբաղից աշխատանքի համար հիմնականում Ռուսաստան են մեկնում: 29-ամյա Սուրենը պատմում է, որ մտադիր է վաճառել տունը և ընտանիքի հետ մեկնել Ռուսաստան: Ընդ որում` Սուրենը նշում է` ինքը հպարտ է, որ հայ է:

Չնայած նախագահ Ալիևի ռեժիմի հանդեպ ունեցած իրենց թշնամանքի, Ադրբեջանում երիտասարդները նույնպես հպարտ են իրենց երկրով, գրում է հեղինակը: Երիտասարդ իրավաբան Թեյմուրը նշում է. «Ես կցանկանայի հետագայում արտերկիր մեկնել, սակայն միշտ աշխատել Ադրբեջանի համար և օգնել իմ երկրին»:

«Ադրբեջանում քչերն են հավատում խնդրի խաղաղ լուծմանը,- գրված է հոդվածում:-Իսկ երիտասարդ Անին Երևանից ասում է. «Լեռնային Ղարաբաղը մեր տարածքն է, և եթե ստիպված լինենք հողի նույնիսկ մեկ սանտիմետր զիջել, ես ինքս պատերազմ կգնամ: Սա մեր պատմությունն է»»:

«Սահմանի բացման համար Լեռնային Ղարաբաղում հիշողությունները դեռ չափազանց թարմ են»-, գրում է թղթակիցը: «Ղարաբաղում բոլորը պատրաստ են պատերազմի: Եթե պատերազմն ամեն դեպքում մի օր սկսվի, շատ երիտասարդներ որպես կամավոր կհավաքագրվեն այնպես, ինչպես Սուրենը, ով ցանկանում է մեկնել Ռուսաստան, բայց պնդում է. «Ես կվերադառնամ պատերազմելու: Ես պարտավոր եմ դա անել», - նշված է հոդվածում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: