Ձեր վստահելի աղբյուրը

Բերդ-Իջևան ավտոճանապարհի Պառավաքարի հատվածում հակառակորդի կողմից իրականացված սադրիչ գործողությունների արդյունքում հայկական կողմից 1 զինծառայող մահացել է, ևս 3-ը՝ վիրավորվել: Միջադեպերի հետ կապված Panorama.am-ը զրուցել է քաղաքական գործիչների ու ռազմական փորձագետների հետ:

Պաշտպանության նախարարի մամուլի խոսնակ Արծրուն Հովհաննիսյանը նշեց, որ բավականին երկար ժամանակ է սահմանագծում հետաքննության մեխանիզմների ներդրման հարցի հետ կապված քննարկումներ են գնում, միայն այդ ձևով հնարավոր կլինի արձանագրել մեղավորներին ու պատժել նրանց, սակայն Ադրբեջանը շարունակում է մերժել այդ գաղափարը: «Ինչ վերաբերվում է այսպիսի միջադեպերը նվազագույնին հասցնելու հարցին, ապա ընդգծեմ, որ մեր հույսը մենք ենք: Տեխնիկական առումով անընդհատ փորձում ենք կատարելագործել մեր հնարավորությունները, որպեսզի հնարավոր լինի մեր բնակավայրերն ու ճանապարհները հնարավորինս զերծ պահել  ռիսկերից: Այս գործընթացը շարունակական է ու անընդհատ կատարելագործելու ենք»,- ասաց նա:

ԱԺ պատգամավոր, Աֆղանստանի պատերազմի վետերանների միության նախագահ Արմեն Մխիթարյանի համոզմամբ, ադրբեջանական կողմին, նման քայլերից կարող է հետ պահել միայն հայկական կողմից անհամարժեք գործողությունների իրականացումը՝ յուրաքանչյուր կորուստի դիմաց մի քանի անգամ շատ կորուստներ հասցնելը: «Ադրբեջանում պաշտպանության նախարար է փոխվել, հավանաբար, նա փորձել է իր դիրքը դնի ու միաժամանակ ցույց տալ, որ իրենց վարած ոչ կառուցողական քաղաքականությունը շարունակվելու է»,- նշեց նա:  Ա. Մխիթարյանն ասաց, որ միջազգային հանրությունը որպես կանոն ինչպես կարգն է չի արձագանքում նման միջադեպերին, իսկ Ադրբեջանն օգտվելով առիթից այնպիսի քայլերի է գնում, ինչը կարող է ձախողել խաղաղ բանակցային գործընթացը:

Ռազմական փորձագետ Հրաչյա Պետրոսյանցը կարծում է, որ հակառակորդի կողմից նման սադրանքները կարող են կասեցվել միայն նրա կրակակետերի ոչնչացմամբ: «Հակառակորդի այն կրակակետերը, որոնք անընդհատ վտանգ են ստեղծում մեր միջպետական ճանապարհների ու բնակավայրերի համար, պետք է ամեն գնով ոչնչացնել, եթե հնարավոր է՝ նույնիսկ այդ հենակետերը գրավելու ճանապարհով: Իհարկե կրակակետերը ոչնչացնելու ցանկացած ուղի իր հետևանքներն ունի ու մենք պետք է դրան պատրաստ լինենք՝ երկրորդ, երրորդ քայլ անելու համար»,- նշեց ռազմական փորձագետը: Անդրադառնալով նմանատիպ միջադեպերի առնչությամբ միջազգային արձագանքին, Հ. Պետրոսյանցը նշեց, որ միջազգային փորձի ուսումնասիրությունը ցույց է տալիս, որ գերտերությունները հիմնականում առաջնորդվում են երկակի չափորոշիչներով: «Երբ ԱՄՆ-ի կամ Եվրոպական երկրների շարասյուններ են կրակի թիրախ դառնում, միջազգային հանրությունն այդ միջադեպը դարձնում է դրոշակ, սակայն մեր դեպքում, երբ տարիներ շարունակ ողջ աշխարհը ականատես է Ադրբեջանի պրովակացիոն քայլերին, իրավական գնահատականներ չեն հնչում. միջազգային հանրությունն ուղղակի լռում է: Նրանք միջազգային իրավունքի խախտում արձանագրում են միայն այն դեպքում, երբ դա ձեռնտու է իրենց, մնացած դեպքերում «աչքփակոցի» է»,- հավելեց նա: