Ձեր վստահելի աղբյուրը

«Հայաստանում գործազրկության նպաստը 18 հազար դրամ է: Ինչպես ՀՀԿ խմբակցության անդամ Հակոբ Հակոբյանը հայտարարեց` անբարոյականություն է գործազուրկին 18 հազար դրամ նպաստ առաջարկելը, բայց ինչպե՞ս լուծեց Ազգային Ժողովը բարոյական այս թնջուկը. բռնեց և վերացրեց գործազրկության նպաստի ինստիտուտը կառավարության առաջարկով»,- քիչ առաջ Ազգային Ժողովում  «Պետական պաշտոններ զբաղեցնող անձանց վարձատրության մասին» օրենքի նախագծի քննարկման ժամանակ հայտարարեց ՀԱԿ խմբակցության անդամ Նիկոլ Փաշինյանը` նշելով, որ սիմվոլիկ է, որ զբաղվածության մասին և պետական պաշտոններ զբաղեցնող անձանց վարձատրության մասին նախագծերը քննարկվում են իրար ետևից:

Ն.Փաշինյանի խոսքով, դրանից հետո ԱԺ-ն սկսեց քննարկել ՀՀ նախագահի աշխատավարձը 203 տոկոսով ավելացնելու, այսինքն` 1 մլն 322 հազար դրամ դարձնելու, ՀՀ վարչապետի և ԱԺ նախագահի աշխատավարձերը 218 տոկոսով բարձրացնելու և 1 մլն 190 հազար դրամ դարձնելու մասին հարցը.

«Նրանք այն մարդիկ են, որոնց պաշտոնում գտնվելու ժամանակահատվածում աղքատությունը Հայաստանում 27.6 տոկոսից աճել հասել է 36 տոկոսի, արտագաղթը ահագնացել: Կարելի է կարծել, որ այս պաշտոնյաները խեղճ են եղել փողից, ցածր աշխատավարձ են ստացել, դրա համար են նրանց պաշտոնավարման հետևանքները աղետալի Հայաստանի համար»,- կարծիք հայտնեց Ն.Փաշինյանը` ավելացնելով, որ կառավարության անդամներն այս նախագիծը հիմնավորող փաստարկներ ունեն, այն է` 2014թ-ի պետական բյուջեով աշխատավարձերի, թոշակների ընդհանրական բարձրացում էլ է նախատեսվում.

«Այո, նախատեսվում է. օրինակ, ուսուցիչների աշխատավարձը բարձրանալու է 4.7 տոկոսով և եթե ուսուցիչն այսօր ԿԳ նախարարից 2.3 անգամ պակաս աշխատավարձ է ստանում, այս նախագծի ընդունման պարագայում պակաս է ստանալու 5.3 անգամ: Ու եթե հաշվի առնենք, որ հունվարի 1-ից մեկնարկում է այսպես կոչված կուտակային կենսաթոշակի պարտադիր վճարը, ստացվում է, որ ուսուցչի աշխատավարձի ոչ մի բարձրացում էլ իրականում չկա»,- շեշտեց նա:

2014թ-ի բյուջեով հաշմանդամների թոշակն էլ է բարձրանալու.

«Սայլակով առաջին կարգի հաշմանդամը ստանալու է ոչ թե 18 200 դրամ, ինչպես այս տարի, այլ մի ամբողջ 1400 դրամով ավելի` 19 600 դրամ: Աշխատանքային կենսաթոշակների այսպես կոչված բարձրացումների արդյունքում 30 տարվա աշխատանքային ստաժ ունեցող քաղաքացին ստանալու է 30 200 դրամ թոշակ, մինչդեռ պաշտոնական վիճակագրությամբ պարենային զամբյուղը Հայաստանում 32 099 դրամ է: Այսինքն 30 տարի աշխատած քաղաքացու թոշակը նույնիսկ չի հերիքելու իր անձի ամենահամեստ պահանջները բարելավելու համար»,- տեղեկացրեց Նիկոլ Փաշինյանը:

Հայաստանում այսօր, շարունակեց նա, 1 մլն 146 հազար մարդ պաշտոնական վիճակագրությամբ աղքատ է, և այդ մարդիկ ամեն օր լուր են սպասում, թե ինչ կանի քաղաքական էլիտան իրենց հուսահատության ճիրաններից ազատելու համար.
«Եվ ահա այսօր նրանք կստանան «բարի լուրը», որ քաղաքական էլիտան որոշել է բարձրացնել ինքն իր աշխատավարձը: Ինչ է սա, եթե ոչ ցինիզմ աղքատության, արտագաղթի ու հուսահատության ֆոնի՞ն: Սա ոչ այլ ինչ է, քան ցինիզմ և սա ասում եմ հատուկ բոլոր նրանց համար, ովքեր փորձում են կամ կփորձեն իմ դիրքորոշումը որակել որպես պոպուլիստական»,- հայտարարեց  Ն.Փաշինյանը:

Պատգամավորին զարմացնում ու զայրացնում է այն փաստը, թե ինչու պետք է բարձրանա ԱԺ պատգամավորների ու ղեկավարության աշխատավարձը, երբ ավելի քան մեկ տարի է այդտեղ են, բայց մի դեպք չկա հիշատակելու, երբ կարողացել են մի ցավ դարմանել Հայաստանից գլխապատառ փախչող ժողովրդի համար.

«Աշխատավարձներս ցածր է, դրա համա՞ր չենք կարողացել: Դեռ նեղանում են, թե ինչու է կառավարությունը պատգամավորների աշխատավարձերը սանդղակում հավասարեցրել փոխնախարարների հետ: Չնեղանաք` լավ են արել, գոհ եղեք,  կառավարության թղթերը դակող ենք, որովհետև ինչ բերում են` դակում ենք, օրենք ենք սարքում»,-հայտարարեց Փաշինյանն ու մատնանշեց` չկա մի դեպք, երբ կառավարության բերած օրինագիծը մերժվի:

Այնուհետ ընդդիմադիր պատգամավորը հիշեց Օստապ Բենդերին. իրավիճակի համեմատությանը նրան բերել էր ֆինանսների նախարարի այն հիմնավորումը, թե պատգամավորների աշխատավարձի բարձրացումը կբերի նրանց ավելի անկախ լինելուն.
«Սա հիշեցրեց ինձ հայտնի երկխոսությունը. «Շուրա, իսկ որքա՞ն է ձեզ հարկավոր երջանիկ լինելու համար»…. Կառավարության տրամաբանությամբ պատգամավորին անկախ լինելու համար չի բավականացնում ընդամենը 329 հազար 805 դրամ` հենց այսքանով են պատրաստվում բարձրացնել պատգամավորի աշխատավարձը: Եվ փաստորեն` նույնիսկ ընդդիմությունն է համաձայն այս տրամաբանությանը»:

Փաշինյանը հիշեցրեց նաև, որ հինգ տարի առաջ նույն դահլիճում դարձյալ նույն տրամաբանությամբ բարձրացվել էին դատավորների աշխատավարձերը և քմծիծաղով նշեց` «տեսնում ենք, ինչպիսի անկախ դատական համակարգ ունենք»:

Ի դեպ, նախօրեին նույն օրինագծի քննարկման ժամանակ ՀՅԴ խմբակցության անդամ Արծվիկ Մինասյանը հայտարարել էր, որ ՀՅԴ-ն կողմ է օրինագծին, «գաղափարն ընդունելի է իրենց համար»: Ն.Փաշինյանը անդրադարձավ նաև այդ ելույթին` ձեռքի հետ քննարկելով նաև ընդդիմություն լինել-չլինելու հարցը.

«Իմ կողմից շատ հարգված գործընկերս ասում է, որ իրենք լինելով ընդդիմության մեջ կողմ են այս օրենքի նախագծին: Որ կողմ են` հասկանալի է, բայց եկեք նորից նայեք ընդդիմադիր լինելու հարցը»,- շեշտեց նա:

Վերջում էլ ավելացրեց , որ չի կարող կողմ քվերակել այդ օրենքի նախագծին, բայց ոչ այն պատճառով, որ չի ուզում աշխատավարձը բարձրանա, այլ որովհետև ունի հիմնավոր պատճառներ, որոնցից առաջնահերթ է նա, որ պաշտոնյաների աշխատավարձերի բարձրացումը չի կարող տոկոսային առումով ավելի բարձր լինել, քան կենսաթոշակառուներինն ու հաշմանդամներինը:

Նախորդիվ`

 Գագիկ Ջհանգիրյանն առաջարկում է բարձրացնել դատավորների աշխատավարձը

 2014-ին նվազագույն աշխատավարձը կկազմի 50 հազար դրամ, 2015-ին` 55 հազար, 2016-ին 62.5 հազար դրամ. Նոր նախագիծ