Ձեր վստահելի աղբյուրը

Այսօր առավոտյան ԱԺ նախագահ Հովիկ Աբրահամյանի մոտ խորհրդարանական խմբակցությունների ղեկավարների մասնակցությամբ քննարկում է տեղի ունեցել, որի ժամանակ քննարկվել է ԵԽԽՎ-ում հայկական պատվիրակության անդամների փոփոխման հարցը: Քննարկումից մանրամասներ Panorama.am-ին և Aravot.am-ին ներկայացրեց ԵԽԽՎ-ում հայկական պատվիրակության ղեկավար Դավիթ Հարությունյանը՝ մասնավորապես այն կոնտեքստում, թե հնարավոր է արդյոք, որ փոփոխությունների արդյունքում «Ժառանգությունն» առհասարակ դուրս մնա պատվիրակության կազմից ՝ այլևս փոքրաթիվ խմբակցություն լինելու պատճառով.

«Այն կարգը, որ քննարկվել է այսօր, վերաբերում է միջազգային խորհրդարանական պատվիրակությունների ձևավորման կարգին և սկզբունքորեն կոչված է կանոնակարգելու ու հստակություն մտցնելու այդ հարցում: Եվ, այո, հնարավոր է, որ ինչ-որ խմբակցություն դուրս մնա պատվիրակության կազմից, որովհետև պատվիրակության ձևավորման նպատակն է արտացոլել ներկա քաղաքական ներկապնակը, իսկ այսօր այն արդարացիորեն արտացոլված չի՝ մասնավորապես ԵԽԽՎ պատվիրակության կազմում քաղաքական մեծամասնությունը ներկայացված է փոքրամասնություն, ինչը սկզբունքորեն եզակի երևույթ է»,- նշեց Դ.Հարությունյանը իր խոսքում նաև հղում անելով ԱԺ կանոնակարգ օրենքին, ըստ որի՝ պատվիրակության կազմերը հաստատում է ԱԺ նախագահը:

Նրա խոսքով, Ազգային Ժողովում կարող են լինել բազմաթիվ խմբակցություններ, իսկ անդամների թիվը սահմանափակ է և հենց այդ պատճառով կարող են որոշ խմբակցություններ ուղղակի չընդգրկվել այս կամ այն պատվիրակության կազմում:
Հարցին, թե արդյո՞ք արդեն հայտնի է, թե որ խմբակցությունները, մասնավորապես, չեն ընդգրկվի պատվիրակության կազմի մեջ, Դ.Հարությունյանըց նշեց, որ հայտնի չէ:

«Հայտնի չէ, թեև ենթադրվում է»,- խորհրդավոր ժպիտով շեշտեց նա: ԵԽԽՎ-ում հայկական պատվիրակության ղեկավարի խոսքով, հստակ է մեկ բան՝ ապահովել, որպեսզի մեծամասնությունը չլինի փոքրամասնություն և հենց դա է հիմնական խնդիրը.

«Պարտադիր չէ, որ մեծամասնությունը լինի մեծամասնություն, բայց առնվազն մեծամասնությունը իրավունք ունի հավակնելու ունենալ պատվիրակության անդամների գոնե կեսը: Ստացվում է, այս դեպքում էլ արդարացի չի լինի, քանի որ խորհրդարանի ամբողջ ներկապնակը դարձյալ ներկայացված չի լինի, բայց այս հարցում, ինչպես ասում են, դիմեք ԵԽ-ին, որովհետև ԵԽ-ն է սահմանել պատվիրակության կազմի թվաքանակը»,- նշեց նա, ու մատնացույց արեց միջազգային կառույցներում որոշ պատվիրակությունների, որոնց պատվիրակների թիվը շատ ավելի փոքր է, քան ԵԽԽՎ-ում է: Օրինակ՝ ԵԱՀԿ ԽՎ-ում ընդամենը 5 պատգամավոր պետք է լինի հայկական պատվիրակության կազմում, մինչդեռ խմբակցությունների թիվը վեցն է:

Այն հարցին, թե արդյոք կա բողոքարկման ինչ-որ մեխանիզմ ԱԺ նախագահի որոշումը բողոքարկելու համար, Դ.Հարությունյանն ասաց, որ պահանջը, թե ինչպիսին պետք է լինի պատվիրակությունը և ինչպես պետք է մասնակցեն ԱԺ խմբակցությունները սահմանված են ԵԽԽՎ կանոնադրությամբ և եթե ԵԽԽՎ կանոնադրությունը խախտվում է, ապա դա կարող է բողոքարկվել կառույցի համապատասխան կոմիտե: Անգամ օրինակ բերեց՝ վերջին նստաշրջանում Իսլանդիայի պատվիրակության կազմում ներկայացված չեն եղել կանայք, ինչը կանոնադրության խախտում է: Եվ այդ պատճառով պատվիրակության լիազորությունները կասեցվել էին, սակայն մինչև հարցի քննարկումը, ինչը տեղի է ունենում հինգշաբթի օրերին, Իսլանդիայի խորհրդարանը փոխեց պատվիրակությունը և ընդգրկեց կին, որով բավարարեց ԵԽԽՎ պահանջները:

Ինչ վերաբերում է շրջանառվող այն լուրերին, թե Զարուհի Փոստանջյանի խմբակցության ղեկավար ընտրվելը կարող է նրան փրկել պատվիրակության կազմից դուրս մնալուց, Դ.Հարությունյանն ասաց.

«Ես կոնկրետ անձերի մասին հիմա չէի խոսի, այլ խոսում եմ այն պահանջների մասին, որոնք ամրագրված են կանոնադրությամբ: Այո, ես հասկանում եմ, որ մեծամասնությունը ինչ-որ շրջանում զիջել է իր տեղը այլ կուսակցությունների, որոնք իշխանության մաս չեն կազմում, սակայն դա նորմ չէ, հակառակ ՝ բացառություն է»,- հավելեց նա:

Նշենք, որ ԵԽԽՎ-ում հայկական պատվիրակության կազմում ութ պատգամավոր է ներկայացված՝ չորսը հիմնական կազմում, չորսը՝ փոխարինող: Ներկայումս մշտական կազմում են Դավիթ Հարությունյանը՝ պատվիրակության ղեկավար, ԲՀԿ-ական Նաիրա Զոհրաբյանը, ՀԱԿ-ական Լևոն Զուրաբյանը, ՀՀԿ-ական Արփինե Հովհաննիսյանը: Փոխարինող կազմում են՝ ՀՀԿ-ական Նաիրա Կարապետյանը, ՀՅԴ-ական Արմեն Ռուստամյանը, ԲՀԿ-ական Վահե Հովհաննիսյանը և Զարուհի Փոստանջյանը՝ «Ժառանգություն»: Վերջինիս հարցադրումն էլ աշնանային նստաշրջանի ժամանակ ստիպեց անդրադառնալ կազմի փոփոխությանը: