Գագիկ Ջհանգիրյանն առաջարկում է բարձրացնել դատավորների աշխատավարձը
Դատական համակարգի վարձատրությունը ստորադասելով գործադիր և օրենսդիր իշխանության վարձատրությանը, արդյոք նպաստո՞ւմ ենք անկախ դատական համակարգի կայացմանը: Այսօր Ազգային ժողովում «Պետական պաշտոններ զբաղեցնող անձանց վարձատրության մասին» ՀՀ օրենքի նախագծի և դրա հետ միասին ներկայացված մի քանի օրենքներում փոփոխություններ կատարելու մասին նախագծերի փաթեթի քննարկման ժամանակ նման հարցադրում արեց ԱԺ ՀԱԿ խմբակցության պատգամավոր Գագիկ Ջհանգիրյանը:
Նրա խոսքով, Սահմանադրական դատարանի նախագահի համար ավելի բարձր աշխատավարձ է առաջարկվում, քան, օրինակ, Վճռաբեկ դատարանի նախագահի:
«Այս երեք թևերը համարժեք նշանակություն ունեն, իմ կարծիքով` դատական իշխանությունները ավելի մեծ կարևորություն ունեն: Դատարաններին ավելին պետք է տայինք, չնսեմացնենք գործադիրի և օրենսդիրի համեմատ», - հավելեց պատգամավորը:
«Ես հարաբերակցության խնդիր եմ առաջ քաշում, ես չեմ ասում դատարաններինն էլ բարձրացրեք: Գուցե նրանցը իջեցնեք: Խնդիրն այն է, որ այդ աշխատավարձերը պետք է համաչափ լինեն: Սահմանադրության մեջ նշված չի, որ դատական իշխանությունը ավելի նվազ կարևոր է, քան գործադիրը կամ օրենսդիրը: Ավելին կարող եմ ասել. եթե աշխատավարձի վճարման հարցում պատասխանատվությունից ենք ելնում, այստեղ ամեն մի պատգամավորի պատասխանատվությունը ավելի մեծ չէ, քան արդարացի դատական ակտ կայացնող դատավորինը»,- հայտարարեց Ջհանգիրյանը` նկատելով, որ օրինագծով խախտվում է իշխանության թևերի միջև համամասնությունը:
Արձագանքելով Ջհանգիրյանին, օրինագծերի փաթեթը խորհրդարանի դատին ներկայացնող կառավարության աշխատակազմի ղեկավար-նախարար Վաչե Գաբրիելյանը նկատեց, որ ընդհանուր իրավասության դատարանի դատավորներ ու դատարանների նախագահների աշխատավարձերը համադրելի են նախարարների հետ: «Այսինքն, միանշանակ ասել, որ այս համակարգը ավելի ցածր է նախատեսում, նման միտում չի եղել: Ես մեծ ուրախությամբ այդ առաջարկները Ձեզ հետ կքննարկեմ, եթե դրանք ներկայացնեք: Կաշխատենք անել ճշգրտումներ», -հավելեց Գաբրիելյանը:
Նշենք, որ օրենսդրական փաթեթով ներդրվում է պետական պաշտոններ զբաղեցնող անձանց վարձատրության միասնական համակարգ: Եթե մինչ այժմ պետական համակարգի տարբեր ոլորտներում աշխատողների վարձատրությունը կանոնակարգվում էր առանձին օրենքերով, ապա այժմ կառավարությունն առաջարկում է աշխատավարձերի հաշվարկման միասնական սկզբունք ՝ բոլորի համար: Ըստ նախագծի՝բազային աշխատավարձի չափը չի կարող ցածր լինել օրենքով սահմանված նվազագույն աշխատավարձի 80 տոկոսից և գերազանցել դրա 120 տոկոսը: Յուրաքանչյուր պաշտոնյայի աշխատավարձը հաշվարկելիս բազային աշխատավարձը բազմապատկվելու է այդ պաշտոնի համար սահմանված գործակցով: Պաշտոնային դրույքաչափերի սանդղակում ամենաբարձր գործակիցը Հանրապետության նախագահինն է՝ 20, որին հաջորդում են ՀՀ ԱԺ նախագահը և ՀՀ վարչապետը՝ 18 գործակիցներով: ՀՀ Սահմանադրական դատարանի նախագահի գործակիցը 16 է, Ազգային անվտանգության խորհրդի քարտուղարի գործակիցը՝ 15,5, փոխվարչապետինը՝ 15: Մարդու իրավունքների պաշտպանի գործակիցը այդ սանդղակում ևս 15 է, ավելի բարձր, քան ասենք ՀՀ ԱԺ փոխնախագահինը՝ 14, Վերաքննիչ դատարանի նախագահինը՝ 13.50, ՀՀ Ոստիկանության պետինը՝ 12, նախարարներինը՝ 12: Նվազագույն գործակիցն, ըստ սանդղակի, պետական համակարգում աշխատող կրտսեր մասնագետինն է՝ 1.25:
«Ես ասում եմ այս գործակիցները համաչափելի դարձնենք: Իմ կարծիքով, դատական համակարգը կարևոր է, քանի որ դատական համակարգի վիճակը այսօր այսպիսի ողբալի է, գոնե չթերագնահատենք, չնսեմացնենք գործադիրի ու օրենսդիրի համեմատ: Գոնեն դնենք հավասարության դաշտ: Իմ կարծիքով, դատավորներին պետք է ավելին տայինք: Ես սա եմ առաջարկում», -հայտարարեց Գագիկ Ջհանգիրյանը:
Նախորդիվ`
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
