Ձեր վստահելի աղբյուրը

ԱԺ ՀԱԿ խմբակցության քարտուղար Արամ Մանուկյանը տակտիկական սխալ է համարում կառավարության քայլը, որ գործազրկության նպաստը վերացնելու մասին օրինագծից հետո խորհրդարանին ներկայացրեց բարձրաստիճան պաշտոնյաների աշխատավարձերը բարձրացնելու մասին օրինագիծը:

«Տպավորություն է, թե գործազրկության նպաստը կտրում եք, որ ուղղեք աշխատավարձերի բարձրացմանը: Եթե իրականում այդպես չէ, ապա ասում եմ` տպավորությունն այդպիսին է», -այսօր խորհրդարանում «Պետական պաշտոններ զբաղեցնող անձանց վարձատրության մասին» նախագծի և դրան կից օրինագծերի վիճահարույց փաթեթի քննարկման ժամանակ հայտարարեց ԱԺ ՀԱԿ խմբակցության քարտուղարը:

Պատգամավորի խոսքով, աշխատավարձերի բարձրացումը պետք է լինի միանգամից, որպեսզի գնաճը մեղմվի: Նա վստահ է, որ այս նախագիծը նպաստելու է գնաճին: «Խոցելի շերտերը` թոշակառուներ, գործազուրկներ, հաշմանդամներ նրանց նկատմամբ բեռը ավելանալու է, որովհետև սոիալակն ծրագրերի և մասնավորապես թոշակների մինչև 15 տոկոս ավելացումը, գների թանկացման հետ ադեկվատ չեն: Դուք այս համակարգով, այս կոնցեպտով չեք կարող լուծել այն մարտահրավերները, այն խնդիրները, որոնցով փորձում եք լուծել մարդկանց բարեկեցության հարցը», -հայտարարեց Մանուկյանը:

Ընդդիմադիր պատգամավորի կարծիքով, իշխանությունների վարած քաղաքականությունը նպաստում է, որ մարդիկ գնան, արտադրողները հեռանան երկրից: Նա մատնանշեց ռուսական միգրացիոն ծառայության տվյալները և հայտարարեց, որ այս տարվա ինն ամիսների ընթացքում 160 հազար քաղաքացի Հայաստանից հեռացել է Վերին Լարսի անցակետով:

«Դուք դուրս եք մղում ձեզ կոպեկ տվողին: Դուք դուրս եք մղում Հայաստանում որևէ արտադրություն կազմակերպողին: Աշխատավարձի բարձրացումը կոնցեպտ է, քաղաքական խնդիր է, եթե ուզում եք վստահություն լինի իշխանության նկատմամբ, քաղաքացու բարեկեցությունը բարձրացրու, ինքը կասի` փառք իշխանություններին: Բայց քաղաքացին փախնում է: ՀՀ բնակչության երեք տոկոսը ամեն տարի գնում է», հայտարարեց Մանուկյանը:

Նախագծի վերաբերյալ խոսելիս, Մանուկյանն ասաց, որ այս նախագծով սոցիալական լարվածությունը չի վերացվում, քանի որ վերևի շերտերի գործակիցները բարձրանում են, իսկ ստորին օղակներում աշխատողների աշխատավարձերի մեջ էական փոփոխություն չի լինելու: «Ներքևի օղակների աշխատողների վիճակը ավելի է խեղճանում, իսկ արտագաղթն իհարկե պետք է մեծանա», -նկատեց ընդդիմադիր պատգամավորը:

Մանուկյանն իր ելույթի ընթացքում նաև հումորով առաջարկեց պատգամավորներին երկու խմբի բաժանել` ով բիզնես ունի նրա գործակիցը 0 սահմանել, իսկ աշխատող պատգամավորների համար էլ ` 10-15 գործակից: «Իսկ ավելի լուրջ, ասեմ` եթե պետությունը ցանկանում է իր քաղաքացու բարեկեցությունը բարձրացնել, ապա հստակ քաղաքական դիրքորոշում պետք է ունենա և քաղաքական լուծումներ տա` պայքար մենաշնորհների, կոռուպցիայի դեմ պայքար, ստվերը բերել հարկային դաշտ, պետական ապարատի կրճատում», - օրինագծի վերաբերյալ խմբակցության դիրքորոշումը ներկայացնելիս հայտարարեց Արամ Մանուկյանը` այդպես էլ չասելով` ՀԱԿ-ը կողմ է օրինագծին, թե ոչ:

Նախորդող հրապարակումներ.

 Գագիկ Ջհանգիրյանն առաջարկում է բարձրացնել դատավորների աշխատավարձը

 2014-ին նվազագույն աշխատավարձը կկազմի 50 հազար դրամ, 2015-ին` 55 հազար, 2016-ին 62.5 հազար դրամ. Նոր նախագիծ

«Պարոն Աբրահամյան, ինչո՞ւ ձեր աշխատավարձը պետք է բարձրանա». Փոստանջյանը` ԱԺ նախագահին

Պաշտոնյաների աշխատավարձը բարձրացնող օրինագիծը քաղաքական փաստաթուղթ է. Դավիթ Հարությունյան

Ն.Փաշինյան. 1 մլն 146 հազար քաղաքացիներ կստանան «բարի լուր»` քաղաքական էլիտան որոշել է բարձրացնել ինքն իր աշխատավարձը